A Hi Tshuki Hi Kondla Mawoko
1. Hi zi tivisa kuyini lezaku a vavangeli va zana go sangula ga malembe a va zangi va kondla mawoko?
1 A vavangeli vo hiseka va zana ga malembe go sangula va wa nga ‘tsiki’ ku kanela a mahungu yo saseka kontlhe lomu a vanhu va nga kumeka kona. (Miti. 5:42) Hikwalaho, a hi nge alakanyi ku ngalo loku va famba hi muti ni muti va wo hunzetela vanhu maruweni na va nga va xumayelangi. Ne va wa nga tsiki a lungelo ga ku nyika wukustumunyu ga xitshuketi loku va hi kuxaveni ka zilo bazarini a xikhati va wuyako hi wutirelini. A ku fana na Jesu, cima a va kondlangi mawoko. — Mar. 6:31-34.
2. Xana a ku hanya hi kuyelana ni vito ga hina zi patsa yini?
2 Hi Tshama Na Hi Longile: A vito ga hina, ga Timboni ta Jehova, a gi tlhamuseli lezi hi zi mahako ntsena; gi tlhamusela a ku hi vamani. (Isa. 43:10-12) Hikwalaho hi tshama na hi longile ku wulawula hi kutsumba ka hina hambu loku hi nga fambi hi muti ni muti. (1 Ped. 3:15) Xana wa alakanyela a ziyimo lezi zi nga ku vumelelako ku nyika wukustumunyu ga xitshuketi u tlhela u ehleketa hi lezi u nga zi wulako? Xana wa tshama na u hi ni mabhuku kasi ku nyika lava va kombisako kutsakela? (Mav. 21:5) Xana u xumayela hi muti ni muti ntsena, kutani wa hangalasa a mahungu yo saseka ka vanhu va nga ka matshamela manwani, loku a xiyimo xi vumela?
3. Hikuyini a “kuvaleta” ku kalako ku nga hi kona ku nga gezu ga chukwana ga ku tlhamusela a ntiro wa ku xumayela lomu maruweni, lomu ku nyimako mimova, maparki, mabazarini ni kunwani?
3 A Hi Wukustumunyu Ga “Kuvaleta”: A kale hi wa tshuka hi tirisa a gezu “kuvaleta” kasi ku wulawula hi ku xumayela lomu maruweni, lomu ku nyimako mimova, maparki, mabazarini, ni kunwani. Kanilezi, a “kuvaleta” ku nga ha zwalisa ku khwatsi a mizamo leyo a hi ya tolovelo, kutani ya loku zi karata ku zi maha hi ndlela yinwani. Mupostoli Paule i wulile lezaku i wa kanela kubaseni ni hi muti ni muti. (Miti. 20:20) Hikwalaho a gezu wukustumunyu ga laha “kubaseni” gi wa tava chukwana kuhunza a wukustumunyu ga “kuvaleta.” Lisine lezaku a wutireli ga muti-ni-muti ga ha simama kuva ndlela ya tshinya ni yo bhinzula nguvu ka tontlhe ya ku chiketisela vanhu a mahungu ya Mufumo. Kanilezi, a vavangeli va zana ga malembe go sangula va wa veka kupima kabye vanhwini, na ku nga hi mitini. Va wa lonzowota a lungelo gihi ni gihi kasi ku wulawula hi zinene — laha kubaseni, hi xitshuketi, ni hi muti ni muti. Ngha hiva ni kupima kaloko kasi hi tatisa a wutireli ga hina hi kumbhelela. — 2 Tim. 4:5.