Gidheyoni a hlula vaMidhiyani

Hi kufamba ka cikhati, a vaIzrayeli va no tlhela va mu fularela kambe Jehovha va sangula ku khozela vanungungulu va mawunwa. Hi cipimo ca 7 wa malembe, a vaMidhiyani va wa yiva zvifuyo zva vaIzrayeli va tlhela va hahlulela a masimu yabye. Kasi va pona vaMidhiyani, a vaIzrayeli va wa fihlala lomu ka timhako ni lomu zvitsungeni. Makunu va no kombela Jehovha lezvaku a va ponisa. Hikwalaho, Jehovha i no rumela ngilozi ka jaha ga ku hi Gidheyoni, yi yaku: ‘Jehovha i ku hlawulile lezvaku uva musochwa wa ntamu nguvhu’. Gidheyoni a yi wutisa, aku: ‘Ndzi nga va ponisisa kuyini a vaIzrayeli? Phela mina a ndzi wa nchumu’.

Gidheyoni i wa ta zvi tivisa kuyini ku Jehovha i langile yena? I no veka nguwo ya woya lahasi a byela Jehovha, aku: ‘Loku gica ni mixo a nguwo na yi tsakamile hi hunguva, kanilezvi lahasi na ku womile, ndzi ta zvi tiva lezvaku u ndzi langile kasi ku ponisa Izrayeli’. Ni mixo ya kona, a nguwo yi wa tsakamile kanilezvi lahasi ku wa womile! Hambulezvo, Gidheyoni i no kombela lezvaku ka mixo yi nga landzela, a kuma nguwo na yi womile, ku tsakama lahasi. A cikhati leci zvi nga maheka lezvo, Gidheyoni i no tekela ku kholwa lezvaku Jehovha i wa langile yena. I no tlhanganisa masochwa yakwe kasi va yalwa ni vaMidhiyani.

Jehovha i no byela Gidheyoni, aku: ‘Ndzi ta vhuna vaIzrayeli lezvaku va hlula. Kanilezvi, kota lezvi u nga ni masochwa yo tala nguvhu, mu nga tshuka mu alakanya lezvaku mu hlulile hi ntamu wa n’wina. Byela vontlhe lava va chavako lezvaku va tlhela kaya’. Hikwalaho, ku no tlhela 22 000 wa masochwa, ku sala 10 000. Jehovha a gumesa aku: ‘A masochwa lawo ma ha tele nguvhu. Famba nawo le cicongwaneni u ya ma byela lezvaku manwa mati. Sala basi ni lawa ma tonwa mati na ma cuwukisela valala’. Ku no sala 300 wa vavanuna basi; hi vona va nganwa mati na va ti wonela. Jehovha i no tsumbisa lezvaku a vavanuna lavo va va tsongwani va wa ta hlula a 135 000 wa masochwa ya vaMidhiyani.

Ni wusiku ga kona, Jehovha i no byela Gidheyoni, aku: ‘Ci chikele cikhati ca ku ya dhumela vaMidhiyani’! Gidheyoni i no nyika vavanuna vakwe a mimpundzu ni timbita ta hombe ti nga hi ni zvihlahle. A va byela lezvi: ‘Ndzi cuwukiseleni, mu gumesa mu maha zvalezvi ndzi to maha’. Gidheyoni i noba mpundzu, a faya mbita yakwe, a tlakusa cihlahle cakwe, a banguleka, aku: ‘Cipadha ca Jehovha ni ca Gidheyoni’! Vontlhe a vavanuna lava va 300 vonawu va no maha zvezvo. A vaMidhiyani va no chava nguvhu va tsutsuma va hangalaka matlhelweni wontlhe; va sangula ku vhukelana hi kuchava. Ka khati legi kambe, Jehovha i no vhuna vaIzrayeli ku va hlula valala vabye.