‘A Ivangeli Leyi Yi Ta Kanelwa’!
1. Hi zi tivisa kuyini lezaku a ku na nchumu wu zi kotako ku nyimisa a ntiro wa kuxumayela?
1 A ku na nchumu ni wunwe wu zi kotako ku tsanzekisa Jehova a ku tatisa kuranza kakwe. (Isa. 14:24) Hambu lezi zi nga wonekisa ku khwatsi Mulamuli Gideoni zinwe ni vavanuna vakwe va 300 va wa nga ta zi kota a ku hlula a butho ga ntamu ga 135.000 wa vaMidiani, Jehova i te ngalo kakwe: ‘U ta hlanguta vaIsraeli mandleni ya vaMidiani. Kasi a nzi ku rumangi ke?’ (Vala. 6:14) Hi wihi a ntiro wu seketelwako hi Jehova inyamutlha? Jesu i te ngalo: “A ivangeli leyi ya mufumo yi ta kanelwa misaveni yontlhe.” (Mat. 24:14) I hava a to zi kota ku tsanzekisa a ntiro lowu lezaku wu tatiseka!
2. Hikuyini hi zi kotako ku rinzela lezaku Jehova a hi vuna hi munwe munwe wutirelini?
2 Jehova Wa Hi Vuna Hi Munwe Munwe: Hambu lezi hi nga ni kutsumba ko tiya ka ku Jehova i ta maha lezaku a Timboni takwe ti humelela kota ntlawa, xana hi nga rinzela ku vuniwa hi Jehova hi munwe munwe? Xikhatini lexi a nga hi kukaratekeni, mupostoli Paule i xi wonile a xivuno lexi Jehova a mu nyikileko yena wutsumbu hi ku tirisa N’wana wakwe Jesu. (2 Tim. 4:17) Hi kufanana, ha zi kota ku tiyiseka lezaku Jehova i ta katekisa a mizamo leyi hi yi mahako hi munwe munwe kasi hi tatisa a kuranza kakwe. — 1 Joh. 5:14.
3. Xana Jehova i hi vuna ka ziyimo muni?
3 Xana a mitiro ya wena ya siku ni siku ya ku karalisa laha ka kuza u nga ha zi koti ku maha nchumu wutirelini? “Wa nyika ntamu ka lava va rerekileko.” (Isa. 40:29-31) Xana wa xaniswa kutani ku kanetwa? “Rula a nzhwalo wa wena ka Jehova, i ta ku seketela.” (Tis. 55:22) Ka zikhati zo kari, xana wata na u mbhelelwa hi kutsumba? “Famba, mina nzi tava ni nomu wa wena.” (Ekso. 4:11, 12) Xana u yimisana ni mababyi lawa ma ku tsanzekisako ku maha zo tala wutirelini? Jehova wa nyika lisima a mizamo ya wena ya muhefemulo wontlhe niku wa zi kota ku yi tirisa na ku nga khataliseki a wutsongwani ga yona. — 1 Kor. 3:6, 9.
4. Xana a kuva ni kutsumba ka Jehova zi ta hi khumbisa kuyini?
4 A canja ga Jehova “gi nawulutilwe, himani a ta nga gi tlhelisa?” (Isa. 14:27) Kota lezi hi tiyisekako lezaku Jehova wa katekisa a wutireli ga hina, a hi yeni mahlweni hi xumayela hi kutiya na hi seketelwa hi wuhosi ga Jehova hi nga rereki. — Miti. 14:3.