Hina Hi Timboni Xontlhe Xikhati
1. Xana hi gonza yini ka tlhatlhambutelo wa wukustumunyu ga Jesu ka wasati le hlobyeni?
1 Jesu i wa fambile hi tihora to hlaya. I wa karele na azwa tora. A xikhati lexi a vapizani vakwe va ngaya va ya xava zakuga, i lo tshama laha hlobyeni le handle ka doropa go kari ga Samaria lezaku a humula. Jesu a nga hunzangi hi Samaria kasi ku xumayela; i wo ti hunzela ntsena na aya Galilea lezaku a yisa mahlweni a wutireli gakwe kwaseyo. Hambulezo, i lonzowota a xikhati lezaku a nyika wukustumunyu ka wasati loyi a nga kari a ti khela mati. (Joh. 4:5-14) Hikuyini? Hi lezaku Jesu cima a nga tsikangi kuva “kustumunyu a tsumbekileko” ya Jehova. (Kuv. 3:14) Hi pimanyisa Jesu hi kuva Timboni ta Jehova xontlhe xikhati. — 1 Ped. 2:21.
2. Xana hi nga ti longiselisa kuyini lezaku hi kustumunya hi xitshuketi?
2 Tshama Na U Longile: Ha zi kota ku tshama na hi longile ku kustumunya hi xitshuketi hi ku fambafamba ni mabhuku. A vahuweleli vo tala va tshama ni zitlukana lezaku va zi nyikela ka vatiri va zitolo, vatiri va lomu mabhombeni, ni vanwani va talako ku kumana navo nzeni ka siku. (Mutsh. 11:6) A makabye wo kari wa xisati a enzako hi kukhanzakanya i maha zontlhe lezaku a xikhati xontlhe a fambafamba ni Biblia gakwe ga lomu phaketini ni bhuku A Biblia Gi Gonzisako lomu ka xipachi xakwe, a tlhela a ti karatela ku sangula mabhulo ni lava va tshamako kusuhani na yena.
3. Xana hi nga sangulisa kuyini a bhulo?
3 Sangula A Bhulo: A xikhati lexi hi kustumunyako hi xitshuketi, a hi na xikurumeta xa ku sangula a bhulo hi timhaka ta lomu ka Biblia. Jesu a nga sangulangi a bhulo gakwe ni wasati le hlobyeni hi ku ti tivekisa kota Messia. Yena i lo kombela a mati ya kunwa ntsena zonake a wasati loye a sangula ku hlamala. (Joh. 4:7-9) A makabye wo kari wa xisati i wonile lezaku a ku maha lezo zi mu vuna a ku sangula a bhulo loku a wutisiwa ku ngalo xana i gile khwatsi a khisimuso yo kari ke. A wutshanwini ga ku hlamula lezaku a nga gangi hi lezi a nga munwe wa Timboni ta Jehova, yena i ngalo, “Nzi lo ti hlawulela a ku nga yigi.” A kutala ka zikhati, loyi a wutisako i lava ku tiva a xigelo xa kona, lezi zi nyikako a makabye loye wa xisati a lungelo ga ku kustumunya.
4. Hikuyini a bhuku ga Mateu 28:18-20 gi ku kucako?
4 Hambu lezi Jesu a gumesileko a wutireli gakwe go hisa laha misaveni, yena wa ha simama ku khatalela nguvu lezaku a ntiro wa kuxumayela wu mahiwa kota lezi a zi mahileko. (Mat. 28:18-20) Hikwalaho, a ku fana ni Xikombiso xa hina, Jesu, hina hi Timboni ti longileko ku huwelela a kutsumba ka hina xontlhe xikhati. — Maheb. 10:23.