Wukustumunyu Ga Lomu Maruweni Gi Bhinzulako
1. Hi yihi yinwe ya tindlela ta ku pimanyisa Jesu?
1 A xikhati lexi Jesu a nga xumayela misaveni, a nga kanakanangi ku wulawula ni vanhu lava a nga kari a va kuma maruweni ni lomu a vanhu va nga hlengeletana kona. (Luka 9:57-61; Joh. 4:7) Yena i wa lava ku hlengela a mhaka yakwe ya lisine ni vanhu vo tala hi laha zi nga koteka hi kona. Inyamutlha, a ku nyika wukustumunyu maruweni i ndlela ya yi nene nguvu ya ku vuna vanhu a ku kuma a wutlhari ga Nungungulu. (Mav. 1:20) A kubhinzula ka hina ku ta engetelwa loku hi sangula hi hina a ku tshinelela vanhu ni loku hi tirisa wutlhari.
2. Xana a ku sangula hi wena zi vunisa kuyini a xikhati hi tirako maruweni?
2 Sangula Hi Wena: A zikhati zo tala i chukwana a ku tshinelela vanhu a ku hunza ku yima kutani ku tshama ka wutshamu ginwe na hi rinzela lezaku lava va hunzako va ta hi tshinelela. Va hlekele, u va cuwuka hi kukongoma, u tlhela u bhula navo hi kurula ni wunghana. Loku u kari u tira ni vahuweleli vanwani i chukwana mu nga tshineleli vanhu na mu tele. A ku sangula hi wena za laveka kambe kasi ku hlakulela a kutsakela ka lava u va kumako. Loku zi fanela, a kumbheleni ka bhulo wutisa munhu loye hi wunghana lezaku u nga tlhela u mu kumisa kuyini. A vahuweleli vo kari va khanzakanya ku nyika wukustumunyu ga lomu maruweni ka wutshamu ga ginwe. Lezo zi va vumelela a ku wulawula ni vanhu va vanwe hi kuphindaphinda va tlhela va hlakulela a kutsakela kabye.
3. Hi nga tirisisa kuyini a wutlhari a xikhati hi nyikako wukustumunyu maruweni?
3 Tirisa Wutlhari: Ngha uva ni wukheta a xikhati u bohako laha u to yima kona ruweni ni loyi u to mu tshinelela. A ku na xilaveko xa ku xumayela a vanhu vontlhe va hunzako. Cuwuka khwatsi a xiyimo xa munhu. Hi xikombiso, loku a hi ni xihatla i chukwana a ku mu tsika a hunza. Loku u xumayela mahlweni ka xitolo, ti wonele lezaku u nga vuxi kukarateka ka nwinyi wa xitolo handle ka xigelo. Zi tala kuva chukwana a ku xumayela vanhu a xikhati va humako hi lomu xitolo wutshanwini ga loku va ha nghena. Tshinelela vanhu hi ndlela yi nga va chavisiko kutani ku va dzukisa. Ahandle ka lezo, tlhariha a xikhati lexi u nyikelako mabhuku. Loku va nga kombisi nguvu kutsakela, u nga nyikela xitlukana wutshanwini ga marevista.
4. Hikuyini a wukustumunyu ga lomu maruweni gi nga ntiro wa simu wu vunako ni wu tsakisako?
4 A wukustumunyu ga lomu maruweni gi hi vumelela a ku xwanya a timbewu tinyingi ta zinene hi xikhati xi tsongwani. (Mutsh. 11:6) A vanhu vanwani hi va kumako za koteka a ku kuva lava hi nga va kumiko mitini a xikhati hi tirako hi muti-ni-muti. Hikuyini hi nga mahiko malulamiselo ya ku hlengela ka wukustumunyu ga lomu maruweni, gi nga ntiro wa simu wo tsakisa ni wu bhinzulako?