A Hi Alakanyeni A Nzhiho Na Hi Hi Ni Kubonga
1, 2. Hikuyini hi fanele ku alakanya a nzhiho na hi hi ni kubonga?
1 Hi ku ingisa a xilayelo xa Jesu, a maKristu misaveni yontlhe ma ta tlhangana anzhako ka kupela ka gambo hi Mulongiso wa 22 ka Março wa 2008, lezaku ma alakanya a kufa ka Jesu Kristu. (Luka 22:19; 1 Kor. 11:23-26) Lexi xi hi kucako a ku maha lezo kubonga ka hombe loku hi nga nako hi kota ya zontlhe lezi zi tatisekileko hi siku lego, laha ku hunzako a 1.975 wa malembe. Hi ku hlayisa a kutsumbeka ko mbhelela kufeni ko bayisa laha mhanzeni ya xanisa, Jesu i basisile a vito ga Dadani wakwe a tlhela a nyika hlamulo wo mbhelela ka ziruko za Satani. — Joba 1:11; Mav. 27:11.
2 A nkhata wa Jesu lowu wu halatilweko wu tiyisile a xivumelwano xiswa, wu maha lezaku zi koteka ku a vanhu va nga mbhelelangiko va amukelwa kota vana va Nungungulu lava va nga ni kurinzela ka kuya va ya fuma zinwe na Kristu Mufunweni wakwe wa le tilweni. (Jer. 31:31-34; Mar. 14:24) Hi kuengetelekileko, a kueta ka liranzo la Nungungulu hi vanhu ku wonekile khwatsi hi ku nyikela a N’wana wakwe a ranzekako lezaku ava muphahlelo, kota lezi Jesu wutsumbu a tlhamuseleko Nikodemusi. — Joh. 3:16.
3. Xana lava va ta ngava kona Xialakanyisweni va ta vunekisa kuyini?
3 Ramba Vanwani: A Wutireli Ga Hina Ga Mufumo ga Janeiro gi hi kucile lezaku hi maha xaxameto wa vanhu lava hi tivanako navo hi tlhela hi va yela hina wutsumbu hi ya va ramba hi munwe ni munwe. Xana u sangulile a ku ramba lava va nga ka xaxameto wa wena? Xana wa maha malulamiselo ya lezaku u hlengela nguvu ka tsima legi gi ta nga sangula hi 1 ka Março ga ku ramba vanhu lezaku vava kona Xialakanyisweni? Lava va ta ngava kona va tazwa a mahungu ya lomu Mitsalweni lawa ma zi kotako ku va maha va kholwa ka nzhiho, lezi hi kugumesa zi yisako wutomini ga pinzukelwa. — Rom. 10:17.
4. Hikuyini hi faneleko ku chikela Xialakanyisweni na ka ha hi ni xikhati?
4 Vontlhe lava va zi kotako va fanele ku ti longisela lezaku va chikela na ka ha hi ni xikhati kasi va amukela hi matsenya lava va vumelako a xirambo lexi xo hlawuleka. Kota lezi a hlayo ya lava va vako kona Xialakanyisweni yi nga ya hombe, za lisima lezaku hi khatalela khwatsi lava va tako hi khati go sangula a ku patsa ni lava va tshukako vata mitlhanganwini.
5. Xana u nga yi longiselisa kuyini mbilu ya wena lezaku u vuneka hi Xialakanyiso?
5 Longisela A Mbilu Ya Wena: A Examine as Escrituras Diariamente — 2008 ni Calendário de 2008 zi na ni longoloko wa kugonza ka Biblia ko hlawuleka ka Xialakanyiso loku ku sangulako hi 17 ka Março. A ku ehleketa hi zilo za lisima lezi zi mahekileko nzeni ka masiku yo gumesa ya wutomi ga Jesu laha misaveni zi ta ku vuna lezaku u longisela mbilu ya wena kasi u vuneka hi Xialakanyiso. (Ezra 7:10) A ku alakanyela a mitlhatlhambutelo leyo ya lomu ka Biblia hi mukhongelo zi ta etisa a kubonga ka wena a liranzo leli Jehova ni N’wana wakwe va li kombisileko hi ku hi longiselela a nzhiho. — Tis. 143:5.
6. Xana a ku engetela a kubonga ka hina hi nzhiho zi ta hi khumbisa kuyini?
6 Kota lezi a Xialakanyiso xi tshinelako, ngha hi ti longisela khwatsi hi tlhela hi vuna vanwani lezaku va ti longiselawu kasi vava kona ka ximaho lexi xa lisima. A ku alakanya a nzhiho na hi hi ni kubonga zi ta tiyisa a kuzwanana ka hina na Jehova ni N’wana wakwe. (2 Kor. 5:14, 15) Zi ta hi kuca kambe lezaku hi va pimanyisa kukombiseni ka liranzo ka vanwani hambu loku zi lava lezaku hi ti tsona zo kari. — 1 Joh. 4:11.