Ndlela yiswa yo tsakisa ya wukustumunyu ga laha kubaseni
1. Zini lezi a mabandla ma nga ni matshamu ma fambafambako nguvu vanhu ma kuciwako ku maha?
1 A mabandla lawa ma nga ni matshamu ku fambafambako nguvu vanhu ma kuciwa ku maha malulamiselo ya ku nyika wukustumunyu ga laha kubaseni hi ku tirisa timeza kutani zikarinyana zi kombisako mabhuku. Loku ku tirisiwa xikarinyana, ku laveka muhuweleli munwe hi wutsongwani ga kona lezaku a yima kutani ku tshama kusuhani naxo. Kanilezi loku ku hi meza, ku laveka vahuweleli vambiri. Lava va yimako ni meza kutani xikarinyana va ti karatela ku kombisa liranzo, xinghana, ni kukoka kupima. Loku a wokari a nyima laha ka mabhuku lawo, a munwe wa va muhuweleli a nga ha sangula bhulo, kuzilava hi ku wula lezi: “U tshuka u ti wutisa ku a Biblia gi le yini hi mhaka leyo?” A muhuweleli munwe kutani vambiri va nga yima hi le kulana va nyika wukustumunyu ga xitshuketi.
2. Hlawutela a tshango gi kombako a lisima la ku nyika wukustumunyu hi ku kombisa mabhuku.
2 A lulamiselo legi gi maha lezaku ku vululiwa zigonzo zo tala za Biblia. A xigonzani xo kari xa universidade xi lo boha ku tsala phepha ga kambisiso xungetano hi Timboni ta Jehova, kanilezi xi wa nga kumi Salawu ya Mufumo. Ka viki gi nga lanzela, xi lo wona a meza ya mabhuku laha xikoleni. Ku lo sangulwa xigonzo xa Biblia. Zalezi a xigonzani lexo xi bapatizilwe niku xi kari xi tira ka lulamiselo legi ga wukustumunyu.
3. A vokari va ti zwisa kuyini xungetano hi lulamiselo legi ga wukustumunyu ke?
3 A makabye wo kari wa xisati a ti buzako hi lulamiselo legi ga wukustumunyu ga laha kubaseni i ngalo: “A vokari va nyima laha hi nga kona kasi ku teka a marevista ma ha hi ku humesiwako. A vanwani va wa nga se tshuka vazwa lezaku ku na ni Timboni ta Jehova. Nza zi wona lezaku hi lulamiselo legi, a vanhu vo tala va ta ma kuma mahungu yo saseka.” A makabye munwani wa xisati i ngalo: “Leyi i ndlela yiswa, yo tsakisa yo nyikela wukustumunyu hakuva a vanhu vata ka wena na va lava ku tiva xokari hi wutsongwani ga kona.”
4. Hikuyini zi bhinzulako a ku veka meza kutani xikarinyana ka wutshamu galegi ga ginwe, hi zikhati zo fana viki ni viki ke?
4 Za vuna a ku veka meza kutani xikarinyana ka wutshamu galegi ga ginwe, hi masiku yo fana, ni zikhati zo fana viki ni viki. Hi ku maha lezo, a vanhu va tolovela ku wona mabhuku lawo vaza va tlhatlheka ku tshinela va maha ziwutiso kutani ku teka mabhuku. A bandla ga wena gi na ni lulamiselo ga wukustumunyu ga laha kubaseni ke? Loku zi hi nghaho, kuzilava u nga tira ka ndlela leyi yo tsakisa ni yo bhinzula ya ‘kuba hungu hi mufumo wa Nungungulu.’ — Luka 9:60.