A Hi Kombiseni A Kubonga Ka Hina A Xialakanyiso Xi Ta Mahiwa Hi 17 Ka Abril
1. Hi kwihi a kutizwa ka mutsali wa tisimu loku ku zwananako nguvu ni nguva ya Xialakanyiso?
1 Hi ku susumetiwa hi zimaho za Jehova zo tala za wuxinji ni kutlhatlhisa, a mutsali wa tisimu i lo wutisa aku: “Nzi ta mu tlhelisela yini Jehova, hi kota ya makatekwa wontlhe a nga nziha wona?” (Tis. 116:12) Inyamutlha, a malanza ya Nungungulu ma na ni xigelo xinwani xa ku bonga. Ka mazana ya malembe anzhako ka kutsaliwa ka magezu lawa ma pimisilweko, Jehova i lo nyika vanhu a xinyikiwo xa hombe ka zontlhe — wu nga nzhiho. Laha hi ti longiselako a ku alakanya a kufa ka Kristu hi 17 ka Abril, hi na ni xigelo xa hombe xa ku kombisa kubonga. — Kol. 3:15.
2. Hi zihi a zigelo zo kari zi hi mahako hi bonga a nzhiho?
2 Makatekwa Ma Nehwako Hi Nzhiho: Hi kota ya nzhiho, ha zi kota ku ‘tsetselelwa a zionho za hina.’ (Kol. 1:13, 14) Lezi zi hi vuna ku khozela Jehova na hi hi ni livalo li basileko. (Maheb. 9:13, 14) Ha zi kota ku wulawula na Jehova na hi tlhatlhekile a xikhati lexi hi mu tshinelelako hi mukhongelo. (Maheb. 4:14-16) Lava va kholwako ka nzhiho va na ni kutsumba ko hlamalisa ka wutomi ga pinzukelwa! — Joh. 3:16.
3. Hi nga kombisisa kuyini a ku mu bonga ka hina Jehova hi kota ya nzhiho?
3 Kombisa Kubonga: A yinwe ya tindlela ta ku kombisa kubonga ku lanzela a longoloko wa kugonza ka Biblia ka nguva ya Xialakanyiso siku ni siku hi tlhela hi alakanyela hi timhaka leto. A nzima yi nga ka A Sentinela ga 1 ka Fevereiro wa 2011 yi nga ni hloko ya mhaka “Você está preparado para o dia mais importante do ano?” yi mahelwe ku hi vuna a ku maha lezo. Ha zi kota kambe a ku byela Jehova hi mukhongelo wu humako mbilwini lezi hi wu nyikisako zona lisima a nzhiho. (1 Tes. 5:17, 18) A kuvakona ka hina Xialakanyisweni hi ku ingisa a xileletelo xa Jesu zi komba ku hi na ni kubonga. (1 Kor. 11:24, 25) Ahandle ka lezo, ha zi kota ku pimanyisa a liranzo la Jehova li nga gumelwiko hi ku ramba vanhu vo tala hi laha hi zi kotako hi kona lezaku va tava zinwe na hina. — Isa. 55:1-3.
4. Ku fanele kuva kwihi a kutiyimisela ka hina?
4 A malanza ya Jehova lawa ma zi tivako kubonga a ma woni a Xialakanyiso kota mutlhangano wunwani ntsena. A Xialakanyiso mutlhangano wa lisima a ku hunza yontlhe nzeni ka lembe! Laha a Xialakanyiso xi tshinelako, ngha a kutiyimisela ka hina ku fana ni ka mutsali wa tisimu loyi a nga tsala lezi: “Muhefemulo wanga, khesa Jehova, u nga rivali a mitiro yakwe yontlhe ya yi nene.” — Tis. 103:2.