Ndlela ya ku nyika wukustumunyu hi ku kombisa mabhuku

A ku nyika wukustumunyu hi ku tirisa xikarinyana kutani meza zi woneka na zi vuna nguvu a ku koka vanhu va timbilu ti nene vata lisineni. (Joh. 6:44) Hikwalaho, a madota ma kuciwa ku lulamisela wukustumunyu ga laha kubaseni matshanwini ku fambafambako nguvu vanhu xipanzeni xa bandla gabye. Kota lezi a meza kutani xikarinyana xo kombisa mabhuku zi kalako zi nga belelwi zi tshama kwalaho, a kutala ka zikhati a ku na xilaveko xa ku kombela wuhosi kasi ku maha lezo. Himani a ringanelwako hi ku tira lulamiselweni legi? Vahuweleli va nga ni kupima, va bohako khwatsi, na va hi ni wutlhari ga ku bhula ni vanhu. Wona zilo zo kari va faneleko ku maha ni lezi va nga faneliko ku maha.

Maha lezi:

• Kombisa xinghana, u amukela khwatsi lava va tako, u tlhela u va vuna. A vahuweleli vo kari va nwayitela na zi huma mbilwini va gumesa va mu losa hi wunghana. Loku a wokari a cuwuka mabhuku lawo na a hunza, u nga haku: “U nga teka ni xihi u xi lavako.”

• Yima ka pfhuka wo faneleka. Ka matshamu yo kari, a vahuweleli va bhinzula loku va yima kusuhani nguvu ni mabhuku lawo. A vanwani va polile lezaku a ku maha lezo zi maha ku a vahunzi va ndlela va chava ku nyima, hikwalaho va yima hi le kulana kala a wokari a nyima laha ku nga ni mabhuku. Laha a munhu a tshinelelako mabhuku lawo, va zama ku mu bhulisa, kuzilava hi ku mu wutisa lezi: “U tshuka u ti maha xiwutiso lexo?”

• Tirisa Biblia ni xihi xikhati zi kotekako.

• Tlhamusela a lulamiselo ga xigonzo xa Biblia ka ni wihi loyi a tekako ginwe ga mabhuku ya hina ya xigonzo, yo kota A Biblia Gi Gonzisako. Mu kombe a vidiyu Hikuyini u faneleko ku gonza Biblia? hi fone ya wena kutani muchini wunwani.

• Kombela mahungu ya mutsakeli loku zi koteka. Loku a munhu loye a nga hanyi xipanzeni xa nwina, tekela ku tatisa a formulario Queira Visitar (S-43), u nyika matsalani.

Lezi u nga mahi:

• Ku leva, ku kurumeta, kutani ku yimisa ku khwatsi wo wonelela mabhuku lawo lezaku ma nga yiviwi.

• Ku wona lulamiselo legi kota ndlela ya ku avela mabhuku ntsena. Loku hi hi wutirelini, a kungo ga hina ku sangula zigonzo za Biblia, hikwalaho hi fanele ku zama ku koka bhulo ni vanhu.

• Ku valela a mabhuku lawo kutani ku xengwa hi mabhulo ni munghana wa hina. Loku u lava ku fonela munhu, a kutala ka zikhati i chukwana ku suka laha ka mabhuku.

• Ku kanetisana ni lava va hi vukelako. Loku a wo kari a kombisa tihanyi, ku nga ha laveka lezaku hi rura hiya ka wutshamu ginwani.