Zifananiso

Hi fanele ku ti zwisa kuyini xungetano hi zifananiso lezi kuzilava hi zi khozeleko kale?

Deut. 7:25, 26: “Zifananiso lezi zi vatlilweko za vanungungulu vabye mu ta hisa nzilweni; mu nga mbilukeli a siliva ni nzalama lezi zi nga ka zona, ni kambe u nga zi teki, zi nga maha ziyo ka wena, hakuva zona zinyenyeko mahlweni ka Jehova Nungungulu wa wena. Na wena u nga enghenisi xinyenyeko lomu ndlwini ya wena, ku nga taku u nyenyezawu kota zilo lezo; u ta zi nyenya nguvunguvu, mava manyala ka wena, hakuva za yila.” (Hambu lezi a vanhu va Jehova inyamutlha va nga vumelelwiko a ku fayetela a zifananiso zi lumbako vanhu vanwani, a xileletelo lexi xi ngaya ka Israeli xi nyika xikombiso xi faneleko ku lanzelwa xungetano hi lezi va faneleko ku xi wonisa zona a xifananiso xihi ni xihi va nga naxo lexi kuzilava va xi khozeleko. Ringanisa Mitiro 19:19.)

1 Joh. 5:21: “Vana vanga, chavani a zifananiso za vanungungulu va mawunwa.”

Ezek. 37:23: “Va nga ta ha ti nyenyezisa hi zifananiso zabye . . . Va tava vanhu va mina, mina nziva Nungungulu wabye.”

Xana a ku tirisa zifananiso kukhozeleni ku nga gi khumbisa kuyini a wumanziko ga hina?

Deut. 4:25, 26, BJ: ‘Loku mu ti vatlela zifananiso le’zi fananisako kani hi xihi xilo mu maha kubiha mahlweni ka Jehova Nungungulu wa nwina, mu mu zangarisa, hi siku lego nzi ta vitana a tilo ni misava a kuva vakustumunyu vo mu kecara, . . . mu ta lobyiswa hakunene.’ (A mawonela ya Nungungulu a ma cicangi. Wona Malaki 3:5, 6.)

1 Kor. 10:14, 20, BJ: ‘Hikwalaho varanzekako, chavani a ku khozela zifananiso . . . A miphahlelo leyi va yi nyikelako va phahlela madimoni, a va phahleli Nungungulu. A nzi zi ranzi lezaku mu hlengela ni madimoni.’

Kuv. 21:8: “A matoya, ni vangakholwiko, ni va manyala, ni vadayi, ni zibhayi, ni valoyi, ni vakhozeli va zifananiso, ni vontlhe vahembi, va ta kuma xiavelo xabye le tiveni legi gi vurako hi nzilo ni solufa; hi kona a kufa ka wumbiri.”

Tis. 115:4-8: “A zifananiso zabye i siliva ni nzalama, a mitiro ya mandla ya vanhu. Zi na ni milomu, kanilezi a zi wulawuli, ni mahlo zi nawo, kanilezi a zi woni. Zi na ni tindleve, kanilezi a zi ingisi; zi na ni tinhovu, kanilezi a zi nuheti; zi na ni mandla, kanilezi a zi weleli nchumu; ni mikonzo zi nayo, kanilezi a zi fambi; a zi wulawuli hi minkolo ya zona. Lava va zi mahako va ta fanana na zona; ni vontlhe lava va zi tsumbako.”

Kutlhatlheka

A xikhati lexi a vanhu va fularelako a milayo ya Biblia ya mahanyela, xana va kuma kutlhatlheka hakunene?

Rom. 6:16, 23: “Xana a mu zi tivi lezaku mu malanza ya nwinyi loyi mu ti nyikelako kakwe, mu maha malanza ya loyi mu mu ingisako, kutani ya kuonha loku ku yisako kufeni, hambu ya kuingisa loku ku yisako kululameni ke? . . . A hakhelo ya kuonha hi kufa, kanilezi a xinyikiwo xa Nungungulu hi wutomi ga pinzukelwa ha Jesu Kristu a Hosi ya hina.”

Gal. 6:7-9: “Mu nga ti khohlisi, Nungungulu a nga kalavisiwi; hakuva lezi munhu a xi byalako, xwalexo i ta xi tshovela. Hakuva loyi a byalelako a nyama yakwe, hi nyama i ta tshovela kubola; kanilezi loyi a byalelako a Moya, hi Moya i ta tshovela a wutomi ga pinzukelwa. Ngha hi nga karali a ku maha lezi zi nene.”

Mahanyela ma nene xungetano hi masango: “Loyi a bhayako i onhisa a miri wakwe.” (1 Kor. 6:18) “Loyi a bhayako ni wasati . . . i lovisa muhefemulo wakwe.” (Mav. 6:32) (Xungetano hi kuhlengelwa ka masango hi vanhu va xiro xa wubeleki xo fana, wona Va Le Roma 1:24-27.) (A masango ma nga hlazekangiko ma nga ha wonekisa ku khwatsi ma nanziha ka xikhati lexo. Kanilezi ma vanga mababyi yo nyenyeza, ku xura nyimba na zi nga laveki, kubhoxa nyimba, xiluse, livalo li karatekileko, kukarateka hi tlhelo ga kutizwa, ku nga amukelwi hi Nungungulu, loyi a kutsumba ka hina ka wutomi legi ga ha tako ku khegelako ka yena.)

[Magezu yo koka kupima ka phajina 5]