Pimanyisa a kukholwa kabye

1. Zini hi to gonza ka Xigonzo xa Biblia xa Bandla kusukela ka viki ga 19 ka Outubro?

¹ Ka viki ga 19 ka Outubro wa 2015, hi ta sangula ku gonza a bhuku Pimanyisa a kukholwa kabye ka Xigonzo xa Biblia xa Bandla. A bhuku legi gi tlhamusela a matimu ya Biblia ya 14 wa vavanuna ni vavasati va kukholwa. Gi tsalilwe hi ndlela yi hi vunako ku wona a vanhu lavo maalakanyweni ya hina, gi tlhela gi hi vuna ku va wona kota vanhu va lisine lava va yimiseneko ni zikarato hi kota ya ku tirela Jehova. A bhuku legi gi komba a zigonzo kambe hi zi kumako ka matimu lawo kasi ku hi vuna ku wona lezi ma nga hi vunisako zona nyamutlha. — Maheb. 6:12.

2. Tlhamusela a matshamela ya bhuku Pimanyisa a kukholwa kabye.

² Matshamela: A bhuku legi gi kombisa a zikhati ni mimapa yi to hi vuna ku wona a xikhati ni wutshamu legi munhu munwe ni munwani a hanyileko ka gona. Tlhatakumbiri, a xipimo xinwe ni xinwani xi na ni xipanze xi nge “Alakanyela lezi . . . ,” lexi xi to hi vuna ku ehleketa hi matimu lawo ni kuva hi tirisa a zigonzo lezi hi zi kumako ka wona. A bhuku legi gi tele kambe hi mifananiso yi kambisisilweko khwatsi, yi tlhela yi tsaliwa khwatsi ni ku sasekiselwa hi mivala, lezi zi hi vunako ku zwisisa khwatsi a matimu lawo.

3. Hi nga maha yini kasi ku vuneka hi xigonzo xa bhuku legi?

³ Ndlela ya ku vuneka: A papilo ga Hubye yi fumako legi gi nga kusanguleni gi hi kuca hi magezu lawa: “Tirisa a wuzikoti ga wena ga ku alakanyela; ti wone na u hi kwaseyo. Zama kuzwa lezi zi zwilweko hi vanhu lava ku wulawuliwako hi vona lomu ka Biblia, ni ku wona lezi va zi wonileko. Ecanyisa lezi va mahileko ka ziyimo zo kari ni lezi wena u nga wa ta ngha u zi mahile.” A ku tirisa wuzikoti ga wena ga ku alakanyela a zi wuli ku alakanyela zilo zo hunzeleta, kanilezi zi wula ku alakanyela lezi a matimu lawo ma pimisilweko ma wulako zona ni ku ti wona u hi ka xiyimo xa vanhu lavo. A ku maha lezo zi lava xikhati ni kuehleketa. (Neh. 8:8) Loku a xigonzo lexo xi sangula lomu xikari ka xipimo, a mufambisi i fanele ku sangula hi ku vuxeta timhaka ta xigonzo xi hunzileko hi 30 wa tisegundo kutani meneti. A nga ha maha xiwutiso xinwe kutani zimbiri kasi ku vuxeta xigonzo lexo loku xi nga hi na xipanze lexi xi nge “Alakanyela lezi . . . ”

4. Hikuyini hi faneleko ku gonza a bhuku Pimanyisa a kukholwa kabye?

⁴ A tiko legi hi hanyako ka gona gi zama ku daya kutani ku hungula a kukholwa ka hina hi tindlela to hambanahambana. A bhuku legi — zinwe ni xaxamelo wa tinzima ta Murinzeli leti gi seketelwako ka tona — xinyikiwo xi tako hi ka Jehova kasi ku hi vuna ku tiyisa a kukholwa ka hina. (Jak. 1:17) Ngha hi lonzowota khwatsi a xigonzo xa bhuku legi hi kuva kona ka Xigonzo xa Biblia xa Bandla hi kukhanzakanya hi tlhela hi nyikela mihlamulo hi laha zi kotekako hi kona a xikhati hi gi gonzako zinwe!