Lisima la ku nga hatliseli ku tsukula — A timhaka leti ti susilwe ka Anuário das Testemunhas de Jeová de 2013

Phajina 45 nzimana 1, kala phajina 46 nzimana 1 — Afrika

Zi nga koteka a ku hi wulawula naye?’

A muwoneleli wo kari wa xipanze le Etiópia i wa kari a xumayela ni makabye munwani hi muti ni muti. Ka muti wo kari, va lo ya kuma a wasati wo tira, va mu wutisa ku zi nga koteka a ku va wulawula ni nwinyi wa muti ke. A xikhati a ngaku a zi koteki, va lo mu wutisa lezaku va nga mu siyela mabhuku yo ya mu nyika ke. I lo suka a ya mu wutisa, zonake a wuya a taku i lava ku ranga hi ku ma wona.

A vamakabye va lo mu nyika revista kasi ku ya mu komba. Anzhako ka timeneti titsongwani, i lo wuya a ta wula lezaku i vumele. A munwe wa vamakabye lavo aku: “Loku zi nga koteki a kuva ata, hi nga nghena hina hi wulawula naye?” I lo tlhela kambe a ya wutisa. Ka khati legi i lo ya hlwela nguvu laha kaku a vamakabye va sangula ku kanakana lezaku i ta wuya. Hi kugumesa i lo wuya a ta va byela lezaku va nghena. Makunu a vamakabye lavo va lo tiva lezaku a nwinyi wa muti, Yirgu, i wa hi munhu a khosaheleko loyi a nga hi ni khume ga malembe na a nga zi koti ku suka laha mubhedini, ge hambu ku vuka a tshama. A xigelo xa kuva a wasati loye a hlwelile hi lezaku i wo mu vuna ku boha tinguwo ni ku longisela khwatsi lomu ndlwini.

A vamakabye va lo mu bhulela mahungu yo saseka. Hi ku tsakiswa hi lezi a nga zizwa, Yirgu i lo vumela xigonzo xa Biblia. Laha a xigonzo xi ngaya mahlweni, i lo chukwata mababyi yakwe. Makunu i wa zi kota ku vuka laha mubhedini a fambafamba hi xitulo xa maroda. Zalezo i lo sangula kuya mitlhanganweni niku i lo bapatizwa ka gotsovanyano wa ha hi ku hunzako.