A Ntiro Wu Tsakisako Ku Hunza Yontlhe
1. Hi wihi a ntiro wa ku chuma vanhu hi tlhelo ga moya lowu wu mahekako masikwini ya hina?
1 Lava va wonileko a vanhu na va chumiwa mababyi ka zana ga malembe go sangula va lo tala hi kutsaka. (Luka 5:24-26) Masikwini ya hina, ha tsaka ntirweni wa ku chuma vanhu hi tlhelo ga moya. (Kuv. 22:1, 2, 17) A hi kutsakisa ka zona a ku gonza a matshango ya vanhu lava va hunzuluswako hi Mhaka ya Jehova ni moya wa ku basa! Hambulezo, lexi xi hi xalalisako nguvu ku hlengela ntirweni lowu hi ku fambisa a zigonzo za Biblia zi kulako hi tlhelo ga moya.
2. Hi lihi a litsako leli hi nga ha vako nalo a xikhati lexi hi gonzisako wokari a zinene?
2 Hi gihi a vito ga Nungungulu? Hikuyini a vumelelako kuxaniseka? Zini lezi a Mufumo wa Nungungulu wu to mahela vanhu? A hi tsakiswi ntsena hi ku hlamula a ziwutiso lezi, kanilezi hi ku wona a litsako la xigonzani a xikhati lexi xi gonzako a zinene. (Mav. 15:23; Luka 24:32) Laha a xigonzani xi kulako, xi nga ha sangula ku tirisa a vito ga Jehova, ku cica mabohela ni kutisasekisa, ku tsika mahanyela yo biha, ni ku sangula ku nyika wukustumunyu ka vanwani. Loku a xigonzani xi kula xiza xi ti hendleleta ni kubapatizwa, xi tava makabye wa hina tlhelo mutiri-kulori. A xinwe ni xinwani xa zigava lezi za zi nene xigelo xa kuva hi tsaka. — 1 Tes. 2:19, 20.
3. Hi wahi a mazambo hi faneleko ku ma maha lezaku hi sangula a xigonzo xa Biblia?
3 Xana U Nga Tirawu? Loku wenawu u lava ku maha a ntiro lowu wo tsakisa ku hunza yontlhe, kombela Jehova lezaku a ku vuna a ku kuma xigonzo xa Biblia, zonake u ti karatela ku maha lezi u kombeleko. (1 Joh. 5:14) Xumayela laha a vanhu va nga kona, hi xikhati lexi va kumekako hi xona. Zama ku sangula a xigonzo xa Biblia xontlhe xikhati zi fanelako. (Mutsh. 11:6) Laha u kumako kutsakela u tlhela u byala a mbewu ya zinene, tlhela u ya cheletela mati. — 1 Kor. 3:6-9.
4. Hikuyini hi faneleko ku sangula a zigonzo za Biblia hi xihatla?
4 Ka ha hi ni vanhu va tsanza-vahlayi va nga ni ndlala ni tora ga le’zo lulama. Himani a to va vuna a ku tima a tora lego ga moya hi ku va fambisela a xigonzo xa Biblia? (Mat. 5:3, 6) A hi ti nyiketeleni hi kuziranza lezaku hi vunetela kumbhetiseni ka ntiro lowu wa kuxumayela ni ku maha vapizani na kutshovela ku nga se gumesa. — Isa. 6:8.