Xana U Ti Longisele A Kuva Kona Mubuzweni Wa Moya?

1. Malulamiselo muni ma lavekako kasi ku maha a mubuzo?

¹ A ku longisela a mubuzo zi nyika ntiro wa hombe. Ku fanele ku xaviwa lezi zi to bhikiwa, zi bhikiwa zi nanziha, zonake zi phamelwa. A ku phamela zakuga ku fanele ku famba hi fanelo ni nayo. Ahandle ka lezo, a wutshamu legi a zakuga zi to gelwa ka gona gi fanele ku longiselwa. A vapfhumba vonawu va fanele ku ti longisela, nguvunguvu loku ku hi lezaku va ta famba pfhukanyana kasi ku chikela seyo. Hambu lezi zi nyikako ntiro wa hombe, a ku ti buza hi zakuga zo nanziha, zi nyikako lihanyo na u hi ni vanghana ni ziro za ngango, zi maha a ntiro lowo wu wuyelisa. Lokuloku, a Timboni ta Jehova misaveni yontlhe ti ta tlhangana hi mitlawa ya hombe ni ya yi tsongwani lezaku ti ti buza hi mubuzo wa moya lowu ti wu xuvako nguvu — ku nga Gotsovanyano wa Muganga “Tshamani Na Mu Rinzele!” Ku sina ku mahilwe a ntiro wa hombe kasi ku longisela a longoloko lowu wu mbhelela. Hontlheni ha rambiwa. Kasi hi zi kota kuva kona ni ku susa xivuno hi laha zi kotekako ha kona, hinawu wutsumbu hi fanele ku ti longisela. — Mav. 21:5.

2. Zini zi lavekako kasi uva kona ka mubuzo wontlhe wa moya?

² Vuneka Hi Laha Zi Kotekako Ha Kona: Xana u longisele zontlhe zi lavekako kasi uva kona ka mubuzo lowu wontlhe wa moya? Loku zi laveka, wulawula ni mutholi wa wena kasi u mu byela lezaku u tava kona ka zipanze zontlhe za gotsovanyano wa nwina, a ku patsa ni siku go sangula. U mahile malulamiselo ya mafambela ni ya lomu u to tshama kona? A madota ma fanele ku tiyiseka lezaku lava va khosaheleko ni va babyako zinwe ni vanwani va nga ha lavako xivuno va khatalelwe. — Jer. 23:4; Gal. 6:10.

3. Hikuyini hi nga faneliko kuya ka gotsovanyano wa matiko wontlhe wo kala hi nga rambiwangi?

³ Ka zipanze zinwani va ta ti buza hi migotsovanyano ya matiko wontlhe. Tshama na u alakanya lezaku ku rambilwe a mabandla yo kari ni vamakabye va matiko-wundle ka migotsovanyano leyo. A xikhati ku nga mahiwa malulamiselo lawo, a hofisa ya ravi yi alakanyele khwatsi lezaku vangani va faneleko ku rambiwa hi kuyelana ni ntsengo wa zitshamu ni tikwarutu ti nga kona lomu mahotela. Ku nga tshuka kuva ni kutlimbana ka vanhu loku a vahuweleli vaya ka gotsovanyano wa matiko wontlhe wo kala va nga rambiwangi.

4. Hi zihi a zikhumbuxeto zi to hi vuna a ku ti longisela kasi ku sangula a longoloko siku ni siku?

⁴ Ti longisele ku chikela gotsovanyweni na ka ha hi ni xikhati siku ni siku kasi u kuma wutshamu a longoloko na wu nga se sangula. Ka timeneti titsongwani a xipanze na xi nga se sangula, cuwuka a longoloko wu gandlilweko. Lezo zi ta ku vuna a ku longisela a mbilu ya wena lezaku u amukela a mahungu ma to kanelwa. (Ezra 7:10) Loku a mukhomi wa nzima a tivisa wucenje, gi ingisele khwatsi na u longile ku yimbelela lisimu lo sangula ni ku ingisela a mukhongelo wa ku vulula.

5. Xana a ngango wa hina wu nga vunekisa kuyini hi longoloko hi laha zi kotekako ha kona?

⁵ Loku a ziro za ngango munwe zi tshama zinwe gotsovanyweni, a vapswali va ta zi kota a ku maha vana vabye va ingisela khwatsi a longoloko. (Deut. 31:12) Vontlhe va kuciwa lezaku va lanzela ka maBiblia yabye a xikhati lexi a mitsalo yi gonziwako. A ku tsalatsala timhaka u to ti tirisa zi nga ha ku vuna a ku ingisela khwatsi a longoloko. Anzhako ka gotsovanyano a timhaka leto ti ta ku vuna a ku alakanya a timhaka-tshinya ta tikanelo. Zama ku potsa a ku wulawula handle ka xilaveko kutani ku fambafamba xikari ka longoloko. Loku u hi ni telefone selulari, u nga yi tsiki yi hambukisa a kupima ka wena kutani ka vanwani xikari ka longoloko. Anzhako ka nzima yinwe ni yinwani ya siku, hikuyini u nga bhuliko ni vanwani xungetano hi lezi zi ku tsakisileko ka longoloko?

6. Hi gihi a tshamela go hlawuleka ga migotsovanyano ya hina, niku xana hi nga gi lonzowotisa kuyini hi laha zi kotekako ha kona?

⁶ Le gotsovanyweni wa muganga, hi na ni lungelo ga ku ti tlhanganyisa hi ndlela yo hlawuleka ni vamakabye va hina, wu nga nchumu wu kalako nguvu tikweni. (Tis. 133:1-3; Mar. 10:29, 30) Hikuyini u nga ti maheliko makungo ya ku ti tivekisa ka lava va ta nga tshama kusuhani na wena u tlhela u bhula navo hi xikhati xa kuhumula? Legi ginwe ga mabhinzu ya kuta ni zakuga zitsongwani ni ku tshama laha a gotsovanyano wu mahiwako kona wutshanwini ga ku ya fihlula handle. Maha zontlhe lezaku u nga vumaleki ka lungelo lego ga ku tiyisana. — Rom. 1:11, 12.

7. Zini hi faneleko ku longisela xungetano hi tinguwo leti hi to ambala?

⁷ Maambalela: Zi na ni xigelo a kuva Jehova a layile a vaIsraeli lezaku va ti mahela a machakafula lomu magumo ka tinguwo tabye, va ma bohelela hi tingotana ta wukuxe. (Mitse. 15:37-41) Lexi xi wa hi xialakanyiso xi wonekako xa lezaku va wa hi vanhu va hlawulilweko kasi ku khozela Jehova. Inyamutlha, a tinguwo ti kombisako xichawo leti ti bohiwako xikhatini xa gotsovanyano ti hi hambanyisa ni tiko. Ti nyika wukustumunyu ga ntamu ka lava va hi wonako hambu loku hiya xava zakuga bazarini. Hikwalaho, alakanyela khwatsi na ka ha hi mahlweni xungetano hi tinguwo leti u to ambala.

8. Xana hi nga nyikisa kuyini wukustumunyu na hi hi xipanzeni lexi hi to khomela kona a gotsovanyano?

⁸ Nyika Wukustumunyu: Loku hi maha khwatsi a makungo ya hina, hi nga ha zi kota ku xumayela vanhu kwale xipanzeni lexi hi to khomela kona a gotsovanyano. A makabye wo kari a yileko a ya xava zakuga ni sati wakwe anzhako ka longoloko i lo xungeta a karaxa gakwe ga gotsovanyano zonake a wutisa a muxavisi: “Xana wa wona vanhu vo tala na va bohile a makaraxa lawa?” A muxavisi i te ngalo i wa va wonile kanilezi i wa ti wutisa lezaku ma wa wula yini. Lezo zi va yisile ka bhulo zonake makabye a ramba a muxavisi lezaku aya gotsovanyweni.

9. Hi nga kombisisa kuyini lezaku ha mu bonga Jehova, a Murureli wa hina?

⁹ Hambu lezi ku nga vamakabye va hina va ta nga veka tikanelo, kubhulisana, ni mikombiso, hi Jehova, a Dadani wa hina wa le tilweni, a Mululamiseli wa liranzo wa mubuzo lowu wa moya wa lembe ni lembe. (Isa. 65:13, 14) Hi kombisa kubonga a Murureli wa hina hi kuva kona siku ni siku ni ku lonzowota a zakuga zontlhe za moya zi to phamelwa. Xana u longisele zontlhe zi lavekako kasi ku maha lezo?

Zikhumbuxeto Za Gotsovanyano Wa Muganga

◼ Wutshamu Go Veka Mimova: Ka matshamu wontlhe lawa ku mahiwako gotsovanyano na hi hi ni wutshamu ga hina go veka mimova, ku nga ta hakhelwa nchumu niku a mimova yi ta vekiwa hi xaxameto hi kuya hi loyi a rangako a chikela. Kota lezi a wutshamu gi nga gi tsongwani, lava va nga ni mimova va fanele ku hlengela a mova munwe hi laha zi kotekako ha kona.

◼ Ku Vekisa Wutshamu: A wutshamu gi nga ha vekiselwa a vanhu lava u fambako navo moveni munwe kutani lava u tshamako navo mutini munwe.

◼ Zifihlulo: Mahani wuxinji mu neha a zifihlulo hi kaya kasi mu nga suki wutshanwini ga gotsovanyano lezaku mu ya xava kutani ku ya teka zakuga hi xikhati xa kuhumula ka ni hlikanhi. Mu nga tirisa minzhava yi tsongwani yo hlayisa zilo na zi titimela leyi yi enelako ku vekiwa lahasi ka xitulo. A minzhava ya hombe nguvu ni zibya za vidro a zi vumelelwi wutshanwini ga gotsovanyano. A ku na munhu a vumelelwako ku xavisa zakuga laha wutshanwini ga gotsovanyano.

◼ Minyikelo: Hi nga kombisa ku bonga a malulamiselo ya gotsovanyano hi ku maha a minyikelo ya kutiranzela yi yako ka ntiro wa misava yontlhe laha Salawu ya hina ya Mufumo kutani le gotsovanyweni. A minyikelo yontlhe yi mahiwako hi xeke yi fanele ku tsaliwa lezaku yiya ka “Associação das Testemunhas de Jeová de Moçambique.”

◼ Timhango Ni Timhaka Ta Xihatla: Loku ku humelela mababyi ya xitshuketi wutshanwini ga gotsovanyano, maha wuxinji u byela a mukombeteli a nga laha kusuhani, loyi a ta nga tivisa a Xipanze Xa Ku Lamulela Timhango kasi lava va tirako lomo va tiva wuhombe ga xikarato lexo lezaku va nyika xivuno.

◼ Zilato: I chukwana a ku boha zilato zo toloveleka zi ku tshamako khwatsi lezi zi to ku vumelela a ku famba khwatsi lomu zikadeni, ni kunwani.

◼ Ku Gravara: A zilo zontlhe zi gravarako a zi faneli ku tlhomekiwa ka tiwayela ta gezi kutani ka ta muchini wa pfumawulo lowu wu tirisiwako laha wutshanwini ga gotsovanyano. A zilo lezo zi nga ha tiriswa ntsena loku zi nga kamanyeti vanwani.

◼ Kubapatizwa: Lava va yako kubapatizweni va fanele ku tshama wutshanwini legi gi vekiselweko vona na wu nga se sangula a longoloko wa Mulongiso ni mixo. Vontlhe lava va alakanyelako a ku bapatizwa va fanele ku neha a thawula ni tinguwo to hlamba hi tona ti kombisako xichawo. Ka zikhati zi hunzileko a vo kari va wa bohile a tinguwo ti nga faneliko leti ti nga onha a wudzunzo ga ximaho lexo. A madota lawa ma kambisisako a ziwutiso zi nga ka bhuku Organizados ni lava va yako kubapatizweni ma fanele ku tiyiseka lezaku a munwe ni munwani wabye wa ti zwisisa a timhaka leti. A kubapatizwa kota xikombiso xa kutihendleleta i mhaka ya munhu wutsumbu leyi a yi mahako hi mbilu yontlhe xikari ka yena na Jehova.

◼ Maformulario Queira Visitar: Ku fanele ku tiriswa a maformulario Queira Visitar (S-⁠43) kasi ku nyika mahungu xungetano hi munhu wihi ni wihi loyi a kombisako kutsakela kota wuyelo ga kuxumayela ka hina ka xitshuketi hi xikhati xa gotsovanyano. A vahuweleli va fanele ku neha a formulario ginwe kutani mambiri ya Queira Visitar laha gotsovanyweni. A maformulario lawa ma tatisilweko ma fanele ku yiswa ka Xipanze Xa Mabhuku kutani ka matsalani wa bandla ga wena loku mu wuyile hi gotsovanyweni. — Wona a Nosso Ministério do Reino ga Fevereiro wa 2005, p. 6.

◼ Malulamiselo Ya Wutshamu Go Etlela: Kasi a gotsovanyano wa muganga wu famba khwatsi, ka mahiwa mitiro yo tala. A wunwe wa yona wu yelana ni ku lulamiselela wutshamu a vamakabye, ku ngava lava va tako voce kutani lava va tako hi mingango. Hi lisine, a Xipanze Xa Ku Rurela Vapfhumba xi sangula ku tira a gotsovanyano na wa ha hi kule nguvu kasi ku maha malulamiselo ya ku khatalela vontlhe lava va kombelako wutshamu go etlela. A malulamiselo lawo ma engetela a litsako la kuva zinwe kota maKristu.

Hambulezo, kota lezi hi lavako lezaku a “zilo zontlhe zi mahiwa hi fanelo ni nayo,” ni lezaku ku patseka a kutshamiseka ka vanwani, ka laveka a zikhumbuxeto zo kari. Lava va ta ngava vapfhumba mutini wa makabye wo kari, va fanele ku eneliswa hi lezi va nyikwako va tlhela va maha lezi va kombeliwako. Tiyiseka kambe lezaku wa siya a yindlu na yi basile a siku ni siku legi u yako gotsovanyweni zinwe ni siku go gumesa legi u ta nga suka laha mutini wa makabye. A kuva mupfhumba mutini wa makabye a zi suseli munhu a wutihlamuleli ga ku ti lavela a zakuga zakwe wutsumbu ni mali yo khilela hi yona mova. Hikwalaho, a munwe ni munwani i fanele ku maha malulamiselo yakwe mhakeni leyi. A ku tirisana ni nwinyi wa muti mhakeni leyi zi ta maha lezaku a kombisa a kururela ka yena vapfhumba hi kuziranza, na ku nga hi hi kukurumetwa. Lezo zi maha lezaku a “zilo zontlhe zi mahiwa hi fanelo ni nayo.” A tshinya legi ga nayo gi tira kambe ka lava va ta nga etlela laha a gotsovanyano wu ta nga mahelwa kona, vonawu va fanele ku tirisana ni vakombeteli lezaku va siya a wutshamu ga gotsovanyano na gi basile siku ni siku. — 1 Kor. 14:40.