Tirisa khwatsi a xikhati xa wena wutirelini

Nzeni ka lembe ga ntiro ga 2014, a Timboni ta Jehova ti mbhetile 1.945.487.604 wa tihora wutirelini — lezi zi nga xikombiso xo dlunyateka xa lezaku hi ti yimisele ku tshama hi khomekile ntirweni wa Jehova! (Tis. 110:3; 1 Kor. 15:58) Kota lezi ‘a xikhati xi nga sala xi komileko,’ xana hi nga tirisa a tihora ta hina ta lisima wutirelini kasi ku bhula ni vanhu vo tala nguvu? — 1 Kor. 7:29.

A ku tirisa khwatsi a xikhati xa hina wutirelini zi lava lezaku hi olova. Hi xikombiso, loku ku hi lezaku wa tolovela ku mbheta hora kutani ku hunza wutireli ga tshamela go kari na u nga se wulawula ni munhu, xana u nga cica zokari kasi ku kuma vanhu vo tala u bhula navo ke? A ziyimo za wutshamu go kari zi hambene ni za ginwani. Hambulezo, a mawonela lawa ma lanzelako ma nga ku vuna ku tirisa khwatsi a xikhati xa wena kasi u ‘ngabi mheho.’ — 1 Kor. 9:26.

• Wukustumunyu ga muti ni muti: Hi makume ya malembe, a vahuweleli va tolovela ku sangula siku gabye wutirelini hi ku xumayela hi muti ni muti. Kanilezi, kota lezi a vanhu vo tala va yako mitirweni ni mumu, zi ngo yini loku wo ringisa ku xumayela hi muti ni muti hi muphindelo kutani ni wusikwana, laha a vanhu va nga kona kaya na va nga hi ka nyimanyima yo lava ku suka ke? Ni mumu, a ku xumayela lomu maruweni kutani mabazarini zi nga ha pswala mihanzu.

• Wukustumunyu ga laha kubaseni: A timeza ni zikarinyana za mabhuku zi fanele ku vekiwa ka zipanze ku fambafambako nguvu vanhu xipanzeni xa bandla ga nwina. (Wona a Wutireli ga hina ga Mufumo ga Julho wa 2013, p. 5.) Loku a vanhu va hunguka ka wutshamu go kari ku mahiwako wukustumunyu ga laha kubaseni, a Kometi ya Ntiro ya Bandla yi nga ha boha ku rurisa a xikarinyana lexo kutani meza yiya ka wutshamu ginwani ku fambafambako nguvu vanhu.

• Tienzo to wuyela ni zigonzo za Biblia: U nga zi kota ku ti mahela longoloko wa ku maha tienzo to wuyela ni ku fambisa zigonzo za Biblia hi zikhati lezi a matshamela manwani ya wutireli ma nga pswaliko mihanzu ke? Hi xikombiso, loku a wutireli ga muti ni muti gi pswala mihanzu hi Mulongiso ni mixo, xana u nga fambisa zigonzo za wena za Biblia ni gambo kutani ni wusikwana? A xikhati va mahako tienzo to wuyela, xana a vahuweleli va nga avana hi mitlawa yi tsongwani kasi ku bhinzula nguvu wutirelini ke?

Lisine lezaku hi nga hlaya ni xihi xikhati hi nga wutirelini, kanilezi a litsako la hina la kula loku hi bhinzula. Loku u wona lezaku a tshamela go kari ga wutireli a gi bhinzuli ka xikhati xo kari, ringisa tshamela ginwani. Khongela ka Jehova, “a Hosi ya kutshovela,” lezaku a ku nyika wurangeli kasi u zi kota ku tirisa khwatsi a xikhati xa wena wutirelini! — Mat. 9:38.