Ti wonele lezaku u ngabi mheho
1. Xana a bhuku ga 1 Va Le Korinte 9:26 gi tirisa kuyini wutirelini?
1 Mupostoli Paule i tsalile lezi: “Mina nza tsutsuma na ku nga hi nyamutsutsume, lezo nzalwa, na ku nga hi ku khwatsi nziba mheho.” (1 Kor. 9:26) Laha Paule i wa wulawula hi ku veka kupima kakwe kontlhe kutatiseni ka mixuvo ya moya. Hambulezo, a timhaka leti ta tira kambe ni ka wutireli. Kota lezi hi nga zi laviko ‘kuba mheho,’ hi ti karatela ku bhinzula khwatsi hi laha zi kotekako hi kona. Hi ndlela muni?
2. Xana hi nga mu pimanyisisa kuyini Paule ni vanwani vavangeli va zana ga malembe go sangula xungetano hi ku hlawula a xikhati ni wutshamu ga ku ya xumayela kona?
2 Yana lomu a vanhu va nga kona: Paule ni vanwani vavangeli va zana ga malembe go sangula va wa xumayela lomu va nga alakanya lezaku ku wa hi ni vanhu. (Miti. 5:42; 16:13; 17:17) Hikwalaho, loku a votala xipanzeni xa hina va kumeka mitini ni gambo, kuzilava lexo xi ngava xikhati xa chukwana xa ku tira hi muti ni muti. Xana ka tala nguvu lomu maparajini ya mixapa ni mixo kutani ni gambo laha a vanhu va yako ntirweni kutani va wuyako kaya? Xana a vanhu va tala nguvu bazarini kutani zitolo hi xikhati muni? Kuzilava a wukustumunyu ga lomu maruweni gi nga bhinzula nguvu ka zikhati lezo.
3. Hi nga potsisa kuyini kuba mheho hi lezi hi tirisisako zona xipanzeni lexi hi avelweko?
3 Xumayela hi wutlhari xipanzeni lexi u avelwako: Hi fanele ku tlhela hi ti wonela lezaku hi ngabi mheho loku hi kari hi xumayela xipanzeni lexi hi avelweko. Hi xikombiso, a wutshanwini ga ku famba na hi hi ntlawa wa hombe ka wutshamu ginwe, laha zi to lava a ku hi ti tsitsirita kasi ku wonelela khwatsi a ntlawa lowo, i chukwana ku va avanyisa hi mitlawa yi tsongwani. Hi kufanana, loku hi kari hi tira handle ka doropa, hi ta hatla hi mbheta a xipanze xa hina hi tlhela hi wulawula ni votala loku a mitlawa yi nga hi ya hombe nguvu. Ahati loku ho kombela ku avelwa xipanze xa ku xumayela ka xona kusuhani ni kaya ka hina? Lezo zi nga hungula a xikhati hi xi mbhetako na hiya xipanzeni lexi hi to tira ka xona.
4. Xini xi to hi vuna a kuva “vakukuti va vanhu” vo humelela?
4 Jesu i ringanisile a vavangeli ni “vakukuti va vanhu.” (Mar. 1:17) A kungo ga mukukuti a hi ku kukuta ntsena kanilezi ku khoma tinjhanjhi. Hikwalaho, a vakukuti vo humelela vaya lomu va alakanyako lezaku ku na ni tinjhanjhi hi xikhati xi faneleko va tlhela va tekela ku sangula ku kukuta. Hi ndlela leyo a vabi mheho. Ngha hinawu hi kombisa a kupinyama loko wutirelini ga hina. — Maheb. 6:11.