Mianmar

Maphajina 104 ni 105

Jehova i lo nzi nyika moya wuswa

WILSON THEIN

LEMBE GA KUPSWALIWA 1924

LEMBE GA KUBAPATIZWA 1955

MATIMU A wanuna loyi a nga hi xigevenga i lo ti karata nguvu kasi ku cica wumunhu gakwe. Zalezi i na ni 54 wa malembe na a tira kota phayona go hlawuleka.

NA NZA ha hi muswa, nzi lo gonza boksi, ni kharati, ni judo. Kota wuyelo, nzi lova munhu wa tihanyi ni xizangazangani. Laha nzi nga hi ni 19 wa malembe, nzi lova ka ntlawa wa zigevenga zi nga tirisa zibhamu. Hi magumo nzi lo khonwa, nzi ya tshama ntlhanu wa malembe ni manharu paxweni, laha nzi nga ehleketa hi mahanyela ya mina yo biha nzi tlhela nzi khongela nguvu. Nzi wa zi lava ku tiva Nungungulu.

A xikhati nzi nga huma paxweni, nzi lo rura nziya Yangon, laha nzi nga ya sangula kuya mitlhanganweni ya Timboni ta Jehova. Hi magumo, nzi lo ringanelwa hi kubapatizwa, hi ku vuniwa hi vamakabye vo hambanahambana va va nene.

Anzhako ka kubapatizwa, nzi wa halwa yimpi kasi ku kombisa wumunhu ga wuKristu. (Efe. 4:24) Nzi wa tolovela ku solasola vanwani ni ku hatlisa ku va zangarela. Nzi wa lava kuva munhu wa mu nene kanilezi zi wa nzi karatela a ku fumela kutizwa ka mina. Nzi wa ti wona na nzi nga vuni nchumu, hikwalaho nzi wa tshuka nziya congweni nzi ya mbheta tihora to tala na nzi rila.

Hi 1957, nzi lo kuma xiavelo xova phayona go hlawuleka. A xo ranga ku wa hi kuya Mandalay. Nzi lo ya tira zinwe na Robert Richards, a nga hi murumiwa. Robert i wa fana ni papai ka mina. I lo nzi gonzisa ku veka kupima ka matshamela ma nene ya vanhu ni kuva nzi alakanya a kungambheleli ka mina wutsumbu. (Gal. 5:22, 23) Khati ni khati nzi nga zangara, nzi wa tsutsumela ka Jehova lezaku a nzi nyika ‘moya wuswa, wo tiya’ lowu wu rangelwako hi kurula. (Tis. 51:10) Jehova i lo hlamula mikhongelo ya mina, niku a wumunhu ga mina gi loya gi chukwata.

Hi kufamba ka xikhati, nzi lo gonza ni wanuna wa 80 wa malembe a nga hi wa chechi ya Batista. A vanhu va chechi yakwe va lo nzi zangarela vaku nza va “yivela” tiyivu tabye. A munwe wabye i lo nzi komba mukwana aku: “Xionho ku daya munhu?” Nzi lo vila hi zanga lomu mbilwini. Nzi lo tekela ku maha mukhongelo wa lomu mbilwini nzi guma nzi hlamula na nzi rulile nziku: “Hlamula ha wece.” A wanuna loye i lo nzi tsika, a suka a famba. Nzi lo bonga Jehova hi ku nzi vuna ku simama nzi rulile. Xikhatanyana nzhako ka lezo, a xigonzani xa mina xo khosahala xi lo bapatizwa, xi tlhela xi simama kuva Mboni yo tsumbeka kala kufeni.

Kufambeni ka malembe, nzi lo tira ka 17 wa matshamu yo hambana kota phayona go hlawuleka nzi tlhela nzi vuna 64 wa vanhu lezaku va gonza lisine. Loku nzi ehleketa hi wunene legi Jehova a nzi maheleko, a mahlo ya mina mo tala hi mihloti ya kutsaka. I vunile jaha ga tihanyi, ga xizangazangani, legi gi nga hi hava litsako lezaku giva ni moya wuswa wo rula.

[Tlhamuselo wa mifota ka phajina 4]

Nzi wa ti wona na nzi nga vuni nchumu, hikwalaho nzi wa tshuka nziya congweni nzi ya mbheta tihora to tala na nzi rila