Mahanyela ma dumisako Nungungulu

1. Hikuyini zi olovako ku a vanhu va zi tiva lezaku hi ka gotsovanyano wa muganga?

¹ Za olova ku a vanhu va zi wona lezaku hi ka gotsovanyano wa muganga. Ka matshamu lawa ku mahiwako kona migotsovanyano, a zihaxa-mahungu za tala ku tivisa a ku hi na ni gotsovanyano. A mahotela ni marestaurante ma tala ku enzelwa nguvu hi vanhu va tileko kasi ku ta wona gotsovanyano, niku a vahanyi va xipanze lexo va zi wona lezaku ku na ni vapfhumba vo tala va bohileko makaraxa. Lezi zi lanzelako zikhumbuxeto zitsongwani zi to hi vuna ku dumisa Nungungulu hi mahanyela ya hina ya ma nene gotsovanyanweni. — 1 Ped. 2:12.

2. Hi nga mu dumisisa kuyini Nungungulu hi mabohela ya hina ma kombisako xichawo gotsovanyanweni?

² Mabohela ma kombisako xichawo: A mabohela ya hina ma kombisako xichawo a xikhati hi nga laha gotsovanyanweni a kutala ka zikhati ma khumba vanhu lava va hi wonako. Hambulezo, a mabohela ya hina ka zikhati zinwani — zo kota xikhati hi yako ka hotela yo kari, xikhati hi gako ka restaurante yo kari, xikhati hi nga kuxaveni ka zilo, ni kunwani — ma nga ha khumba nguvu a vanhu lava va hi wonako. Hambu lezi zi kalako zi nga lavi a ku hi pana ka zikhati lezo, a tinguwo leti hi bohako ti fanele ku kombisa xichawo, ti tlhela ti hi to dzunzeka. Lava va hi wonako va fanele ku tekela ku wona a kuhambana ka hina ni va nga kholwiko. (Rom. 12:2) Ahandle ka lezo, hi fanele ku boha a karaxa ga hina, hakuva lezo zi ta tivisa a gotsovanyano, zi hi vululela a ndlela ya ku nyika wukustumunyu, zi tlhela zi vuna a vanhu vanwani va tileko va ta wona a gotsovanyano lezaku va hi tiva.

3. Hi nga kombisisa kuyini a lihlaza-mbilu ni xichawo?

³ Lihlaza-mbilu ni xichawo: A ka xikhati lexi a kutala ka vanhu lomu tikweni va nga khataliko hi vanwani, ni va nga bongiko, hi nga alakanya lezi a lihlaza-mbilu la hina ni xichawo zi to xalalisisa zona lava va hi wonako! (2 Tim. 3:1-5) A xikhati lexi hi vekelako wutshamu vanwani kutani ku folela a mabhuku ma humesilweko, a hi faneli ku rangisa zilaveko za hina, kanilezi hi fanele ku rangisa za vanwani. (1 Kor. 10:23, 24) Anzhako ka ku wona a gotsovanyano wakwe wa kuranga, a wanuna wo kari i te ngalo: “A nzi alakanyi nchumu ka lezi zi kanelweko ka siku lego, kanilezi a matshamela ya Timboni ma nzi khumbile nguvu.”

4. Hikuyini hi faneleko ku ehleketa xungetano hi ku tira hi kuziranza gotsovanyanweni loku hi zi kota?

⁴ Vatiri va kuziranza: A maKristu ya lisine ma tiviwa hi moya wa wona wa ku tira hi kuziranza. (Tis. 110:3) Xana u nga ti nyiketela hi kuziranza kasi ku tira gotsovanyanweni? Ka gotsovanyano wo kari, a xipimo xa 600 wa vamakabye va ti nyiketele hi kuziranza kasi ku maha basiselelo mahlweni ka gotsovanyano. Lava va nga hlamala hi ku wona lezo va te ngalo: “Cima hi wa nga se wona a nchumu wo hlamalisa nguvu wo kota lowu! Zi tshisa ni ku zi wula a ku a vanhu vontlhe lava vo tira hi kuziranza.” Hi rinzela hi mahlo yo pswhuka a gotsovanyano wa muganga wa 2013 ni lungelo legi hi tova nago ga ku ingisela ni ku gonza xungetano hi Nungungulu hi tlhela hi mu dumisa.

[Tlhamuselo wa mifota ka phajina 3]

Zikhumbuxeto za Gotsovanyano wa Muganga wa 2013

◼ Zikhati za mutlhangano: A tivati ti ta vululiwa hi 7:00. A wucenje ga kusangula ka mutlhangano gi ta sangula hi 8:20 ka masiku wontlhe ya manharu. Ka xikhati lexo, hontlheni hi fanele ku tshama kasi a mutlhangano wu sangula hi ndlela yi nene. Hi Wazihlanu ni Mulongiso, a lisimu ni mukhongelo wo gumesa zi ta sangula hi 15:50. Hi Sonto zi ta sangula hi 14:35.

◼ Wutshamu go veka mimova: Ka matshamu wontlhe ya gotsovanyano lawa hi nga ni wutshamu go veka mimova, ku nga ta hakhelwa nchumu. A mimova, mimota, kutani mibhasikeni, yi ta vekiwa hi xaxameto hi kuya hi loyi a rangako a chikela. Kota lezi a wutshamu gi nga gi tsongwani, zi wa tava chukwana a ku a vanhu va hlengela a mova munwe hi laha zi kotekako ha kona.

◼ Ku vekisa wutshamu: A wutshamu gi nga ha vekelwa a vanhu lava u fambako navo moveni munwe kutani lava u tshamako navo mutini munwe zinwe ni lava u gonzako navo a Biblia. — 1 Kor. 13:5.

◼ Zifihlulo: Tanani ni za ku khomisa nyoka hi kaya kasi mu nga suki wutshanwini ga gotsovanyano mu ya xava kutani ku ya teka zakuga hi xikhati xa kuhumula. Mu nga tirisa minzhava yi tsongwani yo hlayisa zilo na zi titimela leyi yi enelako lahasi ka xitulo. A minzhava ya hombe nguvu ni zibya za vidro a zi vumelelwi wutshanwini ga gotsovanyano.

◼ Minyikelo: Hi nga kombisa ku bonga a malulamiselo ya gotsovanyano hi ku maha a minyikelo hi kuziranza ka ntiro wa misava yontlhe laha gotsovanyanweni. A minyikelo yontlhe yi mahiwako hi xeke yi fanele ku tsaliwa lezaku yiya ka “Associação das Testemunhas de Jeová de Moçambique.”

◼ Mimuri: Loku ku hi ni muri wo kari u nwako, u nga wu siyi hakuva u nga ta nyikiwa laha ka gotsovanyano.

◼ Zilato: I chukwana a ku boha zilato zo toloveleka zi ku tshamako khwatsi lezi zi to ku vumelela a ku famba khwatsi.

◼ Maformulario Queira Visitar (S-43-T): Ku fanele ku tiriswa a maformulario Queira Visitar (S-43-T) kasi ku nyika mahungu xungetano hi munhu wihi ni wihi a kombisako kutsakela kota wuyelo ga kuxumayela ka hina hi xitshuketi hi xikhati xa gotsovanyano. A maformulario lawa ma tatisilweko ma fanele ku yiswa ka Xipanze xa Mabhuku kutani ka matsalani wa bandla ga wena loku mu wuyile hi mutlhanganweni.

◼ Malulamiselo ya wutshamu go etlela: A Xipanze xa ku Rurela Vapfhumba xi sangula ku tira a gotsovanyano na wa ha hi kule nguvu kasi ku maha malulamiselo ya ku rurela vontlhe lava va kombelako wutshamu go etlela. A malulamiselo lawo ma engetela a litsako la kuva zinwe kota maKristu. Hambulezo, kota lezi hi lavako lezaku a “zilo zontlhe zi mahiwa hi fanelo ni nayo,” ni lezi ku patsekako a kutshamiseka ka vanwani, ka laveka a zikhumbuxeto zo kari. Lava va ta ngava vapfhumba mitini ya vamakabye va fanele ku xalaliswa hi lezi va nyikwako va tlhela va maha lezi va kombeliwako. Alakanya a ku siya yindlu na yi basile siku ni siku legi u yako gotsovanyanweni zinwe ni siku go gumesa legi u ta nga suka laha mutini wa makabye. A kuva mupfhumba mutini wa makabye a zi suseli munhu a wutihlamuleli ga ku ti lavela a zakuga zakwe wutsumbu ni mali yo khilela hi yona mova. Hikwalaho, a munwe ni munwani i fanele ku maha malulamiselo yakwe mhakeni leyi. A ku tirisana ni nwinyi wa muti mhakeni leyi zi ta maha lezaku a rurela vapfhumba hi kuziranza, na ku ngahi hi kukurumetwa. Hi kufanana, lava va ta nga etlela laha wutshanwini ga gotsovanyano, vonawu va fanele ku tirisana ni vakombeteli lezaku va siya a wutshamu ga gotsovanyano na gi basile siku ni siku. — 1 Kor. 14:40.

◼ Ntiro wa kuziranza: Ni wihi loyi a xuvako ku maha ntiro lowo i fanele ku bikela a Xipanze xa Vatiri va Kuziranza laha mutlhanganweni. A vanana va nga chikeliko ka 16 wa malembe vonawu va nga nyikela xivuno xo saseka hi ku tira na va wonelelwa hi vapswali kutani munhu munwani wa hombe a vumelelweko hi munwe wa vona.

◼ Kubapatizwa: Lava va yako kubapatizweni va fanele ku tshama wutshanwini legi gi vekelweko vona na wu nga se sangula a longoloko wa Mulongiso ni mixo. Vontlhe lava va yako kubapatizweni va fanele ku famba ni thawula ni tinguwo to hlamba hi tona ti kombisako xichawo. Ka zikhati zi hunzileko a vokari va bohile a tinguwo ti nga faneliko, leti ti nga onha a wudzunzo ga ximaho lexo. A madota lawa ma kambisisako a ziwutiso zi nga ka bhuku Organizados ni lava va yako kubapatizweni ma fanele ku tiyiseka lezaku a munwe ni munwani wabye wa ti zwisisa a timhaka leti zinwe ni matshinya ya milayo ya Biblia lawa ma fambelanako nato.