Nyika Wukustumunyu Go Mbhelela Hi Mufumo Wa Nungungulu

1. Xini hi to gonza Xigonzweni xa Biblia xa Bandla kusukela ka viki ga 14 ka Março?

¹ Ka viki ga 14 ka Março wa 2011, hi ta sangula ku gonza a bhuku ‘Dê Testemunho Cabal’ sobre o Reino de Deus Xigonzweni xa Biblia xa Bandla. A bhuku legi gi tlhamusela a bhuku ga Mitiro hi ndlela yi vunako a mugonzi a kuzwa a kunanziha ka lezi zi nga nzeni ka gona. Wutshanwini ga ku nyika a tlhamuselo wa vesi ni vesi, a bhuku Testemunho Cabal gi komba lezi hi zi gonzako ka bhuku ga Mitiro gi tlhela gi komba lezi hi nga zi tirisisako zona wutomini ga hina wutsumbu. — Rom. 15:4.

2. Tlhamusela a matshamela yo kari ya bhuku Testemunho Cabal.

² Matshamela Ya Bhuku Legi: A xingheniso xi nga ka phajina 2 i papilo ga liranzo ga Hubye yi Fumako gi kombako lezi va lavako lezaku hi vunekisa zona hi ku gonza a bhuku legi. Kusukela ka xipimo 2, ku na ni magezu ma tlhamuselako a mongo wa xipimo xinwe ni xinwani, ni Mutsalo wu kombako a xipanze xa bhuku ga Mitiro lexi xi to gonziwa. A zipimo zo tala zi na ni makwadru ma nga ni mahungu xungetano hi vanhu, matshamu kutani zimaho. Lomu matlhelweni ya maphajina ku siyilwe a wutshamu ga hombe kasi ku tsala zo kari. Bhukwini gontlhe ku na ni zithombe za timhaka ta Biblia zi nyikako mahungu yo enela kasi ku hi vuna a ku wona zimaho lezo za lisima. Ka phajina go gumesa ku na ni xaxameto wa zithombe ni mitlhamuselo ya kona ya lezi zi nga nzeni. Lomu nzeni ka zifenengeto ku na ni mimapa yi mahelweko ku hi vuna a ku wona kuanza ka wuKristu ka zana ga malembe go sangula a xikhati lexi va nga sangula ku hangalasa a mahungu yo saseka ‘kala magemeta-musi ya misava.’ — Miti. 1:8.

3. Xana a ku gonza bhuku ga Mitiro zi ta hi vuna ku hlamula a ziwutiso zihi za lisima?

³ Mihlamulo Ya Ziwutiso Za Lisima: A ku gonza a bhuku ga Mitiro zi ta hi vuna a ku yi tiva hi kudlunyatekileko a mihlamulo ya ziwutiso za lisima xungetano hi wutireli ga wuKristu. Hi xikombiso, hi wihi a ntiro ni mahungu zi tivekisako a valanzeli va lisine va Jesu Kristu? Himani a rangelako a ntiro wa kuxumayela wa misava yontlhe, niku hi ndlela muni? Xana a tixanisa ni kukanetwa zi nyika lungelo muni ka vatireli? Hi wihi a ntiro wa moya wa ku basa wutirelini ga hina?

4. Zini hi faneleko ku maha kasi hi vuneka khwatsi hi bhuku legi?

⁴ Kasi u vuneka khwatsi, gi gonze na ka ha hi mahlweni u tlhela u longisela kasi ku nyika mihlamulo bandleni. Kumeka mitlhanganweni yontlhe, u tlhela u alakanyela hi tindlela to tirisa a mahungu lawo wutirelini ga wena wutsumbu. Ngha a kugonza ka hina a bhuku legi go tsakisa ku hi kuca a ku nyika wukustumunyu go mbhelela hi mufumo wa Nungungulu! — Miti. 28:23.