Masiku Manharu Na Hi Phamelwa Hi Tlhelo Ga Moya
1. Xana hi rinzela yini ka gotsovanyano wa muganga wa lembe legi?
1 Tikweni legi ga Satani ga xihala hi tlhelo ga moya, Jehova a nga tsiki ku phamela a malanza yakwe. (Isa. 58:11) A yinwe ya tindlela leti Jehova a ti tirisako kasi ku hi phamela i gotsovanyano wa muganga wa lembe ni lembe. Laha a gotsovanyano wa lembe legi wu tshinelako, xana hi nga ti longiselisa kuyini kasi ku amukela ni ku avela vanwani a zakuga lezo za moya? — Mav. 21:5.
2. Zini hi faneleko ku longisela hi mbheta?
2 Loku u nga se ti longisela, ti nyike xikhati xa ku xaxameta a mitiro ya wena zalezi kasi uva kona ka gotsovanyano masiku wontlhe ya manharu. Xana wa xi tiva a xikhati lexi xi lavekako kasi u chikela ka gotsovanyano u tlhela u languta wutshamu na longoloko wu nga se sangula? Hakunene a hi zi lavi a ku lahlekelwa hi xipanzana ni xinwe xa zakuga lezi za moya zo nona lezi Jehova a hi longiseleleko! (Isa. 65:13, 14) Xana wa zi tiva lezi u to fambisa zona ni lomu u to ya tshama kona?
3. Zini lezi hina wutsumbu zinwe ni ngango wa hina hi faneleko ku maha lezaku hi vuneka khwatsi hi gotsovanyano?
3 Xini xi to ku vuna lezaku a maalakanyo ya wena ma nga enzi hi xikhati xa longoloko? Loku zi koteka, humula u enelelwa masiku wontlhe ya gotsovanyano. Cuwuka a mukaneli. Vulula a mitsalo yontlhe yi to gonziwa lomu ka Biblia ga wena. Tsala timhaka ta lisima. I chukwana a ziro za ngango zi tshama zinwe kasi a vapswali va vuna vana vabye a ku ingisela khwatsi. (Mav. 29:15) Za saseka a kuva mu bhula hi timhaka-tshinya anzhako ka longoloko wa siku ni siku. Kasi a ngango wa nwina wu tshama na wu xure anzhako ka gotsovanyano, ti nyikeni xikhati nzeni ka Wukhozeli ga nwina ga Ngango lezaku mu bhulisana hi lezi mu vunekileko hi zona.
4. Xana hi nga va vunisa kuyini vanwani laha bandleni lezaku va nga luzi a zakuga lezi za moya?
4 Vuna Vanwani Lezaku Vaga: Hi lava lezaku a vanhu vanwani vagawo zakuga za moya. Xana laha bandleni ga nwina ku na ni vahuweleli va khosaheleko kutani vanhu vanwani va lavako xivuno lezaku vaya ka gotsovanyano? Xana u nga va vuna? (1 Joh. 3:17, 18) A madota, nguvunguvu a vawoneleli va mitlawa, va fanele ku khatalela a vahuweleli lavo.
5. Hi ta avelisa kuyini a zirambo ka masiku ya gotsovanyano? (Wona a kwadru laha hehla.)
5 Kota lezi hi tolovelako ku maha, na ka ha sele maviki manharu hi tava ni tsima ga ku ramba vanhu lezaku vaya ka gotsovanyano. A mabandla ma fanele ku ti karatela ku avela a zirambo zontlhe ma zi amukeleko ni ku tlhanganyisa a xipanze xabye. A zirambo lezi a ngango wa nwina wu seleko nazo anzhako ka tsima, mu fanele ku famba nazo gotsovanyweni kasi mu zi tirisa laha mu nyikako wukustumunyu hi xitshuketi. A mahungu yo engeteleka xungetano hi mhaka leyi mu ta ma kuma hi wa Wuntlhanu ni mixo. A zirambo lezi a ngango wa nwina wu to kala ku zi tirisa laha ka gotsovanyano, zi nyikeleni ka vakombeteli na ma ha chikela. Mu ta byeliwa a ndlela ya ku zi tirisa kwalaho ka gotsovanyano. Ti siyele xirambo xinwe hakuva u ta xi tirisa ka kanelo wo gumesa hi Sonto.
6. Hi nga gi kombisisa kuyini a wumunhu?
6 Kombisa Wumunhu: Masikwini lawa a vanhu vo tala ‘va ti ranzako wutsumbu’ na va nga khatali hi kutizwa ka vanwani, a zo ku tsakisa a kuva xikari ka maKristu-kulori lawa ma ti karatelako a ku kombisa wumunhu! (2 Tim. 3:2) Hi kombisa wumunhu hi ku nghena hi kurula wutshanwini ga gotsovanyano a xikhati lexi ku vululiwako tinyangwa hi 7:00h ni ku vekela wutshamu a ziro za ngango wa hina, lava hi fambako navo ka mova wunwe kutani lava hi gonzako navo a Biblia. Hi fanele ku ingisa a mukhomi wa nzima a xikhati lexi a hi kombelako lezaku hiya matshanwini ya hina kasi hi ya ingisela wucenje legi gi vululako a xipanze xinwe ni xinwani. Hi kombisa wumunhu loku hi vala a titelefone ta hina lezaku ti nga hambukisi a kupima ka vanwani nzeni ka longoloko. Hi maha khwatsi kambe hi ku nga bhuli, ku tsala mamesaje, kuga kutani ku fambafamba handle ka xigelo hi xikhati xa longoloko.
7. Xivuno muni hi xi kumako hi kuva zinwe ni vamakabye va hina?
7 Ti Buze Hi Kuva Zinwe Ni Vanwani: A migotsovanyano yi hi vulela a tindlela to tala ta ku ti buza hi wumakabye ga hina go tsakisa ga wuKristu. (Tis. 133:1-3) Hikuyini u nga sanguliko hi wena u losa a vamakabye va xinuna ni va xisati lava va tako hi ka mabandla manwani kasi mu tivana? (2 Kor. 6:13) Ti vekele mixuvo ya ku tiva munhu munwe kutani ngango wunwe hi siku hi kutsongwani ka kona. A xikhati xa kuhumula xa ni hlikanhi xi nene kasi ku maha lezo. Hikwalaho, tana ni zakuganyana kasi uga na u hi zinwe ni vanwani wutshanwini ga ku huma u yaga handle. Hi ku maha lezo hi nga kuma vanghana vaswa ni va pinzukelwa.
8. Hikuyini hi faneleko ku ti hendleleta lezaku hi tira ka gotsovanyano, niku hi nga mahisa kuyini?
8 A hi kutsakisa ka zona a ku tira zinwe ni vakhozeli-kulori ntirweni wo basa! Xana u nga ti hendleleta lezaku u vunetela ka xipanze xo kari kutani ku ya maha ntiro wo basisa zinwe ni bandla ga wena? (Tis. 110:3) Loku u nga se nyikiwa ntiro, wonana ni Xipanze xa Vatiri va Kuziranza kwale gotsovanyweni. A ntiro wu tsakisa ku hlengela!
9. Hikuyini hi faneleko ku khatalela nguvu a matshamela ya hina ni kucuwukeka ka hina hi xikhati xa gotsovanyano?
9 A Matshamela Ya Hina Ma Tsakisa Lava Va Hi Wonako: Hi fanele ku kombisa a ku hi na ni gotsovanyano ka masiku wontlhe ya manharu, ku nga hi ntsena hi xikhati xa longoloko. Lava va hi wonako a xikhati lexi hi nga laha doropeni ga gotsovanyano va fanele ku wona a matshamela ya hina yo tsakisa yo hambana ni lava va nga hiko Timboni. (1 Ped. 2:12) A maambalela ni kutisasekisa ka hina loku hi hi laha ka gotsovanyano ni laha hi nga rurelwa kona ma fanele ku dzunza Jehova. (1 Tim. 2:9, 10) Loku hi boha a makaraxa ya hina a vanhu va ta zi wona lezaku hi Timboni ta Jehova. Lezo zi nga hi vulela ndlela ya ku va tivisa a gotsovanyano wa hina ni ku va nyika wukustumunyu.
10. Xana hi nga va tsakisisa kuyini a vatiri va hotela?
10 Loku hi tshuka hi rurelwa hotela, xana hi nga va tsakisisa kuyini a vatiri va kona? Hi nga lugari a tikwarutu to tala to hunza leti hi to ti tirisa, niku lezo zi ta vuna vanwani a ku kumawo wutshamu. Loku ku tele vanhu a xikhati lexi hi nghena kutani ku huma hi fanele kuva ni lihlaza-mbilu. (Kol. 4:6) Hi fanele ku hakhela mali leyi yi lavekako ka vatiri va hotela.
11. Hi wahi matshango ma kombako lezaku a mahanyela ya hina ya wuKristu ma nyika wukustumunyu gi nene?
11 Xana a matshamela ya hina ya ma nene hi xikhati xa gotsovanyano ma va byela yini vanwani? Ka phepha-hungu go kari, a nwinyi wa wutshamu gi tiriselweko ku maha gotsovanyano wo kari i te ngalo: “A vanhu va kona va nene nguvu. Za hi tsakisa a ku va amukela lembe ni lembe.” Ka lembe gi nga hunza a munhu wo kari a nga hiko Mboni i lo lahla a xipachi xakwe ka hotela yi nga tiriswa hi Timboni. A xikhati lexi a xipachi lexo xi nga tlhelisiwa ka murangeli wa hotela ni zontlhe zi nga hi lomo, a murangeli loye i te ngalo ka nwinyi wa xona: “Uve ni njombo hakuva a Timboni ta Jehova ti wa hi ni gotsovanyano kusuhani ni laha, niku a hotela yi wa tele hi vona. Loku ku wa nga hi lezo za kanakanisa a ku a xipachi xa wena na u xi kumile.”
12. Laha a gotsovanyano wu tshinelako, hi fanele ku ti yimisela yini niku hikuyini?
12 A gotsovanyano wa lembe legi wa tshinela hi xihatla. Ku tirilwe nguvu kasi hi phamelwa khwatsi ka gotsovanyano lowu. Ti vekele mixuvo ya kuva kona masiku wontlhe ya manharu, u tlhela u ti longisela a kuga lezi Jehova ni hlengeletano yakwe va ku vekeleko zona. Ti yimisele a ku tiyisa vanwani hi wumunhu ga wena, wunghana ni matshamela ya wena ya ma nene. Loku u maha lezo, wena zinwe ni vanwani mu ta ti zwisa lezi a wokari a nga ti zwisa zona hi gotsovanyano wa nwecemu, “Kuve xona ximaho xo tsakisa ku hunza zontlhe wutomini ga mina!”
[Tlhamuselo wa mifota ka phajina 4]
Kota lezi hi tolovelako ku maha, na ka ha sele maviki manharu hi tava ni tsima ga ku ramba vanhu lezaku vaya ka gotsovanyano
[Tlhamuselo wa mifota ka phajina 6]
A maambalela ni kutisasekisa ka hina loku hi hi laha ka gotsovanyano ni laha hi nga rurelwa kona ma fanele ku dzunza Jehova
[Tlhamuselo wa mifota ka phajina 7]
Ti yimisele a ku tiyisa vanwani hi wumunhu ga wena, wunghana ni matshamela ya wena ya ma nene
[Tlhamuselo wa mifota ka phajina 4]
Zikhumbuxeto Za Gotsovanyano Wa Muganga Wa 2011
◼ Zikhati Za Longoloko: Ka masiku wontlhe ya manharu, a longoloko wu ta sangula hi 8:20. A tivati ti ta vululiwa hi 7:00. Loku a wucenje go vulula gi sangula, hontlheni hi fanele ku tshama kasi a longoloko wu sangula hi ndlela yi nene. Hi wa Wuntlhanu ni Mulongiso, a longoloko wu ta gumesa hi 15:55. Hi Sonto wu ta gumesa hi 14:40.
◼ Wutshamu Go Veka Mimova: Ka matshamu wontlhe ya gotsovanyano lawa hi nga ni wutshamu ga hina go veka mimova, ku nga ta hakhelwa nchumu. A mimova, mimota, kutani mibhasikeni, yi ta vekiwa hi xaxameto hi kuya hi loyi a rangako a chikela. Kota lezi a wutshamu gi nga gi tsongwani, zi wa tava chukwana a ku a vanhu va hlengela a mova munwe hi laha zi kotekako ha kona.
◼ Ku Vekisa Wutshamu: A wutshamu gi nga ha vekelwa a vanhu lava u fambako navo moveni munwe kutani lava u tshamako navo mutini munwe zinwe ni lava u gonzako navo a Biblia. — 1 Kor. 13:5.
◼ Zifihlulo: Tanani ni zifihlulo hi kaya kasi mu nga suki wutshanwini ga gotsovanyano mu ya xava kutani ku ya teka zakuga hi xikhati xa kuhumula ka ni hlikanhi. Mu nga tirisa minzhava yi tsongwani yo hlayisa zilo na zi titimela leyi yi enelako lahasi ka xitulo. A minzhava ya hombe nguvu ni zibya za vidro a zi vumelelwi wutshanwini ga gotsovanyano.
◼ Minyikelo: Hi nga kombisa ku bonga a malulamiselo ya gotsovanyano hi ku maha a minyikelo ya kuziranza yi yako ka ntiro wa misava yontlhe laha gotsovanyweni. A minyikelo yontlhe yi mahiwako hi xeke yi fanele ku tsaliwa lezaku yiya ka “Associação das Testemunhas de Jeová de Moçambique.”
◼ Timhango Ni Mababyi Ya Xitshuketi: Loku ku humelela mababyi ya xitshuketi wutshanwini ga gotsovanyano, tivisa mukombeteli a nga laha kusuhani. Yena i ta tivisa a Xipanze Xa Ku Lamulela Timhango kasi lava va tirako ka xona va tiva wuhombe ga xikarato lexo lezaku va nyika xivuno.
◼ Mimuri: Loku ku hi ni muri wo kari u nwako, u nga wu siyi hakuva u nga ta nyikiwa laha ka gotsovanyano.
◼ Zilato: I chukwana a ku boha zilato zo toloveleka zi ku tshamako khwatsi lezi zi to ku vumelela a ku famba khwatsi lomu zikadeni, ni kunwani.
◼ Maformulario Queira Visitar (S-43-T): Ku fanele ku tiriswa a maformulario Queira Visitar (S-43-T) kasi ku nyika mahungu xungetano hi munhu wihi ni wihi a kombisako kutsakela kota wuyelo ga kuxumayela ka hina hi xitshuketi hi xikhati xa gotsovanyano. A vahuweleli va fanele kuta ni formulario ginwe kutani mambiri gotsovanyweni. A maformulario lawa ma tatisilweko ma fanele ku yiswa ka Xipanze xa Mabhuku kutani ka matsalani wa bandla ga wena loku mu wuyile hi gotsovanyweni. — Wona a Wutireli Ga Hina Ga Mufumo ga Novembro wa 2009, phajina 4.
◼ Malulamiselo Ya Wutshamu Go Etlela: A Xipanze Xa Ku Rurela Vapfhumba xi sangula ku tira a gotsovanyano na wa ha hi kule nguvu kasi ku maha malulamiselo ya ku rurela vontlhe lava va kombelako wutshamu go etlela. A malulamiselo lawo ma engetela a litsako la kuva zinwe kota maKristu. Hambulezo, kota lezi hi lavako lezaku a “zilo zontlhe zi mahiwa hi fanelo ni nayo,” ni lezi ku patsekako a kutshamiseka ka vanwani, ka laveka a zikhumbuxeto zo kari. Lava va ta ngava vapfhumba mitini ya vamakabye va fanele ku xalaliswa hi lezi va nyikwako va tlhela va maha lezi va kombeliwako. Kambe alakanya a ku siya yindlu na yi basile siku ni siku legi u yako gotsovanyweni zinwe ni siku go gumesa legi u ta nga suka laha mutini wa makabye. A kuva mupfhumba mutini wa makabye a zi suseli munhu a wutihlamuleli ga ku ti lavela a zakuga zakwe wutsumbu ni mali yo khilela hi yona mova. Hikwalaho, a munwe ni munwani i fanele ku maha malulamiselo yakwe mhakeni leyi. A ku tirisana ni nwinyi wa muti mhakeni leyi zi ta maha lezaku a kombisa a kururela ka yena vapfhumba hi kuziranza, na ku nga hi hi kukurumetwa. Hi kufanana, lava va ta nga etlela laha wutshanwini ga gotsovanyano, vonawu va fanele ku tirisana ni vakombeteli lezaku va siya a wutshamu ga gotsovanyano na gi basile siku ni siku. — 1 Kor. 14:40.
◼ Ntiro Wa Kuziranza: A litsako leli hi li zwako hi kuva kona gotsovanyweni li tava la hombe nguvu loku hi ti nyikela hi kuziranza lezaku hi vunetela ka mitiro leyi yi lavekako. (Miti. 20:35) Ni wihi loyi a xuvako ku maha lezo i fanele ku bikela a Xipanze xa Vatiri va Kuziranza laha gotsovanyweni. A vanana va nga chikeliko ka 16 wa malembe vonawu va nga nyikela xivuno xo saseka hi ku tira na va wonelelwa hi vapswali kutani munhu munwani wa hombe a vumelelweko hi munwe wa vona.
◼ Kubapatizwa: Lava va yako kubapatizweni va fanele ku tshama wutshanwini legi gi vekelweko vona na wu nga se sangula a longoloko wa Mulongiso ni mixo. Vontlhe lava va yako kubapatizweni va fanele ku famba ni thawula ni tinguwo to hlamba hi tona ti kombisako xichawo. Ka zikhati zi hunzileko a vokari va bohile a tinguwo ti nga faneliko leti ti nga onha a wudzunzo ga ximaho lexi. A madota lawa ma kambisisako a ziwutiso zi nga ka bhuku Organizados ni lava va yako kubapatizweni ma fanele ku tiyiseka lezaku a munwe ni munwani wabye wa ti zwisisa a timhaka leti zinwe ni matshinya ya milayo ya Biblia lawa ma fambelanako nato.
[Tlhamuselo wa mifota ka phajina 5]
Hi Ta Avelisa Kuyini Zirambo?
Kasi hi tlhanganyisa a xipanze xa hina, hi nga lehisi mabhulo. Hi nga haku: “Gi cile. Nzi tela ku ta ku nyika a xirambo lexi lezaku uva kona ka mutlhangano wa hombe. U ta kuma manwani mahungu kwalaha.” A phajina go ranga ga xirambo gi koka kupima, hikwalaho mu nyike na a gi wona. Tlharihisa. Kumbheleni ka viki, u nga rivali ku nyikela marevista a xikhati lexi u nyikelako xirambo.