A Masimu Ma Te Xwe A Kuva Ma Tshovelwa
1. Hi wihi a ntiro wa lisima wu mahiwako kala nyamutlha?
1 Anzhako ka ku nyika wukustumunyu ka wasati wa muSamaria, Jesu i lo byela vapizani vakwe aku: “Tlakusani a mahlo ya nwina, mu cuwuka masimu, lezaku ma te xwe a kuva ma tshovelwa.” (Joh. 4:35, 36) A kutshovela ka moya ku wa sangulile, niku Jesu i wa gi wona na ka hi mahlweni a wukulu ga ntiro lowo wa misava yontlhe. Na a hi kwale matilweni, Jesu wa ha khomekile nguvu kutshoveleni. (Mat. 28:19, 20) Xini xi kombako lezaku a ntiro lowu wa ha simama ku kula a xikhati lexi wu yako magumo?
2. Zini zi kombako lezaku a kutshovela misaveni yontlhe ka ha simama ku anza?
2 Kutshovela Misaveni Yontlhe: Ka lembe ga ntiro ga 2009, ku vile ni kuengeteleka ka vahuweleli hi 3,2 wa tipursento misaveni yontlhe. Ka matiko lawa a ntiro wa kuxumayela wu beletelwako ku vile ni kuengeteleka hi 14 wa tipursento. A ntsengo wa zigonzo za Biblia wu bikilweko hweti ni hweti wu hunzile a 7.619.000 — wu nga ntsengo wo hunza a hlayo ya hombe ka tontlhe ya vahuweleli, niku a ntsengo lowu wu hunza a wa zigonzo zi bikilweko hi 2008 hi xipimo xo hunza a 500.000. A xikhati lexi a ntiro lowu wu anzako hi xihatla matikweni yo tala, ku amukelwa a zikombelo zo lava a varumiwa va gonzileko a Xikola xa Gileadi. A vanhu va wulawulako a tirimi ta matiko-wundle vonawu vaya mahlweni hi ku vumela a zinene matikweni yo tsalangana. Za dlunyateka lezaku Jehova i hatlisisa a ntiro lowu xikhatini lexi xa kugumesa ka kutshovela. (Isa. 60:22) Xana u na ni mawonela ma nene xungetano hi “masimu” lawa?
3. Xana a vokari va nga chikelela magumo wahi xungetano hi ntiro wa kutshovela zipanzeni zabye?
3 Kutshovela Xipanzeni Xa Wena: A vokari va nga ha wula lezi, “a xipanze xa hina a xi bhinzuli.” Lisine lezaku a zipanze zo kari zi wonekisa ku khwatsi a zi bhinzuli nguvu a ku fana ni zinwani kutani a ku pswala mihanzu a ku fana ni kale. Hikwalaho, a Timboni to kari ti nga ha chikelela magumo ya lezaku a kutshovela ku gumesile zipanzeni lezo ni lezaku ku no sala a ku kutsula ntsena. Xana lezo lisine?
4. Hi wahi a mawonela ma nene hi faneleko ku ma hlakulela niku hikuyini?
4 Kusukela kusanguleni kala magumo, a kutshovela i ntiro wa hombe. Hi nga wona a xihatla lexi xi lavekako hi ka magezu lawa ya Jesu: “A kutshovela ka hombe nguvu, kanilezi a zitiri zi tsongwani. Hikwalaho kombelani a Hosi ya kutshovela, lezaku yi rumela a zitiri kutshoveleni ka yona.” (Mat. 9:37, 38) Jehova, a Hosi ya kutshovela, hi yena a nga ni wutihlamuleli ga ku tiva a xikhati ni wutshamu legi ku tova ni pfuno. (Joh. 6:44; 1 Kor. 3:6-8) Hi gihi a wutihlamuleli ga hina? A Biblia ga hlamula: “Byala a mbewu ya wena na ga hi mixo, ni laha gambyeni u nga humuti a woko ga wena.” (Mutsh. 11:4-6) Ina, a xikhati lexi a kutshovela ku chikelako magumo ya kona yo hunza kontlhe, a hi xikhati xa ku loloha!
5. Hikuyini hi faneleko ku simama hi xumayela hi kuhiseka zipanzeni lezi zi wonekisako ku khwatsi a zi bhinzuli?
5 Simama Ku Tshovela: Hambu loku a xipanze xa hina xi tiriwa hi kukhanzakanya kutani loku zi wonekisa ku khwatsi a vanhu va kona a va vumeli, hi na ni xigelo xo zwala xa kuva hi tira hi xihatla ni kuhiseka. (2 Tim. 4:2) A kucicacica ka hombe ka zilo tikweni ku maha vanhu va cica a mawonela yabye zonake va alakanyela khwatsi hi wumanziko. Laha a vanhu vaswa va kulako, va nga ha wona a xilaveko xa ku kuma a kutshamiseka ni kurula maalakanyweni. A kusimama ka hina wutirelini ku nga ha hlamalisa vanwani. Ina, lava va nga kala ku vumela masikwini ma hunzileko kuzilava va nga ha demba ndleve. Hambu lava va alako a mahungu ya hina ha womu va fanele ku tlharihiswawo. — Ezek. 2:4, 5; 3:19.
6. Xini xi to hi vuna a ku tira hi kuhiseka loku a xipanze xa hina xi karata?
6 Xini xi to hi vuna a ku tira hi kuhiseka loku a xipanze xa hina xi karata? Hi nga engetela a kuxumayela ka hina hi muti ni muti hi matirela manwani yo kota ku nyika wukustumunyu hi telefone kutani matshanwini yo xavisa. Kuzilava hi nga cicacica a zingheniso za hina kasi hi sangula mabhulo hi tindlela tiswa. Hi nga ha cicanyana a longoloko wa hina kasi hi tira sinwini hi xikhati xa gambo kutani ka zikhati lezi a vanhu va talako ku ngha va hi mitini. Kuzilava hi nga ti karatela ku gonza a lirimi liswa kasi hi chikelela a votala ni mahungu yo saseka. Hi nga ha engetela a wutireli ga hina hi ku teka wuphayona ga xikhati xontlhe. A ndlela yinwani ku ya tira lomu a vatiri va kutshovela va nga va tsongwani. Loku hi hi ni mawonela ma faneleko xungetano hi kutshovela, hi ta ti karatela ku tira nguvu hi laha zi kotekako hi kona ntirweni lowu wa lisima.
7. Kala rini na ha ha simama ntirweni wa ku hlengeleta?
7 A varimi va na ni xikhati xi tsongwani kasi ku hlengeletela a mavele, hikwalaho a va humuli kutani ku loloha kala a ntiro wu mbhela. A kutshovela ka moya konawu ku lava xihatla xo fana ni lexo. Kala rini na ha ha simama ntirweni wa ku hlengeleta? Kala ku “chikela a kugumesa” ka mafambisela lawa ya zilo. (Mat. 24:14; 28:20) A ku fana ni Mutireli wa hombe wa Jehova, hi lava ku mbhetisa a ntiro lowu hi nyikilweko. (Joh. 4:34; 17:4) Hikwalaho, a hi simameni ku tira wutirelini ga hina hi kuhiseka, kutsaka, ni kuva ni mawonela ma nene kala magumo. (Mat. 24:13) A kutshovela a ku se mbhela!
[Magezu yo koka kupima ka phajina 2]
Kusukela kusanguleni kala magumo, a kutshovela i ntiro wa hombe