Papilo ga Hubye yi Fumako

Vamakabye va hina vo randzeka:

Kota vanhu va khozelako Jehovha, ha yi randza a Mhaka yakwe, a Bhibhiliya. Ha tiyiseka lezvaku gi hi hlawutela matimu ya lisine, gi hi nyika wusungukati ga ginene kasi gi rangela wutomi ga hina ni cikombiso co khumba nguvhu mbilu ca lezvaku Jehovha wa va randza vanhu. (Lisimu 119:105; Luka 1:3; 1 Johani 4:19) Ha zvi xuva nguvhu a ku vhuna van’wani lezvaku va gondza a lisine la lisima li nga lomu ka Mhaka ya Nungungulu. Hi cigelo leco, hina Hubye yi Fumako, hi tsaka nguvhu hi ku humesa a bhuku legi gi nga ni hloko ya mhaka yi nge: “Gondza ka matimu ya Bhibhiliya.” Hi lava ku mu nyika masemanyana ya bhuku legi.

A kutala ka zvigondzo zva bhuku legi zvi mahelwe ku vhuna vanana. Hambulezvo, zvi nga tirisiwa kambe kasi ku vhuna vanhu va hombe lava va lavako ku gondza zvin’wani xungetano hi Bhibhiliya. Kota lezvi a Bhibhiliya gi nga bhuku gi mahelweko ku vhuna vanhu vontlhe, handle ko kanakana hontlheni hi ta vhuneka hi ku vhuxeta lezvi gi gondzisako niku lezvo zvi nga hi vhuna a ku kuma litsako la lisine.

Na gi tirisa a mahungu ma nga lomu ka Bhibhiliya, a bhuku legi gi hlawutela a matimu ya vanhu kusukela kuvangiweni ka vona. Ku mahilwe zvontlhe zvi kotekako kasi a bhuku legi gi tlhamusela a matimu ya Bhibhiliya hi ndlela yo olova ni yo zwisiseka khwatsi. Ahandle ka lezvo hi zamile ku ma xaxameta hi kuya hi lezvi ma nga mahekisa zvona.

Kanilezvi, a bhuku legi a gi gumelwi laha ka ku hlawutela a matimu ya Bhibhiliya basi. A mahungu ya gona ni mifota ya kona zvi longiselwe hi ndlela yi mahako lezvaku a matimu ya Bhibhiliya ma hanya ni ku komba lezvi lava hi wulawulako hi vona va nga ti zwisa zvona.

A bhuku legi gi hi vhuna ku zwisisa lezvaku a Bhibhiliya i bhuku gi wulawulako hi vanhu, lava va nga ingisa Jehovha ni lava va nga kala ku mu ingisa. Niku gi tlhela gi hi kuca a ku gondza co kari ka cikombiso cabye. (Va Le Roma 15:4; 1 Va Le Korinte 10:6) A bhuku legi gi avanyisilwe hi 14 wa zvipandze. Kusanguleni ka cipandze cin’we ni cin’wani ku na ni rezumo ya zvilo zvo kari hi to gondza ka cipandze leco.

Loku u hi mupswali u nga lera a cigondzo co kari ni n’wana wa wena mu gumesa mu bhula hi mufota wu nga ka cipimo leco. Hi kulandzela mu lera a mavhesi ya Bhibhiliya lawa a cigondzo leco ci seketelwako ka wona. Vhuna n’wana wa wena lezvaku a zwisisa lezvi a mavhesi lawo a nga lera lomu ka Bhibhiliya ma zwananisako zvona ni lezvi a zvi gondzako ka cigondzo leco. A mahela legi gi nga vhuna kambe loku u kari u vhuna a munhu wa hombe lezvaku a kuma masemanyana ya lezvi a Bhibhiliya gi wulawulako hi zvona.

Hi xuva ku a bhuku legi gi vhuna vontlhe va timbilu ta tinene — a vanana ni vahombe — lezvaku va gondza zvokari lomu ka Mhaka ya Nungungulu va tlhela va zvi tirisa wutomini gabye, hakuva loku va maha lezvo vonawu va nga khozela Nungungulu va tlhela vava zviro zva ngango wakwe a wu randzako nguvhu.