Ndlela ya ku vuna lava va vumalako

FRANÇOIS, a nga Mboni ya Jehova tlhelo dota ga bandla, a tako hi ka tiko go ganya i bika lawa: “Anzhako ka hlawula-mani wu nga kala ku tsakelwa hi votala, ku lo vuka woyonga ni gujeguje. A makume ya mazana ya Timboni ta Jehova ti lo tsutsuma mitini yabye. A zakuga ni mimuri zi lo kala, niku lezi zi nga selenyene tikweni zi lo dura nguvu. A mabanko ma lo valiwa, a mali yi mbhela lomu ka ma ATM.”

Zalezo, a vamakabye le hofisa ya ravi va lo sangula ku nyikela timali ni zinwani zilo kasi ku vunetela a Timboni leti ti nga hlengeletene tiSalawini ta Mufumo tikweni lego. A mitlawa leyi yi nga lwela ku fuma yi lo vala maruwa, kanilezi, kota lezi a mitlawa leyo hi wumbiri ga yona yi nga zi tiva lezaku a Timboni a ti ti ngheniseli ka politika ne ni kutsongwani, a kutala ka zikhati yi wa tsika mimova ya hofisa ya ravi yi hunza.

François i ngalo: “Na hi kari hiya ka Salawu yo kari ya Mufumo, a masochwa ma lo duwulela a mova wa hina. Hambulezo, a tibhala a ti hi kumangi. Laha hi nga wona sochwa gi nga hi ni xibhamu na gi tsutsuma gita seno ka hina, hi lo djikisa mova hi tlhela hi kutsutsuma hiya hofiseni ya ravi. Hi lo bonga Jehova hi lezi a nga hi ponisa. Hi manziko wa kona, a 130 wa vamakabye va nga hi ka Salawu leyo ya Mufumo va loya ka wutshamu ga gi nenanyana. A vokari va lota hofiseni ya ravi, laha hi nga ta va hlayisa hi tlhelo ga moya ni ga nyama kala a gujeguje yi hunza.”

François iya mahlweni aku: “Anzhako ka xikhati, a hofisa ya ravi yi lo amukela mapapilo yo tala ma ngata hi ka vamakabye tikweni gontlhe na va kombisa kubonga hi mbilu yontlhe. A ku wona lezi a vamakabye va matiko manwani va nga va vunisa zona zi engetele kutsumba kabye ka Jehova.”

A xikhati lexi hi welwako hi makhombo ya ntumbuluko ni ya ku vangiwa hi munhu, a hi byeli a vamakabye va hina va xinuna ni va xisati lezaku “fambani hi kurula, mu kufumela, mu xura.” (Jak. 2:15, 16) Wutshanwini ga lezo, hi hlota tindlela ta ku khatalela a zilaveko zabye za nyama. Hi kufanana, anzhako ka ku amukela xitlharihiso xa lezaku ku wata ndlala zaneni ga malembe go sangula, “a vapizani va lo vumelana, lezaku va ta rumela a vamakabye lava va nga hi le Judia a za ku va vuna, munwe ni munwani a nyika kukotisa a ntamu wakwe.” — Miti. 11:28-30.

Kota malanza ya Jehova, hi xuva nguvu ku nyika xivuno ka lava va vumalako hi tlhelo ga nyama. Hambulezo, a vanhu va na ni xilaveko xa zilo za moya kambe. (Mat. 5:3) Kasi ku va vuna lezaku va tiva a xilaveko lexi ni ku xi tatisa, Jesu i lo leletela a valanzeli vakwe lezaku va maha vapizani. (Mat. 28:19, 20) A munwe ni munwani wa hina i tirisa nguvu a xikhati xakwe, ntamu, ni titshomba kasi a maha ntiro lowo. Kota hlengeletano, hi tirisa a mali yo kari xikari ka leyi yi nyikelwako kasi ku vuna vanhu hi tlhelo ga nyama, kanilezi a minyikelo yi tiriselwa nguvunguvu a ku yisa mahlweni a ntiro wa Mufumo wa ku xumayela mahungu yo saseka. Hi ku maha loko, hi kombisa liranzo la hina ka Nungungulu ni ka vaakelani va hina. — Mat. 22:37-39.

Lava va seketelako a ntiro wa misava yontlhe wa Timboni ta Jehova ngha va tiyiseka lezaku a minyikelo yabye yi tiriswa hi ndlela yi nene ni ya chukwana. Xana u nga maha xokari kasi ku vunetela vamakabye va wena lava va vumalako? Wa xuva ku seketela a ntiro wa ku maha vapizani? Loku zi hi tano, “u nga ali ni xivuno xa wena ka loyi a vumalako, loku zi hi ntanwini wa wena lezaku u zi maha.” — Mav. 3:27.

LEZI A VOKARI VA MAHISAKO ZONA A MINYIKELO YO SEKETELA A NTIRO WA MISAVA YONTLHE

Khwatsi hi lezi zi nga maheka masikwini ya mupostoli Paule, a votala nyamutlha ‘va ti vekela’ zo kari kutani mali yo kari, zonake va yi chela makaxeni ya minyikelo ya bandla ma tsalilweko ku “Ntiro wa Misava Yontlhe” (“Obra Mundial”). (1 Kor. 16:2) Hweti ni hweti, a mabandla ma rumela a minyikelo leyi ka hofisa ya ravi ya Timboni ta Jehova leyi yi wonelelako a tiko gabye. Za koteka kambe a ku wena u rumela munyikelo hi kukongoma ka koponi ya nayo leyi yi tirisiwako hi Timboni ta Jehova tikweni ga wena. Kasi u tiva a vito ga nayo ga koponi leyi yi tirisiwako hi Timboni ta Jehova tikweni ga wena, wulawula ni hofisa ya ravi leyi yi wonelelako ntiro wa kuxumayela tikweni ga wena. A khero ga hofisa ya ravi gi kumeka ka www.jw.org. A tixaka ta minyikelo leyi u nga yi rumelako hi kukongoma hi leti ti lanzelako:

MINYIKELO YO KONGOMA:
- Mali, tiphera, mawachi, makordawu (ni zinwani zilo) zo mahiwa hi nzalama, siliva kutani xinwani xiketse xo hlawuleka.
- Rumela zilo lezi ni papilo gi kombako lezaku a mali leyo kutani zilo lezo munyikelo wo kongoma.
MUNYIKELO WAKU LOKU U WU LAVA VA KU TLHELISELA — NTSENA A MABANDLA
- Minyikelo ya mali yaku loku a nwinyi wa kona a yi lava a yi kuma.
- A kuranga bhulisana ni hofisa ya ravi ya tiko ga nwina kasi u tiva lezi a lulamiselo legi gi tirisako zona lomu tikweni ga nwina.
KUNYIKELA LOKU KU MAHELWEKO MAKUNGO

Ahandle ka mali ni zilo zinwani za lisima lezi munhu a nga ha zi nyikelako, ku na ni tindlela tinwani ta mamahela ya minyikelo kasi ku seketela a ntiro wa Mufumo misaveni yontlhe. A manyikelela lawo ma xaxametilwe laha hasi. Kani u lava ku tirisa a mahela muni, a kuranga bhulisana ni hofisa ya ravi ya tiko ga nwina kasi u tiva lezi a lulamiselo legi gi tirisako zona tikweni ga nwina. Kota lezi a milayo ya mahakhelela ya zilo ni mikhupo yi hambanako ka tiko ni tiko, za lisima a ku ranga hi ku wutisa lava va gonzileko a milayo ya mahakhelela ya zilo ni makhupela, na u nga se hlawula a manyikelela lawa ma nga ya chukwana.

Maseguro: Wa zi kota ku tsalisa Associação das Testemunhas de Jeová de Moçambique kota koponi leyi yi to kuma mali ya xivumelwano lexi u xi mahileko ni koponi yo kari ya maseguro, kutani kuva yona yi to kuma mali ya wena ya peceni.

Tikonta ta banko: U nga tsalisa a koponi ya nayo yi tiriswako hi Timboni ta Jehova kota leyi yi to sala ni tikonta ta wena ta banko, matalawu ya dipozito, kutani konta ya banko leyi munhu a salako nayo loku a nwinyi wa kona afa, ni mali ya peceni. Ngha zi mahiwa hi kuvumelelana ni milayo ya banko ya tiko ga nwina.

Tshomba: U nga nyikela a tshomba ya wena ka koponi ya nayo yi tiriswako hi Timboni ta Jehova kota munyikelo wo kongoma. Loku yi hi yindlu kutani muti, u nga simama ku hanya ka wona zonake wu sala wu lumba a hlengeletano loku ufa.

Phepha ga nayo ga maavelela ya tshomba (testamento): U nga ha sayina phepha ga nayo gi tlhamuselako lezaku a mali, tshomba, kutani zilo za wena zinwani zi ta sala zi lumba Associação das Testemunhas de Jeová de Moçambique loku ufa.

Kasi ku kuma manwani mahungu, wulawula ni Associação das Testemunhas de Jeová de Moçambique, ku ngava hi papilo kutani telefone, hi ku tirisa a khero legi gi nga laha hasi, kutani ku wulawula ni hofisa ya ravi yi wonelelako a ntiro tikweni ga nwina.

ASSOCIAÇÃO DAS TESTEMUNHAS DE JEOVÁ DE MOÇAMBIQUE

Rua da Micaia, N.° 160, Bairro Triunfo

Costa do Sol

Maputo, Moçambique

Telefone: (+258) 21 450 500