Vuneka hi Anuário de 2015

A mahungu lawa ma susilwe ka Anuário das Testemunhas de Jeová de 2015

Papilo ga Hubye yi Fumako

Vamakabye va hina va ranzekako:

“Hina ha bonga Nungungulu xontlhe xikhati ha nwina nwentlhe, na hi mu alakanya kukhongeleni ka hina. Xontlhe xikhati hi alakanya a ntiro wa nwina wa kukholwa, ni kupinyama ka liranzo, ni kutiya ka nwina kutsumbeni ka Hosi ya hina Jesu Kristu, a mahlweni ka Nungungulu a Dadani wa hina.” (1 Tes. 1:2, 3) A magezu lawa ma komba hi ndlela yo saseka lezi hi ti zwisako zona hi nwina! Hi bonga Jehova hi nwina ni ntiro wo saseka lowu mu wu mahako. Hikuyini?

Nwecemu, mu wa khomekile hi ku maha ‘ntiro wa kukholwa’ ni “kupinyama ka liranzo” mitirweni ya Mufumo. A kutala ka nwina mu lavile tindlela ta ku anzisa a wutireli ga nwina. A vo kari va rurile kasi ku ya tira ka matshamu ma nga ni xilaveko xa hombe xa vavangeli va Mufumo, niku a vanwani va zile vaya ni matiko-wundle. A vanwani va anzisile wutireli gabye hi ku maha wukustumunyu ga laha kubaseni. A vo tala va lo kuceka ku teka wuphayona go vunetela nguveni ya Xialakanyiso, ka hweti leyi va nga enzelwa hi muwoneleli wa xipanze, kutani tsimeni go hlawuleka hi Agosto wa 2014. Hambu lezi a ziyimo za nwina zi hambanako, ha zi wona lezaku mu tirela Jehova hi muhefemulo wontlhe, niku ha mu dzunza hi lezo. (Kol. 3:23, 24) A ‘ntiro wa nwina wa kukholwa’ xigelo xa kuva hi bonga Jehova hakunene!

Hi xalele nguvu kambe ‘kupinyama ka nwina ka liranzo’ mayelano ni kuakiwa ka tiyindlu to hambanahambana ta Mufumo matlhelweni yo tala ya misava. Hi na ni xilaveko xa xihatla xa tiyindlu leto, kota lezi a ntsengo wa vanhu va tirelako Jehova wu yako u kula. (Isa. 60:22) Hi nga alakanyela: A ntsengo wa vahuweleli ka lembe gi nga hunza wu vile 8.201.545, kasi lezo ku wa fambisiwa xipimo xa 9.499.933 wa zigonzo za Biblia hweti ni hweti. Kota mbhanzu wa kukula loko, a tihofisa to tala ta ravi ti na xilaveko xa ku anzisa kutani ku aketa a tiyindlu ta tona. Kunene, lezo zi komba kambe lezaku hi na ni xilaveko xa tiSalawu tinwani ta Mufumo! Ka laveka a tihofisa ta wuhunzuluseli kambe matlhelweni yo tala ya misava kasi a vahunzuluseli va hina va hanya va tlhela va tira lomu a lirimi labye li wulawulwako kona.

Hikwalaho, hi nga ha ti wutisa lezi, ‘Nzi nga maha yini kasi ku seketela a kuakiwa ka tiyindlu leto ke?’ A vo kari va hina va nga zi kota ku tira hi kuziranza kuakeni loko. Niku kani hi na ni wutlhari ga kuaka kani a hi nago, hontlheni hi na ni lungelo ga ku nyikela tshomba ya hina kasi ku vunetela a mitiro leyi ya lisima. (Mav. 3:9, 10) Xikhatini xa kuakiwa ka tabernakeli, a vaIsraeli va lo kuceka nguvu ku nyika laha ka kuza ku mahiwa xitiviso kasi ku va nyimisa ku maha minyikelo. (Ekso. 36:5-7) Handle ko kanakana, a zikombiso lezo za Mitsalo za khumba timbilu ta hina zi tlhela zi hi kuca. A “ntiro wa nwina wa kukholwa” zipanzeni lezi za lisima za ntiro wa hina wo basa xigelo xinwani xi hi mahako hi bonga Jehova!

Hi kuma xigelo xa hombe xa ku tsaka a xikhati hi wonako a kutimisela ka vamakabye va hina. Hi xikombiso, ehleketa hi vamakabye va hina vo ranzeka va le Coreia do Sul. Kusukela 1950, a vaswa vo tala tikweni lego va valelwa paxweni hi kota ya lezi va nga vumeliko ku tshova a xiyimo xabye xa wuKristu xa ku nga ti ngheniseli ka zilo za tiko. A zizukulwana ni zizukulwana za vamakabye va hina zi timisela a tixanisa leto na zi nga tshuki zi rereka. A xikombiso xabye xa ku timisela xa tiyisa a kukholwa ka hina!

Le Eritreia, ku valelwe vamakabye va hina va vanharu hi 20 wa malembe ni ku hunza. A vanwani, a ku patsa ni vamakabye va hina va xisati zinwe ni vanana vabye, va lo valelwa hi xikhatana xi tsongwani. Ku kari ku mahiwa mizamo ya hombe kasi ku va tlhatlhisa, kanilezi kala lezi za ha fana ni nyuko wa mbyana. A vamakabye va hina a va tshovi kutsumbeka kabye. Va simama va tsumbekile hambu ka ziyimo zo tshisa. A hi rivali vamakabye lavo vo tsumbeka mikhongelweni ya hina. — Rom. 1:8, 9.

Lisine lezaku a kutala ka nwina a mu valelwangi mapaxweni hi kota ya kukholwa ka nwina. Kanilezi, a kutala ka nwina mu lwisana ni zikarato za kukhosahala, mababyi yo kala ma nga hunzi, kukanetwa hi vanghana va wukati kutani maxaka ma nga kholwiko, ni zikarato zinwani zi tiviwako hi nwina nwece. Hambulezo, mu simama mu tirela Jehova hi kutsumbeka! (Jak. 1:12) Ha mu dzunza nguvu. A kutimisela ka nwina hi xinwani xigelo hi nga naxo xa ku bonga Jehova.

Kunene, a ntiro wa nwina wa kukholwa, a kupinyama ka nwina ka liranzo, ni kutimisela ka nwina zi hi nyika zigelo zo saseka za ku ‘khesa Jehova, hakuva i nene.’ (Tis. 106:1) Ha mu ranza nguvu nwina nwentlhe, niku hi khongelela lezaku Jehova a mu tiyisa, a mu seketela, a tlhela a mu katekisa kasi mu mu tirela kala kupinzuka.

Vamakabye va nwina,

Hubye yi Fumako ya Timboni ta Jehova