U Nga Zi Kota Ku Kustumunya Hi Xitshuketi!
1. (a) Xini a wukustumunyu ga xitshuketi? (b) Hi vamani xikari ka hina hi nga kona laha va zwileko zinene hi khati go ranga hi ku xumayelwa hi xitshuketi?
1 Vanhu vangani bandleni ga wena va ngazwa zinene hi khati go ranga hi ku xumayelwa hi xitshuketi? A ntsengo wabye wu nga ku hlamalisa. A wukustumunyu ga xitshuketi ku bhulela a mahungu yo saseka a vanhu lava hi kumanako navo mitirweni ya siku ni siku — na hi enza, na hi vuxela maxaka kutani vaakelani, na hi xava, kutani na hi hi xikoleni, ntirweni ni kunwani. Ka ntlawa wo kari wo hunza a 200 wa Timboni ti bapatizilweko, a 80 wa tona ti zwile a zinene hi khati go sangula hi ku xumayelwa hi xitshuketi! Hikwalaho, a maxumayelela lawa ma pswala mihanzu.
2. Hi zihi a zikombiso za wukustumunyu ga xitshuketi hi zi kumako lomu ka Biblia?
2 A vavangeli ka zana ga malembe go sangula va wa tolovela a ku kustumunya hi xitshuketi. Hi xikombiso, na a tsemakanya Samaria, Jesu i lo nyika wukustumunyu ka wasati a nga ti khela mati hlobyeni ya Jakobe. (Joh. 4:6-26) Filipu i lo sangula mabhulo ni nduna ya le Etiopia yi nga ti gonzela a bhuku ga Isaya hi ku wutisa lezi: “Xana wa zi pima lezi u zi gonzako ke?” (Miti. 8:26-38) Na a khotselwe le Filipi, mupostoli Paule i lo nyika wukustumunyu ka murinzeli wa paxo. (Miti. 16:23-34) Anzhako ka lezo, na a hi ndlwini yakwe leyi a nga valelwe ka yona, Paule i wa “amukela vontlhe lava va ngata kakwe, na a kanela hi mufumo wa Nungungulu, a gonzisa a timhaka ta Hosi Jesu Kristu.” (Miti. 28:30, 31) Wenawu u nga zi kota a ku kustumunya hi xitshuketi hambu loku u hi ni tingana. Hi ndlela muni?
3. Xini xi to hi vuna a ku hlula tingana?
3 Sangula Mabhulo: A votala xikari ka hina za va karatela a ku sangula mabhulo ni vanhu va nga va tiviko. Hambu a vanhu hi tivanako navo, a ku va byela zinene zi nga ha wonekisa ku khwatsi za wisa tingana. Hambulezo, hi ta kuceka a ku wulawula loku hi alakanyela hi wunene ga Jehova, hi titshomba ta moya leti a nyikileko a malanza yakwe, ni ku tiva lezaku a vanhu va lomu munyameni. (Jona 4:11; Tis. 40:5; Mat. 13:52) Tlhatakumbiri, ha zi kota ku kombela Jehova lezaku a hi tiyisa hlana. (1 Tes. 2:2) A xigonzani xo kari xa Gileade xi wulile lezi: “Nzi wonile lezaku a kutala ka zikhati a mukhongelo wa vuna loku zi nzi karatela a ku wulawula ni vanhu.” Loku u kanakana a ku sangula bhulo, maha mukhongelo wo koma wa lomu mbilwini. — Neh. 2:4.
4. Hi yihi a mixuvo leyi hi faneleko ku ranga hi yona hi ti vekela, niku hikuyini?
4 Kota lezi a vito gi kombako, a wukustumuyu ga xitshuketi a gi lavi lezaku hi sangula a mabhulo hi xingheniso kutani mutsalo wu longiselweko. Hi nga ha zi wona na zi hi chukwana a ku ti vekela a mixuvo ya ku sangula mabhulo handle ka ku tizwa na hi kurumeteka a ku nyika wukustumunyu zalezo. A vahuweleli vo tala va bika ku ngalo a zambo legi gi va tiyisa hlana lezaku hi kugumesa va nyika wukustumunyu. Loku munhu a nga zi lavi ku bhula, u nga mu kurumeti. Gumesa a bhulo hi ndlela yi nene zonake u ti fambela.
5. Zini zi vunako a makabye wo kari a ku kustumunya hi xitshuketi?
5 Na a hi kuxaveni le bazarini, a makabye wo kari wa xisati a nga ni tingana i sangula hi ku cuwuka munhu lomu nghoheni zonake a ku nwe. Loku a munhu loye yenawu a ku nwe, a makabye loyi o wula magezu ma tsongwani. Loku a munhu loye a hlamula hi ndlela yi nene, a makabye wa xisati i kuma xitiyisekiso xa ku yisa bhulo mahlweni. I ingisela khwatsi a tlhela a zama ku pola a mahungu yo saseka lawa ma to khumba mbilu ya munhu loye. Hi ku maha lezo, i nyikele mabhuku yo tala niku i zile a sangula xigonzo xa Biblia.
6. Xana hi nga gi sangulisa kuyini a bhulo hi xitshuketi?
6 Ndlela Yo Sangula Mabhulo: Xana hi nga wula yini kasi ku sangula bhulo? A xikhati lexi Jesu a nga bhula ni wasati le hlobyeni, i sangulile ntsena hi ku kombela mati ya kunwa. (Joh. 4:7) Hikwalaho, kuzilava hi nga zi kota a ku sangula bhulo hi ku losa munhu hi ndlela ya wunghana kutani ku mu maha xiwutiso. Laha mu yako mahlweni mu bhula, u nga ha kuma ndlela ya ku wula magezu yo kari ma nga Mitsalweni kutani hambu ku byala a mbewu ya zinene. (Mutsh. 11:6) A vokari va zi kota ku maha lezo hi ku wula magezu yo kari ma tlhotlhako maalakanyo lawa ma mahileko munhu a tsakela ku tiva zinwani. Hi xikombiso, a xikhati lexi u nga xipitali, u nga ha sangula bhulo hi ku wula lezi, “Nzi ta tsaka nguvu a xikhati lexi nzi to kala nzi nga ha babyi kambe.”
7. Xana a ku cuwukisa khwatsi zi ta hi vunisa kuyini a ku kustumunya hi xitshuketi?
7 A ku cuwukisa khwatsi zonawu zi ta hi vuna a ku tlhotlha mabhulo. Loku hi wona a mupswali a nga ni vanana va nga ni xichawo ha zi kota ku dzunza a mupswali loye zonake hi wutisa lezi, “Xini xi ku vunako a ku wundla khwatsi a vanana?” A makabye wo kari wa xisati i hlayisa a timhaka leti a vanwani va wulawulako hi tona ntirweni zonake a bhula ni vatiri-kulobye xungetano hi zilo zo kongoma lezi vona va khatalako hi zona. A xikhati lexi a nga tiva lezaku a wasati wo kari ntirweni wakwe i longisela ku chada, i lo mu nyika a Despertai! legi gi nga wulawula hi malongiselela ya muchado. Lezo zi lo vulula ndlela ya kuya mahlweni va bhulisana hi Biblia.
8. Hi nga ma tirisisa kuyini a mabhuku ya hina kasi ku sangula mabhulo?
8 A ndlela yinwani ya ku sangula mabhulo ku gonza a mabhuku ya hina na vanwani va hi wona. A makabye wo kari wa xinuna i tolovela ku vulula A Sentinela kutani Despertai! ka nzima yi nga ni hloko ya mhaka yi tlhotlhako maalakanyo zonake a sangula ku yi gonza hi gezu ga lahasi. Loku a wona wokari na a hlomela a marevista yakwe, yena i maha xiwutiso kutani ku tlhamusela timhaka to kari ti nga ka nzima leyo. Lezo zi tolovela ku yisa ka mabhulo ni ku nyikiwa ka wukustumunyu. A ku veka ntsena a ginwe ga mabhuku ya hina laha ka wutshamu go woneka zi nga maha a vatiri kutani zigonzani-kulori va wutisa zo kari.
9, 10. (a) Hi nga hlotisa kuyini a tindlela ta ku kustumunya hi xitshuketi? (b) U zi kotisa kuyini a ku maha lezo?
9 Hlota Tindlela: Hi kota ya lezi a ntiro wa kuxumayela wu faneleko ku mahiwa hi xihatla, a hi faneli ku wona a wukustumunyu ga xitshuketi kota nchumu lowu wu to halahala wu maheka. Kuhambana ni lezo, hi fanele hi ti karatela ku hlota tindlela ta ku nyika wukustumunyu a xikhati lexi hi mahako a mitiro ya hina ya siku ni siku. Ehleketa na ka ha hi mahlweni xungetano hi vanhu lava u talako ku kumana navo u tlhela u alakanyela a tindlela to sangula mabhulo hi wunghana. A Biblia zinwe ni manwani mabhuku ngha zi tshama kusuhi na wena kasi u zi tirisa a xikhati lexi u bhulako ni lava va kombisako kutsakela. — 1 Ped. 3:15.
10 Hi kuva vanhu vo tlhariha, a vahuweleli vo tala va zi kota ku kuma tindlela ta ku kustumunya hi xitshuketi. A makabye wo kari wa xisati a hanyako ka prediyu gi gadiwako nguvu i tirisa a wutshamu gi mahelweko mihlakano ka prediyu lego lezaku a khweleketela a zipanzana za zithombe lezi hi kugumesa zi to humesa a makwadru ya mifoto yo saseka ya ntumbuluko. A xikhati lexi a vanhu va nyimako va hlamala a mifoto leyo yo saseka, i tirisa a lungelo lego kasi ku sangula mabhulo zonake a va byela a xitsumbiso xa Biblia xa “tilo giswa ni misava yiswa.” (Kuv. 21:1-4) Xana wa zi kota ku alakanyela a mahlotela ya tindlela to kustumunya hi xitshuketi?
11. Xana hi nga khatalelisa kuyini lava va kombisako kutsakela a xikhati lexi hi kustumunyako hi xitshuketi?
11 Khatalela Lava Va Kombisileko Kutsakela: Loku u kuma wokari a kombisako kutsakela, ti karatele ku hlakulela a kutsakela kakwe. Loku zi fanela, u nga ha mu byela lezi: “Nzi tsakile nguvu hi ku bhula na wena. Hi nga kumana kwihi kambe lezaku hi bhula?” A vahuweleli vo kari va leletela lomu va tshamako kona va tlhela va nyikela a nombora ya telefone ka munhu loyi a kombisileko kutsakela zonake vaku: “A bhulo ga hina gi nzi tsakisile. Loku u lava ku tiva zinwani xungetano hi mhaka leyi, wa zi kota ku nzi lavetela.” Loku wena wutsumbu u nga zi koti a ku khatalela a kutsakela loko, maha malulamiselo ya lezaku a bandla ga xipanze lexi a hanyako ka xona gi mu enzela hi ku tekela ku nyikela a formulario Queira Visitar (S-43) ka matsalani wa bandla ga wena.
12. (a) Hikuyini hi faneleko ku tsala ni ku bika a xikhati lexi hi xi mbhetako na hi kustumunya hi xitshuketi? (b) Hi yihi a mihanzu ya wukustumunyu ga xitshuketi? (Wona a kwadru “A Wukustumunyu Ga Xitshuketi Ga Pswala Mihanzu!”)
12 A xikhati lexi hi mbhetako na hi nyika wukustumunyu ga xitshuketi xi fanele ku bikiwa. Hikwalaho, ti karatele a ku tsala a xikhati lexo, hambu loku kova timenetanyana u nga kustumunya hi siku. Hi nga wona lezi: Loku a vahuweleli vontlhe va wo kota ku kustumunya hi xitshuketi hi ntlhanu wa timeneti siku ni siku, ku wa ta engeteleka a xikhati xo hunza a 17 wa timiliyoni ta tihora hweti ni hweti!
13. Xini xi faneleko ku hi kuca a ku kustumunya hi xitshuketi?
13 Hi na ni xigelo xa hombe nguvu xa ku kustumunya hi xitshuketi — ku ranza Nungungulu ni muakelane. (Mat. 22:37-39) A timbilu ti teleko hi ku bonga a matshamela ya Jehova ni makungo yakwe ti hi kuca a ku wulawula hi ‘wukulu ga wudzunzo ga mufumu wakwe.’ (Tis. 145:7, 10-12) A kukhatala ka lisine hi vaakelani va hina zi hi susumeta a ku lonzowota a xikhati xontlhe lezaku hi va byela a mahungu yo saseka na xikhati xa ha vumela. (Rom. 10:13, 14) Hi ku ti karata ko kari zinwe ni ku ti longisela khwatsi, hontlheni hi nga zi kota a ku kustumunya hi xitshuketi hi tlhela hizwa a litsako la ku xumayela a munhu wa mbilu yi nene.
[Magezu yo koka kupima ka phajina 8]
U nga ha zi wona na zi hi chukwana a ku ti vekela mixuvo ya ku kuma vanhu u tlhela u sangula mabhulo
[Magezu yo koka kupima ka phajina 9]
Hi kuva vanhu vo tlhariha, a vahuweleli vo tala va zi kota ku kuma tindlela ta ku kustumunya hi xitshuketi
[Magezu yo koka kupima ka phajina 9]
Lezi Zi To Ku Vuna A Ku Sangula Mabhulo
◼ Maha mukhongelo kasi u zi kota ku sangula mabhulo
◼ Hlawula lava va nge ku khwatsi vanghana na va nga khomekangi
◼ Mu cuwukise lomu nghoheni u ku nwe, u wula zo kari zi mu tsakisako
◼ Demba ndleve
[Magezu yo koka kupima ka phajina 10]
A Wukustumunyu Ga Xitshuketi Ga Pswala Mihanzu!
• Na a rinzela a mova wakwe lezaku wu lungisiwa, a makabye wo kari i lo nyika wukustumunyu ka lava va nga hi kusuhani a tlhela a va nyika a zirambo za ku ta ingisela a kanelo wa laha kubaseni. Anzhako ka lembe, ka gotsovanyano wo kari, i lo losiwa hi makabye wo kari a nga mu tiviko. I wa hi munwe wa vavanuna lava a nga va nyikile a xirambo ka lembe gi nga hunza na rinzela a mova wakwe! A wanuna loye i wa yile a yazwa kanelo wa laha kubaseni a tlhela a kombela ku fambiselwa a xigonzo xa Biblia. Yena zinwe ni sati wakwe makunu va wa bapatizilwe.
• A makabye wa xisati a tivileko zinene hi ku xumayelwa hi xitshuketi i wona a vanhu lava a kumanako navo hi kota ya vanana vakwe va vanharu kota simu gakwe go hlawuleka. A simu gakwe gi patsa a vaakelani ni vapswali lava a kumanako navo xikoleni ka mitlhangano ya vapswali. Khati ni khati a va byelako a vito gakwe, i wula magezu ma tsongwani kanilezi ma khumbako mbilu ya lezaku a Biblia ga mu vuna nguvu a ku wundla vana vakwe, zonake a tlhavinyeta yinwani mhaka. Kota lezi makunu a sangulileko bhulo, i zi wona na zi olova nguvu a kuta ni Biblia ka makhati yo lanzela va to kumana kasi ku bhulisana. Hi ku tirisa a mahela legi, i vunile a 12 wa vanhu lezaku va bapatizwa.
• Laha a makabye wo kari wa xisati a nga enzelwa hi mutiri wa koponi ya maseguro, i lo lonzowota a lungelo lego kasi ku nyika wukustumunyu. A makabye i lo wutisa a mutiri loye lezaku xana wa lava a kuva ni seguro ya lihanyo li nene, litsako, ni wutomi ga pinzukelwa ke. I te ngalo ina, zonake a wutisa makabye lezaku i seguro ya lixaka muni a wulawulako ha lona. A makabye i lo mu komba a zitsumbiso za Biblia a tlhela a mu nyika a ginwe ga mabhuku ya hina. A mutiri loye i lo gonza bhuku lego gontlhe ka wusiku ginwe. Ku lo mahiwa malulamiselo ya xigonzo xa Biblia. I lo sangula kuya mitlhanganweni niku anzhako ka xikhati i lo bapatizwa.
• Na a kari a enza hi xihaha-pfhuka, a makabye wo kari wa xisati i lo sangula ku bhula ni wasati a nga tshamile kusuhani naye a tlhela mu nyika wukustumunyu. Loku va chikele lomu va ngaya kona, a makabye i lo nyika wasati loye a khero gakwe ni nombora yakwe ya telefone a tlhela a kuca a wasati loye lezaku a kombela ku fambiselwa xigonzo xa Biblia ka khati go lanzela a nga wa ta enzelwa hi Timboni ta Jehova. Hi manziko wa kona, a Timboni timbiri ti lo enzela a wasati loyi. I lo sangula ku gonza a Biblia, a kula hi tlhelo ga moya, a bapatizwa, niku xikhatanyana anzhako ka lezo i wa kari a fambisa zigonzo zinharu za Biblia ha yece.
• A makabye wa xinuna wa 100 wa malembe a nga xikhumu a hanyako mutini wa ku hlayisa zikhosana i tala ku wula lezi, “Hi lava a Mufumo.” Lezo zi maha lezaku a vadokodela ni vanwani vababyi va maha ziwutiso lezi zi mu vunako a ku va tlhamusela ku ngalo xini a Mufumo. A wasati wo kari a tirako laho i lo mu wutisa lezaku xana i ta maha yini Paradiseni. A makabye i lo hlamula aku, “Nzi ta wona nzi tlhela nzi kota ku famba, zonake nzi hisa a xitulo xa mina xa maroda.” Kota lezi a nga xikhumu, i kombela a wasati loye lezaku a mu gonzela marevista. Laha a nhanyana wa makabye loyi a nga ya mu vuxela, a mutiri loyi i lo kombela a nhanyana loye lezaku a mu vumelela ku famba ni marevista kaya. A dokodela wo kari i te ngalo ka nhanyana loyi, “A hloko ya mhaka ya yiswa mutini lowu hi leyi: ‘Hi lava a Mufumo.’”
• Laha a makabye wo kari wa xisati a nga rinzela ku xava zakuga laha restaurante i lozwa a ntlawa wa vamadala na va ti bhulela hi politika. A munwe wabye i lo wula lezaku a mufumo a wu zi koti a ku mbheta zikarato za hina. A makabye loyi wa xisati i lo sangula ku alakanyela, ‘Legi hi gona lungelo ga mina.’ I lo maha mukhongelo wo koma zonake a va tshinelela. Anzhako ka ku va losa, i lo va byela hi mufumo wo kari lowu wu to mbheta a zikarato za vanhu, ku nga Mufumo wa Nungungulu, a tlhela a va nyika a broxura a nga hi nago. Xwalexo xikhati a murangeli wa restaurante i lo va tshinelela. A makabye i wa alakanya lezaku i lava ku mu hlongola. Wutshanwini ga lezo, a murangeli i lo mu byela lezaku yenawu i wa kari a ingisela niku i lavawo broxura. A mutiri wo kari loyi yenawu a nga kari a ingisela i lo tshinela na a xililika mihloti. A kale i wa hi xigonzani xa Biblia niku i wa lava ku sangulisa kambe a xigonzo xakwe.