Timboni ta Jehova

Xana a Timboni ta Jehova vahluwuki kutani wukhongeli ga mikhuwo?

A vokari va tlhamusela a vahluwuki kota ntlawa wu ti pambulileko ka wukhongeli legi gi yimisilweko. A vanwani va tirisela gezu legi ka ntlawa wu lanzelako a murangeli wo kari kutani mugonzisi. Hi tolovelo a gezu legi gi tiriswa hi ndlela ya kusola. A Timboni ta Jehova a hi ravi ga chechi yo kari kanilezi ti patsa vanhu va ziyimo zontlhe za wutomi ni va humako ka wukhongeli go tsalangana. A ti khegeli ka munhu kanilezi ti tsumba Jesu Kristu kota murangeli wa tona.

A wukhongeli ga mikhuwo wukhongeli legi gi wuliwako ku ngalo a gi amukeleki kutani gi khanyisako a ku ti nyiketela maringano ni mikhuwo leyi yi yimisilweko. A wukhongeli go tala ga mikhuwo gi lanzela wurangeli ga munhu wa nyama, niku a kutala ka zikhati a vaseketeli va gona va hanya hi mitlawa yi ti hambanyisileko ni vanhu laha va yileko. Hambulezo, a xitiro xo tsumbeka xa ku pima lezi zi amukelekako xi fanele kuva Mhaka ya Nungungulu, niku a Timboni ta Jehova ti namarela ka Biblia hi kutsumbekileko. A wukhozeli gabye i ndlela ya mahanyela, a hi kutinyiketela ka mikhuwo. A ti lanzeli munhu ge hambu ku ti tsawukanyisa ni vanhu laha va yileko. Ti hanya ni ku tira xikari ka vanhu-kulobye.

Xana a wukhongeli ga Timboni ta Jehova ga rini?

Maringano ni Biblia, a xaxameto wa timboni ta Jehova wu sukela kwale nzhako ka Abeli wo tsumbeka. A bhuku ga Maheberu 11:4–12:1 gi ngalo: “Hi kukholwa Abeli i lo nyikela ka Nungungulu a muphahlelo wu nene ku hunza lowu wa Kana . . . Hi kukholwa Noa na a byelilwe hi Nungungulu hi zilo zi nga kala zi nga se woniwa, i lo ingisa . . . Hi kukholwa Abrahama i lo ingisa laha a nga vitanwa, a suka aya tikweni lego a ta nga ya nyikwa gona giva tshomba yakwe . . . Hi kukholwa Mosi loku a kulile, i lo ala ku vitanwa aku i n’wana nwaFaro; a ti hlawulela a kuva a xaniswa zinwe ni vanhu va Nungungulu, ku hunza kuva ni litsako la kuonha ka xikhatanyana . . . Hikwalaho kota lezi hi ranzelweko hi xidlemo xa hombe xa vakustumunyu, a hi hoxeni zontlhe lezi zi hi binzisako, hi tsika ni kuonha loku ku hi namarelako, hi tsutsuma hi kutiyisela a kusiyana loku ku vekilweko mahlweni ka hina.”

Loku gi wulawula hi Jesu Kristu, a Biblia gi ngalo: “Loyi a nga Amen, a kustumunyu a tsumbekileko ni wa zinene, a masangulo ya kuvanga ka Nungungulu, i ngalo.” I wa hi kustumunyu wa mani? Yena wutsumbu i te ngalo i wonekelisile a vito ga Dadani wakwe. I wa hi mboni ya Jehova ya hombe ka tontlhe. — Kuv. 3:14; Joh. 17:6.

I mhaka yi kokako kupima a ku wona lezaku a vaJuda va wutisile ku ngalo xana a ntiro wa Jesu Kristu wu wa hi “gonzo yiswa” ke. (Mar. 1:27) Hi nzhako ka xikhati, a vaGreki vo kari va lo alakanya lezaku mupostoli Paule i wo nghenisa a ‘gonzo yiswa.’ (Miti. 17:19, 20) Yi wa hi yiswa tindleveni ta lava va nga yizwa, kanilezi a xa lisima hi lezaku zi wa hi zinene zo zwanana hi kumbhelela ni Mhaka ya Nungungulu.

A matimu ya Timboni ta Jehova ya nguva leyi ma sangulile kuyimisweni ka ntlawa wa xigonzo xa Biblia le Allegheny, Pensilvânia, EUA, kusanguleni ka va 1870. A kuranga va wa tiviwa kota Zigonzani za Biblia, kanilezi hi 1931 va lo sangula ku tirisa a vito gi seketelwako Mitsalweni gaku Timboni ta Jehova. (Isa. 43:10-12) A tigonzo tabye ni mitiro a hi ziswa kanilezi kuvuxetwa ka wuKristu ga zana ga malembe go sangula.

Xana a Timboni ta Jehova ti kholwa lezaku a wukhongeli ga tona hi gona goce gi lulamileko?

A Biblia a gi vumelelani ni maalakanyo ya nguva leyi yaku ku na ni tindlela to tala ti amukelekako to khozela Nungungulu. A bhuku ga Va Le Efesusi 4:5 gi ngalo “a Hosi yinwe, a kukholwa kunwe.” Jesu i te: “A nyangwa ya wutomi yi hlonganile, ni ndlela yi yako kona yi khumile, mbatsongwani lava va yi kumako. . . . A hi vona vontlhelele lava va nge ngalo ka mina: Hosi, Hosi, va ta nga enghena mufunweni wa tilo; kanilezi sine loyi a mahako a kuranza ka Dadani wa mina loyi a nga le tilweni.” — Mat. 7:13, 14, 21; wona kambe 1 Va Le Korinte 1:10.

Hi kuphindaphinda, a Mitsalo yi wulawula hi ntlawa wa tigonzo ta Wukristu ga lisine kota “zinene.” A Wukristu gi vitwa ku i “ndlela ya zinene.” (1 Tim. 3:15; 2 Joh. 1; 2 Ped. 2:2) Kota lezi a Timboni ta Jehova ti seketelako ka Biblia tontlhe a tigonzo tabye, milayo ya mahanyela, ni mamahela ya zilo lomu hlengeletanweni, zinwe ni kukholwa kabye ka Biblia kota Mhaka ya Nungungulu, a ti kanakani ne ni kutsongwani lezaku hakunene ti na ni zinene. Hikwalaho a hi lezaku tova ni matshanza kanilezi ti kombisa a kutsumba ka tona ka lezaku a Biblia hi xona xitiro xo tsumbeka xa ku pima a wukhongeli ga munhu. A ti na makangwa kanilezi ti xuva nguvu a ku bhulela vanwani lezi ti zi kholwako.

Xana a wukhongeli ginwani a gi lanzeli a Biblia ke?

A go tala ga gi tirisa hi mpimo wo kari. Kanilezi, xana ga gonzisa ni ku maha lezi a Biblia gi zi wulako hakunene? Ehleketa hi lezi: (1) Ka wuhunzuluseli gabye ga Biblia hi kutala ka gona, va susile a vito ga Nungungulu wa lisine makume ya mazana ya makhati. (2) A gonzo ya Vanharu-munwe, ni lezi va nge va mu tivisa zona Nungungulu, zi lombiwa ka wuhedeni niku zi lo anziswa kala nyamutlha anzhako ka mazana ya malembe na Biblia gi mbhelile ku tsaliwa. (3) A gonzo yabye ya kungafi ka muhefemulo wa munhu kota xiseketelo xa kuhanya kala kupinzuka a yi kona lomu ka Biblia; a mitsu ya yona nja le Babuloni wa kale. (4) A hloko ya mhaka ya kuxumayela ka Jesu yi wa hi Mufumo wa Nungungulu, niku i lo ruma a vapizani vakwe lezaku va famba va bhulela vanhu hi munwe ni munwe xungetano ha wona; kanilezi a tichechi inyamutlha a ti tali ku kumbuka a Mufumo lowo niku a ziro za tona a zi mahi a ntiro lowu wa ku xumayela “a ivangeli leyi ya mufumo.” (Mat. 24:14) (5) Jesu i te ngalo a valanzeli vakwe va lisine va wa ta tekela ku tiviwa hi liranzo labye la kutikarata ka munwe ni munwani. Xana lezo za maheka ka wukhongeli ga Wukristu ga Mawunwa, laha a matiko yabye ma yako yimpini? (6) A Biblia gi wula lezaku a vapizani va Kristu va wa nga tava va tiko, gi tlhela gi tlharihisa lezaku wihi ni wihi a lavako kuva munghana wa tiko i ti maha nala wa Nungungulu; kanilezi a tichechi ta Wukristu ga Mawunwa ni ziro za tona va ti petile hi hloko timhakeni ta wupolitika ga matiko. (Jak. 4:4) Hi kota ya matimu lawo, xana i kona a nga wa ta wula na a tlhatlhekile lezaku va namarela ka Biblia hakunene?

[Magezu yo koka kupima ka phajina]