Zirambo Za Xialakanyiso Lezi Zi To Avelwa Misaveni Yontlhe!
1. I tsima muni go hlawuleka legi gi to mahiwa misaveni yontlhe mahlweni ka Xialakanyiso?
1 “Mahani lezo, mu nzi alakanya ha zona.” (Luka 22:19) Kota ndlela ya ku lanzela a xileletelo lexi xa Jesu, a vakhozeli va Jehova va ta tlhangana zinwe ni vatsakeli hi 30 ka Março wa 2010, lezaku va alakanya a kufa ka Jesu. Kusukela 13 ka Março kala 30 ka Março ku ta avelwa a xirambo xo hlawuleka xa Xialakanyiso misaveni yontlhe.
2. Xana hi nga xi nyikelisa kuyini a xirambo?
2 Ndlela Yo Xi Nyikela: U nga ha nyikela a xirambo ka nwinyi wa muti lezaku a wona a phajina go sangula, zonake uku: “Hi 30 ka Março ni gambo, a vanhu va timiliyoni misaveni yontlhe va ta tlhangana lezaku va alakanya a kufa ka Jesu. Nzi tile laha kasi ku ta ku nyika a xirambo lexi lezaku wena ni ngango wa wena mu kumeka. Wa zi kota kuta ni vanghana va wena kambe. Wona a xikhati ni wutshamu legi a xialakanyiso xi to mahelwa kona.” Loku a xiyimo xi vumelela, u nga ha gonza Luka 22:19 lomu ka Biblia lezaku a wona a xileletelo lexo lomu Mitsalweni. Hambulezo, tshama na u alakanya lezaku kota lezi hi nga ni xikhati xi tsongwani kasi ku tlhanganyisa a xipanze xa hina, zi nene nguvu a ku nga lehisi bhulo.
3. Hi vamani hi nga ha va rambako?
3 Loku a bandla ga nwina gi hi ni xipanze xa hombe, a madota ma nga ha mu byela lezaku mu siya a zirambo mitini yi nga hiko na vanhu. Loku zi fanela, nyikelani a marevista zinwe ni zirambo. U nga rivali ku ramba lava u talako a ku va enzela, zigonzani za wena za Biblia, vatiri-kuloni, zigonzani-kuloni, maxaka, vaakelani, ni vanwani u tivanako navo.
4. Xana a kubonga ka hina a liranzo la Jehova la ku hi mahela malulamiselo ya nzhiho ku ta hi kuca a ku maha yini?
4 Ti Longisele Lezaku U Hlengela Nguvu: A nguva ya Xialakanyiso xikhati xi nene xa ku engetela a ntiro wa hina. Xana wa zi kota a ku xaxameta mitiro ya wena kasi u tira kota phayona go vunetela? Xana u na ni vanana kutani zigonzani za Biblia va kulako hi tlhelo ga moya? Loku zi hi tano, wulawula ni madota kasi ma kambela a vaswa lavo lezaku xana va ringanelwa hi ku hlengela tsimeni legi go hlawuleka kota vahuweleli va nga bapatizwangiko ke. A kubonga ka hina a liranzo la Jehova la ku hi mahela malulamiselo ya nzhiho ku ta hi kuca a ku ngavi kona ntsena Xialakanyisweni kanilezi ni ku ramba a vanhu vo tala hi laha hi zi kotako hi kona lezaku va tava zinwe na hina. — Joh. 3:16.