1. Xana Jehova i zi khatalelisa kuyini a zilaveko za moya za malanza yakwe?

¹ Jehova hi liranzo i khatalela a zilaveko za moya za malanza yakwe. Laha a tiko gontlhe gi nga ni ndlala ya za moya, hina hakunene haga khwatsi. (Isa. 65:13) A yinwe ndlela ya kuva Jehova a hi phamela hi tlhelo ga moya migotsovanyano ya hina ya muganga ya lembe ni lembe. Xana wa maha malulamiselo wontlhe kasi uva kona ka zipanze zontlhe za Gotsovanyano wa Muganga “Hi Rangelwa Hi Moya Wa Nungungulu”? Ka lulamiselwa a mubuzo wa moya wo nanziha nguvu ni wu nyikako lihanyo.

2. Zini zi patsekako ka ku longisela na ka ha hi mahlweni lezaku uva kona ka gotsovanyano?

² Longisela Na Ka Ha Hi Mahlweni: “A maalakanyo ya loyi a ti karatako ma pfunisa.” (Mav. 21:5) Hikwalaho, a xikhati lexi u mbhetiselako a kutilongisela ka wena lezaku uva kona ka masiku wontlhe ya manharu ya gotsovanyano, u nga hlweli ku wulawula ni mutholi wa wena loku ku laveka lezaku u kombela masiku yo kari ntirweni. Loku ku hi lezaku u ta lava wutshamu go etlela kona, xana u sina u mahile malulamiselo ya kona? U fanele kambe ku longisela a zifihlulo za wena kasi u kota kuga na u hi zinwe ni vamakabye va wena laha a gotsovanyano wu ta nga mahelwa kona. Maha malulamiselo ya lezaku u chikela na ka ha hi ni xikhati gotsovanyweni siku ni siku kasi u kuma wutshamu, u yimbelela a lisimu lo vulula u tlhela uzwa a mukhongelo wo sangula.

3. Tinguwo ta matshamela muni leti hi faneleko ku longa a ku boha?

³ Hi fanele ku ti karatela a ku boha tinguwo ti kombisako xichawo na ti hlayisekile. (1 Tim. 2:9, 10) A migotsovanyano ya muganga yi hi nyika lungelo ga gi nene nguvu ga ku nyika wukustumunyu xipanzeni. Hi ku tshama na hi ambalile khwatsi ka xikhati lexi hi to ngha hi hi xipanzeni lexi ku to mahelwa kona gotsovanyano zinwe ni ku boha a makaraxa ya gotsovanyano, hi ti hambanyisa nguvu ni vangakholwiko hi tlhela hiva xikombiso xi nene mahlweni ka lava va hi wonako.

4. Zini lezi zi ta nga hi vuna zinwe ni mingango ya hina lezaku hi vuneka nguvu hi longoloko?

⁴ Ingisela Khwatsi: Handle ko kanakana a hi lavi ku luza ni tlhatlha ginwe ka lezi zi to phamelwa ka mubuzo lowo wa moya! (Mav. 22:17, 18) A ku vulula maBiblia ya hina a xikhati lexi ku gonziwako a tinzimana ta Biblia hi tlhela hi tsala timhaka to koma leti hi lavako ku ti tirisa, zi ta hi vuna lezaku hi ingisela khwatsi handle ko hungateka. Zonake hi xikhati xa ni gambo, ha zi kota ku tirisa a timhaka leti hi tsalileko a xikhati lexi hi bhulako hi timhaka-tshinya ta longoloko ni vanwani. Ka malembe ya zalezinyana ku wonilwe lezaku a vanhu vaswa vo kari va tshama zinwe le gotsovanyweni va tlhela va bhula nzeni ka longoloko kutani ku tsalelana mahungu hi ku tirisa a titelefone selulari. Loku hi hi ni vanana, a ku patsa ni lava va nga tangeni yo rama, i chukwana nguvu a ku tshama navo hi ingisela a longoloko hi ngango wutshanwini ga ku vumelela a vanana va hina lezaku va hambana na hina va tshama ni vanhu vaswa vanwani.

5. Xana hi nga engetelisa kuyini a kunanziha ka mubuzo wa hina wa gotsovanyano?

⁵ Ti Tlhanganyise Ni Vanwani: A zakuga zi nanziha nguvu loku higa na hi hi ni vanghana. (Mav. 15:17) Hi kufanana, a kutlhangana ni vamakabye va hina zi engetela a kunanziha ka mubuzo wa hina wa gotsovanyano. Hikwalaho, a hi kutsakisa ka zona a ku ranga hi hina hi losa a vatsombani vanwani, hi ti tlhanganyisa navo loku a longoloko wu nyimile! (Tis. 133:1) A xikhati lexi a mukhomi wa xitshamu a hi rambako hi matsenya lezaku hi tshama a wucenje na gi nga se sangula, hi fanele ku gumesa a mabhulo ya hina hi ya tshama lezaku a longoloko wu sangula.

6. Hlawutela a tshango ga wena wutsumbu gi kombako lezi hi nga nyikisako zona wukustumunyu ka vanhu va wutshamu legi a gotsovanyano wu mahelwako kona.

⁶ Tlharihela Ku Xumayela: Hi tolovelo, a migotsovanyano yi na ni malungelo yo tala yo nyika wukustumunyu. A kutala ka vatsombani lava va yako mabazarini anzhako ka longoloko va tala ku wutisiwa hi vanhu xungetano hi hloko ya mhaka leyi yi nga laha ka karaxa ga gotsovanyano. Lezo zi yisa ka mabhulo zi tlhela zi nyika wukustumunyu gi nene ga zinene. A vo kari xikari ka lava va mahileko ziwutiso lezo va tlhelile va vumela a xirambo xa kuva kona ka zipanze za gotsovanyano.

7. Hikuyini hi fanele kuva kona ka gotsovanyano lowu wu tshinelako?

⁷ Ku mbhetiwa a tihora ta makume ya mazana lezaku ku longiselwa a longoloko, ku longisela wutshamu, ku xaxameta a zipanze za mitiro ya gotsovanyano, ni ku longisela a tikanelo. A mizamo yontlhe yi mahiwako hi liranzo kulongiseleni ka mubuzo lowu wa moya yi kombisa ndlela leyi Jehova a khatalelako ha yona a vanhu vakwe. Ngha hontlheni hiva kona hi tlhela higa hi laha hi zi kotako hi kona. A xikhati lexi hi mahako lezo, a ku hambana ni lezi a tiko gi zi mahako, hi ta “yimbelela hi kutsaka ka timbilu.” — Isa. 65:14.