“Nyika wukustumunyu hi kumbhelela”
1. Xikombiso muni xa xi nene lexi mupostoli Paule a hi vekeleko wutirelini?
1 ‘Maha a ntiro wa wena hi kumbhelela.’ (2 Tim. 4:5) Handle ko kanakana, mupostoli Paule i wa tlhatlhekile a xikhati a nga nyika wusungukati legi Timote. Kunene, nzeni ka malembe ya 47 kuya ka 56 Nguveni ya Hina, Paule i mahile maenzo manharu ya wurumiwa. A bhuku ga Mitiro gi wulawula hi kuphindaphinda hi kuva Paule a nyikile wukustumunyu hi kumbhelela. (Mitiro 23:11; 28:23) Hi nga zi mahisa kuyini lezo inyamutlha?
2. Hi nga nyikisa kuyini wukustumunyu hi kumbhelela loku hi kari hi xumayela hi muti ni muti?
2 Hi muti ni muti: Kasi ku kuma vanhu lava va kalako va nga se tshuka vazwa a mahungu yo saseka, ku nga ha laveka lezaku hi va enzela hi xikhati xinwani xa siku. Kuzilava a wanuna wa muti i kumeka kaya ni wusikwanyana kutani kumbeleni ka viki. Hi fanele ku ti karatela ku bhula ni munhu mitini yontlhe, hi phindaphinda ku tlhela mitini leyi hi vumalako vanhu. Ahati loku a kutikarata ka wena ka ku lava ku kuma munhu ku nga bhinzuli? Kuzilava a ku mu tsalela papilo kutani ku mu fonela zi nga vuna.
3. Malungelo muni ma ku vululekelako kasi ku nyika wukustumunyu ga laha kubaseni kutani ga xitshuketi?
3 Kubaseni kutani hi xitshuketi: A malanza ya Jehova inyamutlha ma tivekisa a “wutlhari” ga lisine ka vontlhe lava va dembako ndleve. Ka zikhati zinwani lezo zi maheka lomu maruweni kutani matshanwini lawa ku talako vanhu. (Mav. 1:20, 21) Xana a xikhati lexi hi mahako a mitiro ya hina ya siku ni siku ha tshama na hi longile ku nyika wukustumunyu? Xana ku nga wuliwa hi hina lezaku ha “khomeka nguvu hi mhaka”? (Miti. 18:5, NM) Loku zi hi tano, ha tatisa a xiavelo xa hina xa ku nyika wukustumunyu hi kumbhelela. — Miti. 10:42; 17:17; 20:20, 21, 24.
4. Xana a mukhongelo ni kuehleketa zi hi vunisa kuyini lezaku hi nyika wukustumunyu hi kumbhelela?
4 Kanilezi, ka zikhati zinwani hi nga ha kanakana ku nyika wukustumunyu hi kota ya kuchava kutani gome ga mabeleko. Jehova wa ku zwisisa a kugumelwa ka hina. (Tis. 103:14) Hambulezo, loku a malungelo lawo ma hi vululekela, hi nga ha khongela ka yena, hi kombela ku a hi nyika kutiya-hlana lezaku hi wulawula. (Miti. 4:29, 31) Zi ngava zi nene kambe loku a xikhati lexi hi mahako a xigonzo xa munhu wutsumbu ni kuva hi elheketa hi Mhaka ya Nungungulu, hi ti karatela ku etisa a kubonga ka hina hi lisima la mahungu yo saseka. (Fil. 3:8) Lezo zi ta hi kuca ku ma kanela hi kuhiseka!
5. Hi nga hlengelisa kuyini kutatisekeni ka wuprofeti ga Joeli?
5 A wuprofeti ga Joeli gi wulile na ka ha hi mahlweni lezaku na ku nga se chikela a siku ga hombe ni go chavisa ga Jehova, a vanhu va Nungungulu va wa ta simama ku “famba,” va nga vumeleli nchumu lezaku wu va tsikisa ku xumayela. (Joe. 2:2, 7-9) Ngha hi maha zontlhe hi zi kotako kasi ku hlengela ntirweni lowu wa ku xumayela wu to kala wu nga tshuki wu phindiwa!