Zikhumbuxeto za gotsovanyano

◼ Zikhati za mutlhangano: A tivati ti ta vululiwa hi ma 7:00. A wucenje ga kusangula ka mutlhangano gi ta sangula hi 8:20 ka masiku wontlhe ya manharu. Ka xikhati lexo, hontlheni hi fanele ku tshama kasi a mutlhangano wu sangula hi ndlela yi nene. Hi Wazihlanu ni Mulongiso, a longoloko wu ta gumesa kwalomo ka ma 15:55. Hi Sonto wu ta gumesa kwalomo ka ma 14:45.

◼ ‘Dumisa Jehova hi tisimu’: A vanhu va Nungungulu va xikhatini xi hunzileko va wa dumisa Jehova hi tisimu, niku a wucenje ga ha simama kuva xipanze xa lisima xa wukhozeli ga lisine nyamutlha. (Tis. 28:7) A nzima yinwe ni yinwani ya gotsovanyano wa hina wa muganga yi sangula hi wucenje. A wucenje legi a gi mahelwi ku hunzisa xikhati ntsena, kanilezi gi longiselwa kasi hi gonza hi Jehova ni ku mu khozela. Hikwalaho, loku a mukhomi wa nzima aku a wucenje gi lava ku sangula, xikhati xa kuva hi tshama hi ingisela a wucenje lego hi kutsaka, wutshanwini ga ku bhula. Loku hi maha lezo hi komba lezaku ha nyika lisima a kutikarata ku mahiwako hi vamakabye lava va wumbako a ntlawa wa vachayi va tisimu ta Torre de Vigia. A vamakabye lava va xinuna ni va xisati va enza kumbiri hi lembe vaya Patterson, Nova York hi mali ya vona wutsumbu kasi ku ya hi longiselela a wucenje. Anzhako ka ku ingisela a wucenje legi, vontlhe va fanele ku suka va yima va dumisa Jehova hi ku yimbelela tisimu ta hina ta Mufumo.

◼ Wutshamu go veka mimova: Ka matshamu wontlhe ya gotsovanyano lawa hi nga ni wutshamu go veka mimova, ku nga ta hakhelwa nchumu. A mimova, mimota, kutani mibhasikeni, yi ta vekiwa hi xaxameto hi kuya hi loyi a rangako a chikela. Kota lezi a wutshamu gi nga gi tsongwani, zi wa tava chukwana a ku a vanhu va hlengela a mova wunwe hi laha zi kotekako ha kona.

◼ Ku vekisa wutshamu: Laha a tivati ti vululwako ka mixo ni mixo, maha wuxinji u nga ngheni hi kutsutsuma u ya lava ko tshama kona, a ku khwatsi wo palisana ni vatsombani-kuloni. Maha wuxinji u alakanyela vanwani, hambu ku tsika lezi zi nga zona u zi tsakelako hi kota ya vamakabye va hina. A moya wa kutikarata wu hi tivekisa kota maKristu ya lisine wu tlhela wu kuca lava va hi wonako lezaku va dumisa Nungungulu. (Joh. 13:34, 35; 1 Kor. 13:5; 1 Ped. 2:12) A wutshamu u nga vekela ntsena a vanhu lava u fambako navo moveni wunwe, mu hanyako muti wunwe, kutani u gonzako navo Biblia. Maha wuxinji u nga veketeli zilo ka wutshamu u kalako u nga vekeli munhu. Loku u maha lezo, a vanwani va ta zi wona lezaku a wutshamu lego a gi na munhu. A vakhosaheleko ni vababyako va vekelwe wutshamu ga vona. Kota lezi a wutshamu legi gi nga gi tsongwani, munhu munwe ntsena kutani vambiri va nga tshamako ni munhu a khosaheleko kutani a babyako kasi ku mu vuna.

◼ Maambalela ya xichawo: A maambalela ya hina gotsovanyanweni ma fanele kuva ma nene ni ya xichawo, ma nga kombisi a timoda ta tiko to hunzeleta. (1 Tim. 2:9) Hi ndlela leyo, hi tava ni matshanza ya ku boha a karaxa ga hina ga gotsovanyano hi tlhela hi ngavi na tingana ta ku nyikela wukustumunyu loku hi kuma lungelo. A kucuwukeka ka hina ni mahanyela ma nene migotsovanyanweni yi tako zi ta koka vanhu va timbilu ti nene lezaku vazwa a mahungu ya Biblia ma ponisako wutomi zi tlhela zi tsakisa Jehova. — Zef. 3:17.

◼ Matirisela ma nene ya tifone ni michini yinwani: Hi kombisa ku chela kota hi vanwani loku hi seta tifone ta hina kutani michini yinwani kasi yi nga colopeteli vanwani. Loku hi tirisa muchini wa ku susa mifota, ku thepa vidiyu, kutani muchini wunwani, hi fanele ku alakanyela vanwani hi ku nga va colopeteli kutani ku va valela. Hi kombisa matshamela ma nene kambe hi ku nga tsali timesaje kutani tiemail na ku nga hi na xilaveko xikhatini xa longoloko.

◼ Zifihlulo: Tanani ni za ku khomisa nyoka hi kaya kasi mu nga suki wutshanwini ga gotsovanyano mu ya xava kutani ku ya teka zakuga hi xikhati xa kuhumula. Mu nga ha tirisa nzhava wu tsongwani wu hlayisako zilo na zi titimela lowu wu enelako lahasi ka xitulo. A minzhava ya hombe nguvu ni zibya za vidro a zi vumelelwi wutshanwini ga gotsovanyano.

◼ Minyikelo: Hi nga kombisa ku bonga a malulamiselo ya gotsovanyano hi ku maha minyikelo ya kuziranza ya ku seketela a ntiro wa misava yontlhe laha gotsovanyanweni. A minyikelo yontlhe yi mahiwako hi xeke yi fanele ku tsaliwa lezaku yiya ka “Associação das Testemunhas de Jeová de Moçambique.”

◼ Mimuri: Loku ku hi ni muri wo kari u nwako, u nga wu siyi hakuva wu nga tava kona laha ka gotsovanyano.

◼ Zilato: I chukwana ku boha zilato zo toloveleka zi ku tshamako khwatsi lezi zi to ku vumelela a ku famba khwatsi.

◼ Maformulario Queira Visitar (S-43-T): Ku fanele ku tiriswa a formulario Queira Visitar (S-43-T) kasi ku nyika mahungu xungetano hi munhu wihi ni wihi a kombisako kutsakela kota wuyelo ga kuxumayela ka hina hi xitshuketi xikhatini xa gotsovanyano. A maformulario lawa ma tatisilweko ma nga nyikelwa ka Xipanze xa Mabhuku kutani ka matsalani wa bandla ga wena loku u wuyile hi gotsovanyanweni.

◼ Marestaurante: Ngha u nyika wudzunzo a vito ga Jehova hi mahanyela ya wena ya ma nene lomu restaurante. Ambala hi ndlela ya wuKristu. Nyikela mali ya kubonga loku zi tolovelekile.

◼ Malulamiselo ya wutshamu go etlela: A Xipanze xa ku Rurela Vapfhumba xi sangula ku tira na gotsovanyano wa ha hi kule kasi ku maha malulamiselo ya ku rurela vontlhe lava va kombelako wutshamu go etlela. A malulamiselo lawo ma engetela a litsako la kuva zinwe kota maKristu. Hambulezo, kota lezi hi lavako ku a “zilo zontlhe zi mahiwa hi fanelo ni nayo,” ni lezi ku patsekako a kutshamiseka ka vanwani, ka laveka zikhumbuxeto zo kari. Lava va rurelwako mutini wa makabye va fanele ku xalaliswa hi lezi va nyikwako va tlhela va maha lezi va kombeliwako. Alakanya ku siya a yindlu na yi basile siku ni siku u yako gotsovanyanweni zinwe ni siku go gumesa legi u sukako hi gona u ti yela kaya. A kuva mupfhumba mutini wa makabye a zi ku suseli wutihlamuleli ga ku ti lavela zakuga za wena wutsumbu ni mali yo khilela hi yona mova. Hikwalaho, a munwe ni munwani i fanele ku ti mahela malulamiselo yakwe mhakeni leyi. A ku tirisana ni nwinyi wa muti mhakeni leyi zi ta maha lezaku a rurela vapfhumba hi kuziranza, na ku nga hi hi kukurumetwa. Hi kufanana, lava va ta nga etlela laha wutshanwini ga gotsovanyano, vonawu va fanele ku tirisana ni vakombeteli lezaku va siya a wutshamu ga gotsovanyano na gi basile siku ni siku.— 1 Kor. 14:40.

◼ Ntiro wa kuziranza: Ni wihi loyi a xuvako ku maha ntiro lowo i fanele ku bikela a Xipanze xa Vatiri va Kuziranza laha gotsovanyanweni. A vanana va 16 wa malembe kuya hasi vonawu va nga nyikela xivuno xo saseka hi ku tira na va wonelelwa hi vapswali kutani munhu munwani wa hombe a vumelelweko hi munwe wa vona.