Va wa longile ku sangula xigonzo xa Biblia — A timhaka leti ti susilwe ka Anuário das Testemunhas de Jeová de 2015
Amerika
Gabriel i lo vuna a kokwani wakwe
Phajina 55 nzimana 1, kala phajina 56
Na va wuya hi gotsovanyanweni le Paraguai, Gabriel wa 6 wa malembe i lo ehleketa hi lisima la ku xumayela mahungu ya Mufumo. I lo pola lezaku ku ni munhu wo hlawuleka loyi a nga lava lezaku vava zinwe Paradiseni — ku nga kokwani wakwe. Kanilezi a kokwani wakwe i wa nga se tshuka a tsakela lisine niku i wa vukela sati wakwe ni vana vakwe, lava va nga hi Timboni.
Ka siku galego, Gabriel i lo kombela a vapswali wakwe lezaku va fonela kokwani wakwe a hanyako Argentina, lezaku va bhula na va wonana. Gabriel i lo tlhamusela kokwani wakwe a ku hikuyini zi nga za lisima nguvu a ku gonza Biblia, a tlhela a mu kombela hi ku kongoma aku, “Vovo, wa zi lava ku gonza na mina?” A kokwani wakwe i lo vumela. Gabriel i lo nyika mawonela ya lezaku va gonza a broxura Ingisa Nungungulu Kasi U Hanya Kala Kupinzuka. Ka tihwetana ti nga lanzela, va lo gonza zinwe a broxura lego. Kota lezi hi wumbiri gabye va nga kala va nga zi koti khwatsi ku lera, va wa sangula hi ku ti longisela khwatsi. Ka xigonzo xinwe ni xinwani, Gabriel i wa longisela a tlhela a boha hembe ni thayi.
Hi nzhako ka xikhati, a vakokwani vakwe va lo boha ku enzela a ngango wa Gabriel hi maviki matsongwani. Nzeni ka xikhati lexo, a kokwani wakwe i lo famba zinwe ni ngango mitlhanganweni. A xikhati lexi a kokwani wa Gabriel a nga tlhela Argentina, i lo simama ku gonza a Biblia ni makabye wa kwaseyo a tlhela a kula hi tlhelo ga moya laha kuza a maha muhuweleli a nga bapatizwangiko. Zalezi a vakokwani va Gabriel va khongela zinwe siku ni siku. Gabriel yenawu i lo kula hi tlhelo ga moya. Zalezi yenawu muhuweleli a nga bapatizwangiko. A kokwani wakwe i kombisa kuxuva ka kuva a kombisa kutihendleleta kakwe ka Jehova hi ku bapatizwa hi mati.
Europa
Xigonzo xa Biblia xa lomu “khwatini”
Phajina 69, tinzimana 2-5
Mixo ni mixo Margret i wa ti tolola ni mbyana yakwe ka khwati go kari le Alemanya. I ngalo: “Nzi ti karatela ku bhula ni lava va hunzako. Loku va nga jahangi, nzi yisa bhulo ga hina ka Biblia.”
Ka siku go kari i lo kumana ni wasati a nga hi kwalomo ka 70 wa malembe loyi yenawo a nga kari a ti tolola ni mbyana yakwe. Margret i lo sangula bhulo hi wasati loye. A wasati loye i lo xalala hi mabhulo lawo a tlhela a byela Margret lezaku wa khongela ka Nungungulu ni ku lera Biblia siku ni siku. Kusukela kwalaho, va wa kumana siku ni siku va bhula hi zilo za moya. Ka siku go kari, a wasati loye i lo wutisa Margret aku: “U gi kuma kwihi a wutivi gontlhe lego ga Biblia?” Margret i lo mu byela lezaku i Mboni ya Jehova.
Margret i lo zama makhati yo tala a ku sangula xigonzo xa Biblia ni wasati loye, kanilezi i wa nga vumeli. Hambulezo, a mabhulo ma lo simama. Anzhako ka tihweti to kari, Margret i lo ringisa kambe ku sangula naye xigonzo xa Biblia xa laha kaya. Ka khati legi a wasati loye i lo tlhamusela lezaku i wa chava ku gonza hakuva a wanuna loyi a nga tshama naye i wa ti nyenya a Timboni ta Jehova.
Ka khati gi nga lanzela legi Margret a huma a ti gwimba le khwatini, i lo teka Biblia ni bhuku A Biblia Gi Gonzisako. Laha a nga wona wasati loye, Margret i lo tiya-hlana aku: “Ka khati legi, a nzi lavi ku ku fambisela xigonzo xa Biblia xa laha kaya, kanilezi xigonzo xa Biblia xa lomu ‘khwatini.’” Na a kari a xililika mihloti, a wasati loye i lo tekela ku vumela. Ita “khwatini” ntlhanu wa masiku ni ginwe hi viki kasi ku ta gonza. Hi kuya hi tinguva ni macela, ka zikhati zo kari Margret i fambisa xigonzo xa Biblia na a hi ni xiambulelo ni foki.