Engetela wutlhari ga wena wutirelini — Sangula bhulo na u hi ni kungo ga ku nyika wukustumunyu ga xitshuketi
Hikuyini zi nga za lisima? A xikhati lexi hi xumayelako hi muti ni muti, a kutala ka zikhati a hi va kumi a venyi va miti. Hambulezo, hi nga va kuma lomu mixapeni, na va rinzela dokodela, na va kari va humula laha ntirweni kutani xikoleni, ni ka matshamu manwani. A kuranza ka Jehova hi lezaku a vanhu vontlhe vava ni lungelo ga kuzwa mahungu ya Mufumo. (1 Tim. 2:3, 4) A kutala ka zikhati, kasi hi nyika wukustumunyu, hi fanele ku ranga hi hina hi sangula bhulo.
Mamahela ya kona:
• Tiva wa ku mu xumayela. Xana a munhu loye wa kombisa wunghana ni ku tsakela ku bhula? Xana a xiyimo xa vumela lezaku muva ni mabhulo yo rula? A vahuweleli vo kari va sangula hi ku cuwuka lomu nghoheni ya munhu loye zonake va nwayitela. Loku yenawu a nwayitela, va zama ku sangula bhulo.
• Loku u chava ku sangula bhulo, maha mukhongelo wo koma hi lomu mbilwini. — Neh. 2:4; Miti. 4:29.
• Sangula hi mabhulo yo koma, kuzilava hi ku mu losa ntsena. Jesu a nga sangulangi a mabhulo yakwe ni wasati wa muSamaria hi ku bhula hi Mufumo. (Joh. 4:7) Ka zikhati zinwani a mabhulo ma nga ha sangula hi kudzunza ko kota loku: “E, a vana va wena a vo ko tiva!” A ku maha xiwutiso i ndlela yinwani yo sangula bhulo: “Xana u ma wonile a mahungu ma haxilweko matolo?”
• Zalezo mu sangulileko ku bhula, hlota ndlela ya ku sangula ku mu bhulela a mahungu yo saseka, kanilezi u nga mahi matloti. Tsika bhulo gi famba hi ndlela yi nene. Kuzilava u nga ha wula zilo zo kari lezi zi nga ha mu mahako a wutisa zokari. Hi xikombiso, loku a bhulo gi yelana ni ngango u nga ha wula lezi: “Nzi kumile a wusungukati go tsumbeka ga mawundlela ya vana.” Loku mu kari mu wulawula hi mhaka yokari ya lomu ka phepha-hungu go kari, u nga ha wula lezi: “Nzi tsakisilwe nguvu hi ku gonza mahungu yo kari ya ma nene ya zezanyana ma wulawulako hi kucica.” U nga mbheli ntamu loku a bhulo gi mbhela na u nga se nyika wukustumunyu.
• Fambafamba ni ziphephana kutani mabhuku manwani kasi ku nyika ni wihi a kombisako kutsakela.
Ka hweti leyi, ringisa lezi:
• Viki ni viki ti karatele ku sangula bhulo ni munhu munwe hi wutsongwani ga kona na u hi ni kungo ga ku nyika wukustumunyu ga xitshuketi.