Tsima Go Hlawuleka Ga Ku Tivisa A Xialakanyiso!
1. Xini lexi a vahuweleli va Mufumo va to xi maha misaveni yontlhe kusukela 21 ka Março wa 2009, niku hikuyini?
1 Hi wa Wumune, 9 ka Abril wa 2009, a vakhozeli va Jehova Nungungulu misaveni yontlhe va ta tlhangana lezaku va alakanya a xikombiso xa hombe ka zontlhe xa liranzo lakwe hi vanhu. (Rom. 5:6-8) Hi xuva nguvu a kuva zinwe ni vanhu va timiliyoni lava va tsakelako a xikhati lexi hi to alakanya a kufa ka Jesu. Kusukela 21 ka Março, a misaveni yontlhe ku ta avelwa a xirambo xo hlawuleka xa lezaku ku yiwa Xialakanyisweni.
2. Hi tihi a timhaka u faneleko ku tshama na u ti alakanya a xikhati lexi u nyikelako a xirambo?
2 Lezi U Faneleko Ku Tshama Na U Zi Alakanya: Tirisa khwatsi a mifananiso, ziwutiso, ni mitsalo yi kumbukilweko laha ka xirambo. Hi xikombiso, u nga ha yisa kupima ka mufananiso wu nga ka phajina go sangula zonake uku: “Nzi tsakela a ku ku ramba lezaku u tava zinwe na hina ka mutlhangano wa kualakanya a kufa ka Jesu, lowu wu to mahiwa hi wa Wumune, 9 ka Abril wa 2009.” Anzhako ka lezo yisa kupima ka hloko ya mhaka ya xirambo ni ziwutiso zi lanzelako. Dlunyatisela a nwinyi wa muti lezaku i tlhatlhekile a ku ramba a ziro za ngango wakwe ni munhu wihi ni wihi loyi a ranzako kuta naye.
3. Xana u nga va khatalelisa kuyini lava va amukeleko xirambo xikhatini xa tsima?
3 Loku a bandla ga nwina gi hi ni xipanze xa hombe, a madota ma nga ha mu byela lezaku mu siya a zirambo mitini yi nga hiko na vanhu. Kumbheleni ka viki, nyikela a marevista zinwe ni xirambo. Ngha uva ni kungo ga ku ramba lava u talako ku va enzela, zigonzani za wena za Biblia, maxaka, zigonzani-kuloni, vatiri-kuloni, vaakelani, ni vanwani u tivanako navo. Ka lembe gi hunzileko, a makabye wo kari wa xisati i rambile a 30 wa maxaka yakwe zonake hi xikhati ni xikhati i waya na a va alakanyisa hi lisima la ximaho lexi. A hi litsako a vileko nalo hi lezi a 25 wa vona va vileko kona, niku a 4 wa vona va gumesile va vumela a xigonzo xa Biblia!
4. Malulamiselo muni hi faneleko ku ma maha zalezi, niku hikuyini?
4 Ti Longisele Zalezi: A vahuweleli vo tala va nga ha zi kota ku engetela a ntiro wabye hi Março ni Abril. Loku u hi ni vana kutani zigonzani za Biblia va kulako hi tlhelo ga moya, lexi xi ngava xikhati xa xi nene xa lezaku va maha vahuweleli va nga bapatizwangiko. Zalezi xikhati xa ku sangula ku maha malulamiselo ya lezaku u hlengela hi kumbhelela tsimeni legi gi tivisako a xialakanyiso xa zikombiso zimbiri za liranzo za hombe ka zontlhe. — Joh. 3:16; 15:13.