Wutomi go tsakisa ga wurumiwa. (Mav. 10:22) — A timhaka leti ti susilwe ka Anuário das Testemunhas de Jeová de 2014
Phajina 124 nzimana 1 kala phajina 127 nzimana 4
A varumiwa vo hiseka va engetela a kuanza ka ntiro
Kusukela hi va 1975 kuya mahlweni, a varumiwa lava va nga pasa a xikola xa Gileadi va wa nga nyimi ku chikela, hi ndlela leyo va tsutsumisa ntiro wa ku xumayela le Serra Leoa ni Guiné. A vokari va wa tirile ka matiko manwani ya Afrika niku zalezo va lo ti zwananisa ni matshamela ya xipanze lexi. A vokari va wa hi vaswa Afrika. Xana va wa ta yimisanisa kuyini ni “wutshamu lego go kala ku yelana ni miri wa vanhu va hlonge yo basa”? Wona zo kari za lezi va zi tshanzako.
“Va wa hi vanhu vo ti koramisa ni va ndlala hi tlhelo ga moya. A ku wona lisine na li cica wutomi gabye zi lo nzi nehela litsako la hombe.” — Hannelore Altmeyer.
“A kuhisa ni mababyi ku wa hi xona xikarato xa hombe. Kanilezi a litsako li ngata hi ku vuna vanhu va timbilu ti nene lezaku va tirela Jehova li wa fenengeta zontlhe lezo.” — Cheryl Ferguson.
“Nzi lo gonza kuva ni lihlaza-mbilu. Loku ka siku go kari nzi wutisile a makabye wo kari wa xisati lezaku xana a vapfhumba vakwe va wa ta chikela rini, i lo hlamula lezi: ‘Kuzilava nyamutlha. Kuzilava manziko. Kutani mundlwani.’ Kuzilava nzi kombisile kukarateka ka hombe hakuva i lo engeta aku: ‘Kanilezi va tata!’” — Christine Jones.
“Ka muti wa varumiwa le Freetown ku wa tshama a 14 wa varumiwa va ngata hi ka midawuko yo hambanahambana ni va mahanyela yo hambana. Hi wa hlengela a zikoti zimbiri, xuveru munwe, muchini wunwe wo hlaza, ni xitanga xinwe. A zakuga zi wa kala niku zi wa hi za xiyimo xa lahasi. A zikhati zinwani hi wa tshama masiku na hi nga hi na magezi. A kutala ka hina hi wa xaniseka hi malaria ni mababyi manwani ma nga vangiwa hi kuhisa. Hambu lezi zi nga wonekisa ku khwatsi xiringo, hi gonzile ku hanya zinwe hi kuzwanana, ku tsetselelana, ni kuva hi hleka ka ziyimo zo karata. A ku xumayela ku wa tsakisa, niku a varumiwa va lo maha vanghana va hombe.” — Robert na Pauline Landis.
“A xikhati lexi hi nga mbheta le Serra Leoa xive xinwe xa masiku ya ma nene ya wutomi ga hina. A hi ti layi ge hambu ku khala hi xokari. Hi xi xuva nguvu a xikhati lexo.” — Benjamin na Monica Martin.
“Ka siku go kari hi wa hi ka muti wa wasati wo kari wo tsakela, loyi a nga hi nyika zakuga zo kala ku toloveleka. I lo wula lezi: ‘I phiri. Kanilezi nzi susile matino ya gona. Nzi nga mu phamela yi tsongwani?’ Hambu lezi hi nga ala hi ndlela ya xichawo, i lo hi kurumeta kuga. Hambu lezi a ziyimo zo kota lezi zi nga binza, hi wa bonga nguvu a moya wabye wa kururela niku hi wa va ranza nguvu hi kota ya lezo.” — Frederick na Barbara Morrisey.
“Ka 43 wa malembe lawa nzi nga nawo ntirweni wa wurumiwa, nzi lo hanya zinwe ni 100 wa varumiwa ni ku hunza. Gi vile lungelo ga hombe nguvu a ku tiva vanhu vo tala, na munwe ni munwani a hi ni matshamela yakwe, kanilezi na va tirela kungo ginwe. Niku hi nga wona kutsakisa ka zona a kuva mutiri-kulori na Nungungulu ni ku wona vanhu na va khoma lisine hi mandla mambiri!” — Lynette Peters.
Kusukela hi 1947, ku tirile a 154 wa varumiwa le Serra Leoa, ni 88 wa vona le Guiné. A Timboni tinwani to tala ti lo ta xumayela ka matiko lawa ku nga hi ni xilaveko xa hombe. Inyamutlha ku ni 44 wa varumiwa le Serra Leoa ni 31 Guiné. A kutikarata kabye ku khumbile timbilu ta vanhu vo tala. Alfred Gunn, a nga xiro xa Kometi ya Ravi hi xikhati xo leha, i ngalo, “Ha va xuva nguvu.”