Papilo Ga Hubye yi Fumako
Timboni-kulori ta Jehova ti Ranzekako:
Hi mu tsalela hi litsako la hombe nwina malanza yo tsumbeka ya Jehova ma ranzekako, zalezi mu nga hlayo yi hunzako a ntlhanu wa timiliyoni ni timbiri. Loku mu tlhangana ni mukholwa-kuloni wa tlhelo ginwani ga misava, mu tekela ku kokelwa ka yena hi liranzo lo hlawuleka. (Joh. 13:34, 35) Handle ko kanakana a xikhati mu to gonza a Anuário, mu ta tlhela muzwa a liranzo lelo lo hlawuleka ka mitlhatlhambutelo yo koka mbilu ya kukholwa ni kutsumbeka ka vamakabye va nwina va matiko yo hambanahambana.
A mibiko yi tako hi ka matlhelo wontlhe ya misava yi komba lezaku a kutala ka nwina ma wona a Wukhozeli ga Ngango kota longoloko wa lisima. Lava va nga ni vanana va tsongwani va tirisa wutlhari kasi ku koka kupima ka vana vabye. (Efe. 6:4) A mipatswa ya tshinelelana hi ku gonza zinwe. (Efe. 5:28-33) Hakunene, kani kova munhu a hanyako yece kutani mingango, vontlhe va vuneka hi lulamiselo legi ga kuva ni xigonzo xo eta xa Mhaka ya Nungungulu. — Jox. 1:8, 9.
A timbilu ta hina ta mu karatekela nwina nwentlhe mu xanisekako hi kota ya kulahlekelwa ku vangilweko hi timhango ta ntumbuluko ti nga humelela zezanyana. Hi lava ku lonzowota a xikhati lexi kasi ku mu bonga nguvu nwina lava mu nga kala ku maha mihoni lezaku mu ya hlengela kulamuleni ka timhango xikhatini xa zikarato lezo. (Miti. 11:28-30; Gal. 6:9, 10) Ahandle ka lezo, ka bandla ginwe ni ginwani, ku na ni lava va alakanyelako a zilaveko za vamakabye va hina va tlhela va va vuna hi matsenya. A ku fana na Dorkasi wa xikhatini xa kale, nwina “mu tele hi mitiro yo saseka ni zinyikiwo.” (Miti. 9:36) Tiyisekani lezaku Jehova wa zi wona lezo niku yena i ta mu tlhelisela hi kufaneleko. — Mat. 6:3, 4.
Ka matiko yo kari, nwina ma tsoniwa a tifanelo ta nwina hi lava va tirisako milayo hi ndlela ya hava kasi ku ‘tsimbeketa, vaku: i nayo.’ (Tis. 94:20-22) Kota lezi mu zwisisako lezaku Jesu i sina a wulawulile hi kuxaniseka loko, ma ku timisela hi kutiya na mu tsutsumela ka Jehova kota wuchavelo ga nwina. (Joh. 15:19, 20) Varanzekako, tiyisekani lezaku ha mu kumbuka hi kukhanzakanya mikhongelweni ya hina kota lezi mu simamako “ku hlamula hi kurula ni xichawo ni wihi munhu loyi a mu wutisako hi xigelo xa kutsumba ka nwina.” — 1 Ped. 3:13-15.
Ha mu dzunza hi matsenya nwentlheni va timiliyoni mu simamako na mu basile mahanyeleni lembe ni lembe hambu lezi Satani a vuvumisako hi ndlela yo biha ni ya wumbyori a mahanyela ma nga hlazekangiko. Ka xikhati lexi a milayo ya tiko ya mahanyela yi yako yi chaka nguvu, nwina mo ‘tiya Hosini, ni ntanwini wakwe wa hombe.’ (Efe. 6:10) Nwina ma ‘hloma a matlhari wontlhe ya Nungungulu,’ niku hi kota ya lezo, ma zi kota “ku hlula a mano ya Satani.” (Efe. 6:11, 12) Tivani lezaku Jehova wa tirisa a xikombiso xa nwina kasi ku nyikela hlamulo wo dlunyateka ka muruki, a nga Satani! — Mav. 27:11.
Hi tsakile nguvu hi ku tiva lezaku hi 2011, ku vile ni 19.374.737 wa vanhu Xialakanyisweni xa kufa ka Hosi ya hina. Hi tlhelo go kari, a hlayo leyo yo hlamalisa yi vile kona hi kota ya hlamulo wa nwina wa hombe a xikhati lexi mu kucilweko ku teka wuphayona go vunetela hi Abril wa nwecemu. A vanhu va timiliyoni misaveni va zi kotile kuzwa magezu ya ku dumisa Jehova na mata hi ka Timboni takwe to tsumbeka! (Rom. 10:18) Kani u munwe wa lava va 2.657.377 va tirileko kota maphayona yo vunetela ka hweti leyo kutani u no ti karatela ku anzisa a ntiro wa wena hi ndlela yo kari, nwentlhe mu hi tatile hi kutsaka hi kota ya kutinyiketela ka nwina ni kuhiseka ka nwina ntirweni lowu. — Tis. 110:3; Kol. 3:23.
A nwecemu ku vile ni 263.131 wa vanhu va kombisileko a kutihendleleta kabye ka Jehova hi kubapatizwa. Ha bonga Jehova hi kota ya lezo, niku ha mu bonga nwentlhe hi ku hlengela na hina kuandlaleni ka xirambo lexi ka vanwani: “Tana! Ni loyi a zi zwako, a wule aku: Tana! Loyi a zwako tora, ate! Ni loyi a zi ranzako, ngha akha mati ya wutomi mahala.” (Kuv. 22:17) Nguvunguvu anzhako ka ku a migotsovanyweni ya hina ya muganga ya 2011 hi wulawulile hi matshamela ya Mufumo wa Nungungulu wu yimisilweko, hi wula hi ndlela yi tsakisako nguvu a ku hunza zikhati zontlhe, hiku: “A wute Mufumo wa Nungungulu!” Na hi kuciwa hi xitiyisekiso xa Jesu lexi xi nge “Nzata lokuloku,” hi tlhatekela hi mbilu yontlhe a magezu ya hina ka hlamulo wa mupostoli Johani hiku: “Amen! Tana Hosi Jesu!” — Kuv. 22:20.
A xikhati lexi mu rinzelako a ximaho lexo xo tsakisa nguvu, tiyisekani lezaku ha ranza a munwe ni munwani wa nwina vamakabye va hina va xinuna ni va xisati, lava mu tiyisako a liranzo la nwina ka Jehova “hi kumaha ni zinene”! — 1 Joh. 3:18.
Vamakabye va nwina,
Hubye yi Fumako ya Timboni ta Jehova