Xumayela vanhu mitirweni yabye hi kutiya

1. Hikuyini hi nga faneliko ku mbhela ntamu loku hi kari hi chava ku xumayela vanhu na va hi mitirweni yabye?

¹ Xana wa chava a ku xumayela vanhu na va hi mitirweni yabye? Loku u kari u chava, u nga mbheli ntamu hakuva hambu Paule, loyi a nga hi mutireli a nga chaviko nchumu, i vile ni xilaveko xa ku ‘tiya hlana’ kasi ku xumayela. (1 Tes. 2:2) Zezi hi ta wulawula hi lezi hi tolovelako ku zi chava hi tlhela hi kuma mawonela ya ku zi hlula.

2. Hikuyini hi nga faneliko ku karateka hi ku chava ku swira vatiri?

² Xana a vatiri va nga ta swireka loku nzi va colopetela? Ka mitiro yo tala, a vatiri va tirela vanhu hi laha va yileko niku va zi rinzela ku colopetelwa. Hi tolovelo va ta wulawula hi xichawo hakuva va ta ku wona kota munhu a lavako zo kari ka koponi leyo. Loku u ambala khwatsi u tlhela u wulawula navo hi liranzo ni wunghana, u ta va kuca a kuva va ku kombisela xichawo.

3. Hi nga potsisa kuyini ku swira lava va lavako zilo ka koponi yo kari?

³ Xana zi ta lava ku nzi maha a xingheniso xa mina mahlweni ka vanhu vo tala? Loku zi koteka, hlawula xikhati lexi a matshamu lawo ma kalako ma nga talangi nguvu hi vanhu, xo kota lexi va vululako hi xona. Rinzela kala u wona lezaku a muwoneleli wa kona i yece zonake u mu tshinelela. Komisa nguvu a xingheniso xa wena.

4. Hi nga wula yini loku hi xumayela mitirweni ya vanhu?

⁴ Nzi ta wula yini? Wulawula ni muwoneleli wa kona loku ku hi ni vatiri vo tala. U nga ha wula lezi: “Za karata ku kuma vatiri mitini yabye, hikwalaho hi mu enzela mitirweni ya nwina. Nza zi tiva lezaku wo tira, hikwalaho nzi ta komisa nguvu bhulo.” Kasi va nga alakanyi lezaku hina hi vaxavisi, a kutala ka zikhati zi chukwana ku nga kumbuki a minyikelo ahandle ka loku va hi wutisa lezi a ntiro wa hina wu seketeliswako zona. Hi kuya hi ntiro wa kona lowu va wu mahako, u nga ha kombela a muwoneleli lezaku u bhula kutsongwani ni vatiri. Phinda a xingheniso xa wena ka vona. Loku a mutiri wo kari a woneka na a khomekile nguvu, komisa a xingheniso xa wena u tlhela u mu siyela xitlukana. Loku zi nga koteki ku bhula ni vatiri, kuzilava u ta vumelelwa ku siya mabhuku laha va humulelako kona.

5. Zigelo muni hi nga nazo za kuva hi xumayela vanhu mitirweni yabye hi kutiya?

⁵ Jesu na Paule va xumayele vanhu mitirweni yabye na va hi ni kutiya, niku wenawu u nga zi kota. (Mat. 4:18-21; 9:9; Miti. 17:17) Kombela Jehova lezaku a ku vuna kuva ni mbilu yo rula ni kutiya-hlana. (Miti. 4:29) Za kala nguvu a ku vumala vanhu lomu mitirweni yabye, hikwalaho hikuyini u nga ringiko ku xumayela xipanzeni lexo xi bhinzulako?