Kwadru Ga Ziwutiso

◼ Zini hi faneleko ku zi alakanya loku hi lava lezaku a titshomba ta hina ti lumba a hlengeletano ya Jehova loku hi tafa?

Loku munhu a kala afa, a nga ha hi na ndlela ya ku wonelela a titshomba takwe. (Mutsh. 9:5, 6) Hikwalaho, a votala va tsala mahungu ka phepha, va wula a kuranza kabye kutani ku tlhamusela lezi va lavako lezaku a titshomba tabye ti aveliswa zona. (2 Tih. 20:1) A phepha legi ga nayo a kutala ka zikhati gi tlhela gi komba loyi u lavako lezaku ava mukhomi wa tshomba kutani muaveli wa tshomba ya wena. Matikweni yo tala, loku a nwinyi a nga tsalangi nchumu xungetano hi tshomba yakwe, a mufumo hi wona wu to boha lezi a tshomba ya matsuva yi faneleko ku aveliswa zona. Hikwalaho, loku hi lava lezaku a tshomba ya hina — yontlhe kutani xipanze xo kari — yi sala yi lumba a hlengeletano ya Jehova, za lisima a ku sayina a phepha ga nayo legi gi tlhamuselako khwatsi a mhaka leyi, hi tlhela hi hlawula hi wukheta a mukhomi wa tshomba kutani muaveli wa tshomba.

A mukhomi kutani muaveli wa tshomba i na ni wutihlamuleli ga hombe. Maringano ni ntsengo wa titshomba leto, ku nga ha laveka zotala kasi ku hlengeleta ni ku avela a titshomba leto, niku ziga xikhati. Tlhatakumbiri, a mufumo kutala ka zikhati wu na ni zileletelo lezi zi faneleko ku lanzelwa. A hi lezaku loku munhu a hi xiro xa bandla o halahala a ringanelwa hi kuva mukhomi wa tshomba kutani muaveli wa tshomba. Hi fanele ku hlawula munhu loyi hi zi tivako lezaku i ta zi kota, wa tsumbeka, niku i ti yimisele ku maha lezi hi zi lavako. — Wona a nzima “Por que é bom e sensato preparar um testamento” ka Despertai! ga 8 ka Dezembro wa 1998.

Loku u kombeliwa kuva mukhomi kutani muaveli wa tshomba: Loku u kombeliwa lezaku u sala u wonelela a titshomba ta munhu anzhako ka loku a file, a xo ranga tshama hasi u alakanyela hi mukhongelo lezaku u ta zi kota ku maha ntiro lowo ke. (Luka 14:28-32) Loku a nwinyi a kala afa, u fanele ku tivisa vontlhe lava a va xaxametileko kota ziga-tshomba. Anzhako ka lezo, lexi u faneleko ku xi maha, ku avela a titshomba leto na u lanzela khwatsi a nayo zinwe ni lezi zi tsalilweko ka phepha hi nwinyi wa tshomba. A mukhomi wa tshomba kutani muaveli wa tshomba i fanele ku tshama na a zi tiva lezaku a nga na fanelo ya ku maha kuranza kakwe, kani a titshomba leto ti tele, kani ti tsongwani. Xihi ni xihi xi nyikelweko ka koponi ya nayo yi tiriswako hi Timboni ta Jehova xi nyikelwe kota tshomba yi lumbako a hlengeletano ya Jehova. — Luka 16:10; 21:1-4.