Gonzisa A Vana Va Wena Lezaku Vava Vatireli
1. Xana a bhuku ga Tisimu 148:12, 13 gi kuca a vapswali va nga maKristu a ku maha yini?
1 Jehova i ramba vanana lezaku va mu dumisa. (Tis. 148:12, 13) Hikwalaho, a vapswali lava va nga maKristu a va gonzisi vana vabye a zinene za Biblia ni milayo ya Nungungulu ya mahanyela ntsena. Va tlhela va va gonzisa a kuva vatireli va mahungu yo saseka. Xana lezo zi nga mahiswa kuyini?
2. Xana a xikombiso xi nene xa mupswali xi nga va khumbisa kuyini a vana vakwe?
2 Xikombiso Xi Nene: Mulamuli Gideoni i lo byela a vavanuna vakwe va 300 aku: “Nzi cuwukeni, mu maha lezi nzi ta nga maha.” (Vala. 7:17) Hi ntumbuluko, a vanana va cuwukela a vapswali vabye va tlhela va pimanyisa lezi va mahako. A raru wo kari i tira ni wusiku, kanilezi wutshanwini ga ku humula loku a wuya kaya hi Mulongiso ni mixo, iya wutirelini ni vanana vakwe hambu lezi a kareleko nguvu. Handle ka mhaka, i va gonzisa lezaku a wutireli hi wona nchumu wo ranga wutomini. (Mat. 6:33) Xana a vanana va wena va ku wona na u hlengela zipanzeni zo hambanahambana za wukhozeli, zo kota kukhongela, kugonza Biblia, ku nyika mihlamulo ni kuxumayela? Kunene, u nga ta zi kota kuva xikombiso xo mbhelela. Kanilezi, a vanana va wena va ta byekelela nguvu a ku amukela a mizamo ya wena ya ku va gonzisa a ku khozela Jehova loku va wona a kutikarata ka wena. — Deut. 6:6, 7; Rom. 2:21, 22.
3. Hi yihi a mixuvo ya moya leyi a vapswali va faneleko ku vuna vana vabye lezaku va ti vekela ni ku yi tatisa?
3 U Nga Nyimi A Ku Va Vekela Mixuvo: A vapswali va kulula va nwatseka na va gonzisa a vanana vabye a ku famba, ku wulawula, ku boha ni zinwani. A xikhati lexi a vanana va kotako ku maha khwatsi lezi va gonzisilweko, va vekelwa a mixuvo yiswa. Loku a vapswali va hi maKristu, va vuna a vana vabye a ku ti vekela ni ku tatisa a mixuvo ya moya kambe maringano ni tanga yabye zinwe ni wuzikoti gabye. (1 Kor. 9:26) Xana wa gonzisa a vana va wena a ku nyika mihlamulo na va nga mahi hi ku lera, ni ku longisela ha voce a tikanelo ta Xikola xa Wutireli ga Nungungulu? (Tis. 35:18) Xana wa va gonzisa a ku nyika wukustumunyu hi tindlela to tsalangana? Xana wa va kuca a ku bapatizwa ni ku nghenela a ntiro wa xikhati xontlhe? Xana wa va tlhanganyisa ni vavangeli vo tsaka ni vo hiseka, lava va to va kuca lezaku vaya mahlweni? — Mav. 13:20.
4. Xana a vanana va vunekisa kuyini hi kuva ni vapswali lava va sangulako a ku va gonzisa lezaku vava vatireli na va ha hi vatsongwani?
4 A mutsali wa Tisimu i te ngalo: “Nungungulu, u nzi gonzisile kusukela wusweni ga mina, kala lezi nza tlhatlhambutela a mitiro ya wena yi hlamalisako.” (Tis. 71:17) Sangula a ku gonzisa vanana va wena lezaku vava vatireli na va ha hi vatsongwani. A xiseketelo xa moya lexi u vunako a vana va wena lezaku va xi aka handle ko kanakana xi ta va vuna wutomini gabye gontlhe. — Mav. 22:6.