Bonga a kuhana ka Jehova

JEHOVA i Nungungulu wa wuhana. (Jak. 1:17) Kusukela ka tinyeleti leti ti tatako tilo ni wusiku kala ka byanyi legi gi fenengetileko misava, a zivangwa za Jehova zi huwelela a kuhana kakwe. — Tis. 65:12, 13; 147:7, 8; 148:3, 4.

A kubonga loku a muyimbeleli wa tisimu a nga hi nako hi Muvangi wakwe ku wa hi ka hombe nguvu laha ka kuza a kuceka ku yimbelela lisimu li dumisako a mitiro ya Jehova. Gonza Lisimu 104, u wona lezaku a wu ti zwisi lezi a nga ti zwisa zona ke. I te ngalo: “Nzi ta yimbelela ka Jehova na nza ha hanya, nzi dumisa Nungungulu wa mina loku nza hi kona.” (Tis. 104:33) Hi kwaloko a kuxuva u nga nako wenawu?

XIKOMBISO XA HOMBE XA KUHANA

Jehova i lava lezaku hi lanzela xikombiso xakwe xa wuhana. I hi nyika zigelo zo zwala kambe za kuva hi hana. I pimisele Mupostoli Paule lezaku a tsala lezi: “Laya vona lava va fumileko laha misaveni, lezaku va nga ti kukumukisi, va nga tsumbi kufumeni ku nga tiyangiko, kanilezi va tsumba Nungungulu, loyi a hi nyikako zilo zontlhe hi matsenya lezaku hi tsaka ha zona. Va laye lezaku va maha zo saseka, va fuma hi mitiro yi nene, va ranza ku avela vanwani a zilo zabye, va hana; lezaku va ti veketela a tshomba leyi yi ta ngava a xiseketelo xi nene a xikhatini xa ha tako, lezaku va fela ku kuma wutomi legi gi nga wutomi hizinene.” — 1 Tim. 6:17-19.

A xikhati lexi Paule a nga tsala papilo gakwe ga wumbiri gi pimisilwe, legi gi ngaya bandleni ga le Korinte, i lo khanyisa a mawonela ma nene lawa ma lavekako mhakeni ya kunyika. I te ngalo: “A munwe ni munwani a nyike kota lezi a xuvako mbilwini yakwe; na a nga karateki, kutani ku kurumetwa; hakuva Nungungulu wa ranza loyi a nyikako na a xalele.” (2 Kor. 9:7) Hi kulanzela, Paule i lo wulawula hi lava va vunekako hi wuhana lego: lava va nyikwako, ku tatiswa zilaveko zabye; ni lava va nyikako, va kuma makatekwa yo tala ya moya. — 2 Kor. 9:11-14.

Paule i lo gumesa xipanze lexi ka papilo gakwe hi ku wula lezaku Nungungulu xikombiso xa hombe xa wuhana. I tsalile lezi: “A ku bongiwe Nungungulu hi kota ya xinyikiwo xakwe lexi xi nga wulekiko.” (2 Kor. 9:15) Zi te dlunya lezaku a xinyikiwo xa Jehova xi patsa zontlhe zo saseka lezi Nungungulu a mahelako vanhu vakwe hi Jesu Kristu. Xa lisima nguvu laha ka ku xi nga tlhamuseleki.

Hi nga kombisa kuyini kubonga hi zontlhe za zi nene lezi Jehova ni N’wana wakwe va hi maheleko ni lezi va ha to hi mahela ke? A yinwe ya tindlela ta ku kombisa wuhana hi ku tirisa xikhati xa hina, ntamu, ni titshomba kasi ku anzisa a wukhozeli gi basileko ga Jehova, na ku nga khataliseki lezaku zi tsongwani kutani za hombe. — 1 Kro. 22:14; 29:3-5; Luka 21:1-4.

Lezi A Vokari Va Mahisako Zona A Minyikelo Yo Seketela A Ntiro Wa Misava Yontlhe

Khwatsi hi lezi zi nga maheka masikwini ya mupostoli Paule, a votala nyamutlha ‘va ti vekela’ mali yo kari, zonake va yi chela makaxeni ya minyikelo ya bandla ma tsalilweko ku “Ntiro wa Misava Yontlhe” (“Obra Mundial”). (1 Kor. 16:2) Hweti ni hweti, a mabandla ma rumela a minyikelo leyi ka hofisa ya ravi ya Timboni ta Jehova leyi yi wonelelako a tiko gabye. Za koteka kambe a ku u rumela munyikelo hi kukongoma ka vito ga nayo legi gi tirisiwako hi Timboni ta Jehova tikweni ga wena. Kasi u tiva a vito ga nayo legi gi tirisiwako hi Timboni ta Jehova tikweni ga wena, wulawula ni hofisa ya ravi. A khero ga kona u nga gi kuma ka www.jw.org. A tixaka ta minyikelo leyi u nga yi rumelako hi kukongoma hi leti ti lanzelako:

MINYIKELO YO KONGOMA

Mali, tiphera, mawachi, makordawu (ni zinwani zilo) zo mahiwa hi nzalama, siliva kutani yinwani simbi yo hlawuleka.
Rumela zilo lezi ni papilo gi kombako lezaku a mali leyo kutani zilo lezo munyikelo wo kongoma.

MUNYIKELO WAKU LOKU U WU LAVA VA KU TLHELISELA — MABANDLA NTSENA

Minyikelo ya mali yaku loku a nwinyi wa kona a yi lava a yi kuma.
A kuranga bhulisana ni hofisa ya ravi ya tiko ga nwina kasi u tiva lezi a lulamiselo legi gi tirisako zona lomu tikweni ga nwina.

MINYIKELO YI MAHELWEKO MAKUNGO

Ahandle ka mali ni zilo zinwani za lisima lezi munhu a nga ha zi nyikelako, ku na ni tindlela tinwani ta ku maha minyikelo kasi ku seketela a ntiro wa Mufumo misaveni yontlhe. A manyikelela lawo ma xaxametilwe laha hasi. Kani u lava ku tirisa a mahela muni, a kuranga bhulisana ni hofisa ya ravi ya tiko ga nwina kasi u tiva a mamahela lawa ma tiriswako. Kota lezi a milayo ya mahakhelela ya zilo ni mikhupo yi hambanako ka tiko ni tiko, za lisima a ku ranga hi ku wutisa lava va gonzileko a milayo ya mahakhelela ya zilo ni makhupela, na u nga se hlawula a manyikelela lawa ma nga ya chukwana.

Maseguro: Wa zi kota ku tsalisa Associação das Testemunhas de Jeová de Moçambique kota yona yi to kuma mali ya xivumelwano lexi u xi mahileko ni koponi yo kari ya maseguro, kutani kuva yona yi to kuma mali ya wena ya peceni.

Tikonta ta banko: U nga tsalisa a vito gi tiriswako hi Timboni ta Jehova kota legi gi to sala ni tikonta ta wena ta banko, matalawu ya dipozito, kutani konta ya banko leyi munhu a salako nayo loku a nwinyi wa kona afa, ni mali ya peceni. Ngha zi mahiwa hi kuvumelelana ni milayo ya banko ya tiko ga nwina.

Tshomba: U nga nyikela a tshomba ya wena ka vito ga nayo gi tiriswako hi Timboni ta Jehova kota munyikelo wo kongoma. Loku yi hi yindlu kutani muti, u nga simama ku hanya ka wona zonake wu sala wu lumba a hlengeletano loku ufa.

Phepha ga nayo ga maavelela ya tshomba (testamento): U nga ha sayina phepha ga nayo gi tlhamuselako lezaku a mali, tshomba, kutani zilo zinwani za wena zi ta sala zi lumba Associação das Testemunhas de Jeová de Moçambique loku ufa.

Kasi ku kuma manwani mahungu, wulawula ni Associação das Testemunhas de Jeová de Moçambique, ku ngava hi papilo kutani telefone, hi ku tirisa a khero legi gi nga laha hasi, kutani ku wulawula ni hofisa ya ravi yi wonelelako a ntiro tikweni ga nwina.

ASSOCIAÇÃO DAS TESTEMUNHAS DE JEOVÁ DE MOÇAMBIQUE

Rua da Micaia N.° 160, Bairro Triunfo

Costa do Sol

MAPUTO, MOÇAMBIQUE

Telefone: (+258) 21 450 500