A Vatireli Va Makristu Va Fanele Ku Khongela
1. Xini xi lavekako kasi hi tatisa a wutireli ga hina?
1 A hi nge zi koti a ku tatisa wutireli hi ntamu wa hina. Hi Jehova a hi nyikako ntamu wa ku tira. (Fil. 4:13, NM) I tirisa a tingelosi takwe lezaku ti hi vuna a ku kuma vanhu lava va fanako ni tiyivu. (Kuv. 14:6, 7) Hi Jehova a mahako lezaku a timbewu leti hi byalako ni ku cheletela mati ti kula. (1 Kor. 3:6, 9) Za lisima nguvu lezaku a vatireli va maKristu va khegela ka Dadani wa hina wa le tilweni hi mukhongelo!
2. Hi zihi a zilo zo kari lezi hi faneleko a ku zi khongelela?
2 Ku Ti Khongelela Hina Wutsumbu: Hi fanele ku khongela zikhati zontlhe hi xumayelako. (Efe. 6:18) Hi zihi a zilo zo kari lezi hi faneleko a ku zi khongelela? Ha zi kota ku khongelela a mawonela ma nene xungetano hi xipanze xa hina ni ku khongelela kutiya. (Miti. 4:29) Ha zi kota ku kombela Jehova lezaku a hi kongomisa ka vanhu va timbilu ti nene lava kuzilava hi to gonza navo a Biblia. Loku a nwinyi wa muti a hi maha xiwutiso, ha zi kota ku maha mukhongelo wo koma lomu mbilwini hi kombela Jehova lezaku a hi vuna ku hlamula lezi zi faneleko. (Neh. 2:4) Ha zi kota kambe a ku kombela wutlhari kasi xikhati xontlhe hi rangisa wutireli wutomini ga hina. (Jak. 1:5) Tlhatakumbiri, Jehova wa xalala a xikhati lexi hi patsako a magezu ya ku bonga a lungelo ga kuva vatireli vakwe mikhongelweni ya hina. — Kol. 3:15.
3. Xana a ku khongelela vanwani zi anzisisa kuyini a ntiro wa kuxumayela?
3 Ku Khongelela Vanwani: Hi fanele ku “khongelelana” kambe, hambu ku kumbuka a vatireli-kulori hi mavito loku zi fanela. (Jak. 5:16; Miti. 12:5) Xana a mababyi ma ku tsanzekisa a ku maha zo tala ntirweni wa kuxumayela? Loku zi hi tano, khongelela a vatireli-kuloni lava va nga ni wutomi gi nene. U nga tshuki u kanyisa a ntamu wa mikhongelo ya wena leyi u va mahelako! Za fanela kambe a ku khongelela lezaku a wuhosi gi nga beleteli a ntiro wa kuxumayela kasi a vamakabye va hina va “hanya khwatsi ni ku tshameka.” — 1 Tim. 2:1, 2.
4. Hikuyini hi faneleko ku simama na hi tiyile kukhongeleni?
4 A ku xumayela a mahungu yo saseka misaveni yontlhe a hi xiavelo xo hlakana. Loku hi ‘simama hi tiyile kukhongeleni,’ hi ta tatisa a nitro lowu na hi vuniwa hi Jehova. — Rom. 12:12.