A tsima ga Xialakanyiso gi sangula hi 1 ka Março
1. Hi ta sangula rini ku huwelela a Xialakanyiso, niku hikuyini a tsima ga kona gi to leha lembe legi?
1 Hi Wazihlanu wa 1 ka Março hi ta sangula a tsima ga hina ga lembe ga ku ramba vanhu lezaku va tava na hina Xialakanyisweni. A Xialakanyiso xi ta mahiwa hi 26 ka Março, lezi zi kombako lezaku a tsima gi ta lehanyana ku hunza malembe ma nga hunza. Lezo zi ta nyika a vanhu vo tala a lungelo ga ku amukela xirambo, nguvunguvu lava va hanyako ka matshamu lawa a bandla gi nga ni xipanze xa hombe xa simu.
2. Malulamiselo muni ma to lanzelwa ka ku teka zirambo ni ku zi nyikela xipanzeni?
2 Malulamiselo: A madota ma ta nyika zileletelo xungetano hi lezi hi to nyikelisa zona zirambo, ma tlhela ma boha ku hi nga siya zirambo mitini leyi hi vumalako vanhu ke. Loku hi mbheta xipanze xa ku famba hi muti ni muti na ka ha sele zirambo, hi nga ha zi nyikela lomu maruweni kutani mabazarini. A muwoneleli wa ntiro i fanele ku maha zontlhe zi lavekako kasi ku laha balkawu kuva ni zirambo lezaku a vahuweleli va zi kuma, kanilezi a ku faneli ku vekiwa zontlhe hi khati ginwe. Hi fanele ku teka ntsena a zirambo lezi hi to zi lava ka viki lego.
3. Xini hi faneleko ku xi alakanya loku hi kari hi nyikela a zirambo?
3 Hi ta wula yini? I chukwana hi komisa bhulo. Lezo zi ta hi vuna ku nyikela zirambo ka vanhu vo tala nguvu hi laha zi kotekako hi kona. Ka phajina 6 ku na ni xingheniso lexi hi nga xi cicako hi xi zwananisa ni xipanze xa hina. Hambulezo, a hi faneli ku tsutsuma hi famba loku hi wona lezaku a nwinyi wa muti wa kombisa wunghana kutani i na ni ziwutiso. Loku hi kari hi nyikela zirambo kumbheleni ka viki, hi fanele ku nyikela ni marevista loku hi wona lezaku za ringana. Hi 2 ka Março, hi ta veka kupima kunyikeleni ka zirambo wutshanwini ga ku sangula a zigonzo za Biblia.
4. Hikuyini hi faneleko ku tira hi kuhiseka tsimeni ga Xialakanyiso?
4 Hi na ni kurinzela ka lezaku a vanhu vo tala va tava na hina Xialakanyisweni. A kanelo yi ta tlhamusela a ku Jesu himani hakunene. (1 Kor. 11:26) Yi ta hi komba lezi a kufa kakwe ku hi vunisako zona. (Rom. 6:23) Yi ta komba kambe a ku hikuyini zi nga za lisima a ku mu alakanya. (Joh. 17:3) Ngha hina hontlheni hi tira hi kuhiseka tsimeni legi!