Kanela a mhaka xikhatini xa zikarato A timhaka leti ti susiwa ka Anuário das Testemunhas de Jeová — 2012

Phajina 72, tinzimana 1-2 — Índia

WUKUSTUMUNYU LOMU PAXWENI. Le Índia, a vamakabye vambiri va xisati va lo khonwa na va hi kuxumayeleni va konelwa ku tshama ntlhanu wa masiku lomu paxweni. A munwe wabye i hlawutela lezi: “Neti hi nga chikela le paxweni, a maphoyisa ma lo hi wutisa ku hikuyini hi khomilweko. Lezo zi hi vululele ndlela ya ku hi va nyika wukustumunyu. Lezi hi nga khonwa na hi hi ntirweni wa simu, hi wa hi ni marevista yo tala ni ziphephana zo tala kambe. Hi lo xumayela vontlhe hi tlhela hi nyikela mabhuku yo tala. Hi tiyisene hlana, hi khongela hi tlhela hi gonza a mabhuku hi nga hi nawo.

“Anzhako ka lezo, hi rurisilwe hiya ka paxo ginwani laha doropeni. Zalezo hi nga chikela, a zibochwa zi lo hi wutisa ku hi khonwelwa yini. Lezo zi hi vululele ndlela ya kuva hi va byela lezi hi nga kari hi xumayela hi tlhela hi ti tivekisa kota Timboni ta Jehova. A hosana yo kari ya wasati yi lo hizwa yiku, ‘Nwina mu khomilwe hi ku xumayela le handle, zalezi mu xumayela lomu paxweni!’” Zalezi, a vamakabye lava va kari va maha makungo ya ku enzela a zibochwa lezi zi kombisileko kutsakela a lisine.

Phajina 156 nzimana 2, kala phajina 157 nzimana 1 — Noruega

KASI KU HUNGULA NTAMU WA MAHUNGU YO BIHA YA ZIHAXA-MAHUNGU

Nguvunguvu ka malembe ya 1989 kala 1992, a Timboni ta Jehova le Noruega ti lo mahelwa tsima ga ku ti chakisa, ku tlhela ku haxiwa mahungu yo biha xungetano hi tona lomu ka maphepha-hungu, marevista, tiradio, ni ka televizawu. A xinwe xa zigelo-tshinya za kuvukelwa loko xi wa hi kuingisa ka hina lezi a Biblia gi zi wulako xungetano hi lava va susilweko bandleni. (1 Kor. 5:9-13; 2 Joh. 10) A mahungu lawo yo biha ma mahile lezaku a Timboni ta Jehova ti yimisana ni zikarato wutirelini, ntirweni, xikoleni ni laha ngangweni. Hambu lezi a valanzeli va Jesu va kalako va nga hlamali loku va rukiwa, a xikarato lexi a xi va olovelangi a ku yimisana naxo. — Mat. 5:11, 12.

A makabye wo kari i tlhamusela lezi: “Lexi xi’ve xikhati xo nonoha, kanilezi xi nzi vunile kambe. Xi nzi mahile nzi kambisisa a xiseketelo xa kukholwa ka mina Mitsalweni. Zi wa tiyisa kukholwa ka hina a ku ehleketa hi zakuga za zi nene za moya lezi hi longiselelwako hi nanza gi tsumbekileko ni go tlhariha. Kota wuyelo, nzi alakanya ku lezi zi hi tiyisile kasi ku yimisana ni ziringo za kukholwa.”

A muwoneleli wo kari wa xipanze i alakanya lezi: “Hi wa kuma ntamu hi ku wona a kutiya-hlana ka vamakabye ka xikhati lexo. Hi wonile lezaku a ndlela ya chukwana ya ku yimisana ni xikarato lexo ku wa hi ku tshingisa nguvu a wutireli ga hina, a ku patsa ni wukustumunyu ga lomu maruweni. Lexi xi tsakisako hi lezaku a Timboni to tala ti vumelile ku maha lezo.”

Phajina 180 nzimana 1 — Ruanda

Phocas Hakizumwami i alakanya lezi na a xalele: “A vamakabye va bandla ga Nyabisindu va maha xipanze xa lava va nga ranga va khomiwa. Kota lezi hi nga zi tiva lezaku hi wa ta khomiwa ni ka xihi xikhati, hi wonile lezaku a xipanze xa hina xa kuxumayela xi wa ta cica xi nga havi lahandle ka paxo kanilezi kuva lomu paxweni. Hikwalaho hi lo boha ku ranga hi ku maha a tsima ga hombe ga ku xumayela ka xipanze xa hina xa ‘lahandle’ ka paxo. Hi xumayele mabazarini hi tlhela hi nyikela a marevista ni mabhuku yo tala. Hi khongele ka Jehova lezaku a hi vuna ku tlhanganyisa a xipanze xa hina na hi nga se khonwa. Jehova i hi vunile, hakuva hi tlhanganyisile a xipanze xa hina hi 1 ka Outubro wa 1985. Hi lota khonwa ntlhano wa masiku ni mambiri nzhako.”

Phajina 110

“I wa hi tangalisa nguvu”

WILHELM UHRE

KUPSWALIWA 1901 KUBAPATIZWA 1949

MATIMU YA WUTOMI Muxumayeli wo hiseka hambu lezi a nga hi xikhurubu.

◼ WILHELM i wa hi ni mababyi ma khwanyisileko a milenge yakwe ma tlhela ma mu maha a nga wulawuli khwatsi. Hambulezo, neti a ngazwa mahungu yo saseka hi va 1930, i tekele ku sangula ku bhulela vanwani a lisine lo tsakisa leli a nga li gonza. I wa tirisa a mota wakwe wa maroda manharu kasi kuya ntirweni wa kuxumayela niku i wa khanzakanya kuya yipswheni ya Sortland, le Vesterålen kasi ku ya bisa tikanelo ti seketelweko ka Biblia hi gramafoni ni ku nyikela mabhuku. Kota lezi a nga hi xikhurubu a tlhela a hanya kule, i hlwelile ku bapatizwa. I bapatizilwe hi 1949. Kanilezi i wa hi muxumayeli wo hiseka. A vanhu vo tala lava va nga enza mbhirini ya bimbi va gonzisilwe a lisine hi yena, niku a vo kari va kona va mahile Timboni ta Jehova.

A xikhati lexi Wilhelm a nga kumba, i hanyile ka muti wa ku hlayisa zikhosana le Tromso. Na a vunetelwa hi vahuweleli vanwani, i simamile a nyikela wukustumunyu hi ku tirisa mapapilo. Lezi a nga hi munhu wa wunghana ni wo tsakisa, i wa chavelela vanwani, a ku patsa ni vatiri va laha ka muti lowo. A xikhati lexi a ngafa, a wasati loyi a nga wonelela a muti lowo i te ngalo: “Zi wa hi tsakisa a xikhati xontlhe ku mu enzela ndlwini yakwe. I wa hi tangalisa nguvu hi kota ya kukholwa kakwe.”