Xana U Longile A Ku Kustumunya Hi Xitshuketi?
1 A ku kustumunya hi xitshuketi ka zi kota ku bhinzula nguvu. A Biblia gi na ni zikombiso zo tala za wukustumunyu gi nyikilweko hi xitshuketi gi tlhela gi pswala mihanzu yi nene. (Joh. 4:7-15) Zini hi faneleko ku maha kasi hi ti longisela a ku kustumunya hi ndlela leyi?
2 Kuambala Ni Kutisasekisa: A ku khatalela kuambala ni kutisasekisa ka hina hi ndlela yi faneleko xikhati xontlhe zi ta hi vumelela a ku bhula ni vanwani xungetano hi kukholwa ka hina na hi tlhatlhekile. (1 Tim. 2:9, 10) Loku hiva ni tingana xungetano hi kucuwukeka ka hina, hi ta anda ku chava a ku nyika wukustumunyu. A kuhambana ni lezo, loku a tinguwo ta hina ti hlayisekile na ti basile, zi nga ha kuca vanwani a ku wutisa a xigelo xa zona. Hi xikombiso, a patswa wo kari wa Timboni wu nga kari wu enza wu tshamile kusuhani ni wanuna wa muMwinyi. Na a wona a kucuwukeka kabye, a wanuna loye i lo wutisa lezaku xana va wa hi maKristu ke. Lezo zi va yisile ka bhulo ga tihora tinharu xungetano hi Biblia.
3 Sangula Mabhulo: A xikhati lexi Jesu a nga tlhangana ni wasati wa muSamaria le hlobyeni ya Jakobe, i lo sangula a bhulo hi ku mu kombela mati ntsena. Hi kufanana, hi nga ha sangula a bhulo hi ku wula magezu yo koma kutani ku maha xiwutiso xo hehuka. Hambu lezi a zinwani zikhati zi kotekako a kuva hi kanakana, loku hi khegela ka xivuno xa Jehova, hi nga ha ‘tiya hlana’ lezaku hi sangula a bhulo. — 1 Tes. 2:2.
4 Hlota Tindlela: A vahuweleli vo tala va kari va kuma tindlela ta ku nyika wukustumunyu hi xitshuketi. Kambisisa a xiyimo xa wena u tlhela u alakanyela hi vanhu lava u tolovelako ku kumana navo siku ni siku. Tshama na u hi ni mabhuku ma faneleko zinwe ni Biblia ga lomu phaketini. Ngha u cuwukisa khwatsi, u tlhela u khatalela a vanhu va nga kusuhani na wena. Loku u ranga hi ku alakanyela a malungelo lawa u nga ha vako nawo nzeni ka siku, zi ta ku olovela a ku nyika wukustumunyu gi nene. — Fil. 1:12-14; 1 Ped. 3:15.
5 Hi na ni zigelo zimbiri za zi nene za kuva hi lonzowota a tindlela ta ku kustumunya hi xitshuketi — ku ranza Nungungulu ni muakelane. (Mat. 22:37-39) Hi kota ya xihatla xa ntiro wa kuxumayela, a ku kustumunya hi xitshuketi ku fanele ku mahelwa makungo. Hi fanele ku tshama na hi longile ku lonzowota a tindlela tontlhe ti faneleko kasi hi byela vanwani a mahungu yo saseka ya Mufumo na ka ha hi ni xikhati. — Rom. 10:13, 14; 2 Tim. 4:2.
[Ziwutiso za xigonzo]
1. Hi xihi a xikombiso xa lezaku a ku kustumunya hi xitshuketi ka zi kota ku bhinzula?
2. Xana a kuambala ni kutisasekisa ka hina zi nga hi vunisa kuyini a ku nyika wukustumunyu?
3. Hi ku lanzela a xikombiso xa Jesu, xana u sangulisa kuyini a bhulo?
4. Xana hi nga longisa kuyini lezaku hi nyika a wukustumunyu ga xitshuketi?
5. Hikuyini hi faneleko ku maha makungo ya ku nyika wukustumunyu ga xitshuketi?