U ta lonzowota lungelo ke?
A Xialakanyiso xi tako xi hi vululela ndlela yo kombisa kubonga
1. I lungelo muni go hlawuleka hi nyikiwako hi Xialakanyiso?
1 A Xialakanyiso xi to mahiwa hi 14 ka Abril xi hi vululela ndlela ya ku hlakulela ni ku kombisa kubonga a wunene ga Jehova. A matimu ma nga ka Luka 17:11-18 ma komba lezi Jehova na Jesu va ku wonisako zona kubonga. Ka khume ga vanhu va hlokonho lava va hanyisilweko, ku no tlhela munwe ntsena a ya kombisa kubonga. Xikhatini xi tako, a xinyikiwo xa nzhiho xi ta hanyisa vanhu ka tinghumbe tontlhe, zonake va kuma wutomi ga pinzukelwa! Handle ko kanakana, hi ta bonga Jehova siku ni siku hi makatekwa lawo. Kanilezi, hi nga kombisisa kuyini kubonga ka hina ka maviki ma tako?
2. Hi nga maha yini kasi ku engetela a kubonga ka hina a nzhiho?
2 Engetela kubonga: A kubonga kuta hi maalakanyweni. Kasi ku hi vuna ku engetela a kubonga ka hina a nzhiho, ku na ni longoloko wa kugonza ka Biblia ko hlawuleka ka nguva ya Xialakanyiso ka matshamu yo hambanahambana, yo kota xibhukwana Kambisisa a Mitsalo siku ni siku, ni kalendari. Hikuyini mu nga gonzi mavesi lawo hi ngango? A ku maha lezo zi ta engetela a kubonga ka hina a nzhiho. Hi tlhelo ginwani, lezo zi ta khumba mahanyela ya hina hi ndlela yi nene. — 2 Kor. 5:14, 15; 1 Joh. 4:11.
3. Hi nga kombisisa kuyini kubonga nguveni ya Xialakanyiso?
3 Kombisa kubonga: A kubonga ku kombiswa hi mitiro. (Kol. 3:15) A wanuna wa hlokonho loyi a nga hi ni kubonga i lo lavetela Jesu a mu bonga. Handle ko kanakana, i tlhelile a hlawutela vanwani hi kuhiseka lezi a nga hanyisiswa zona hi xihlamaliso. (Luka 6:45) Xana a kubonga ka hina nzhiho ku ta hi kuca ku tira hi kuhiseka tsimeni ga ku huwelela Xialakanyiso ke? A ku teka wuphayona go vunetela kutani ku tira nguvu wutirelini nguveni ya Xialakanyiso i ndlela yinwani ya yi nene ya ku kombisa kubonga. Ka wusiku ga Xialakanyiso, a mbilu yi teleko hi kubonga yi ta hi kuca ku hoyozela vapfhumba ni ku tlhatlheka ku hlamula ziwutiso zabye.
4. Hi nga maha yini kasi hi nga ti soli anzhako ka Xialakanyiso lexi?
4 Xana a Xialakanyiso lexi xi tava xo gumesa? (1 Kor. 11:26) A hi zi tivi. Kanilezi lexi hi xi tivako hi lezaku loku xi kala xi hunza, ku tava ku hunzile lungelo go hlawuleka go kombisa kubonga. U ta gi lonzowota ke? Ngha a magezu ya kubonga ya milomu ya hina ni kuehleketa ka mbilu ya hina zi tsakisa Jehova, a Munyiki wa nzhiho. — Tis. 19:14.