U nga byala timbewu ta lisine la Biblia ka maxaka ya wena ke? — A timhaka leti ti susilwe ka Anuário das Testemunhas de Jeová de 2015
Republika Dominicana
Vanhu vo sangula ku pola lisine
Phajina 87, tinzimana 1-2
Hi Mulongiso wa 1 ka Abril wa 1945, Lennart na Virginia Johnson, va nga suka hi xikoleni xa Gileadi, va lo chikela le Ciudad Trujillo (laha zalezi ku nga Santo Domingo), a tsinza wa República Dominicana. Kota vona Timboni to sangula tikweni lego, va lo nghena ka tiko legi a matimu ya gona ma nga hi ya tiyimpi ni kulwisana. A Anuário ga 1946 gi lo tlhamusela lezi: “Hakunene lexi xipanze xa ku phayona ka xona, niku a zigonzani lezi za Gileadi zi wa fanele ku sangula hi laha tshinyeni.” Hi nga ehleketa: Ku wa nga hi na hofisa ya ravi, ku wa nga hi na tiSalawu ta Mufumo, ku wa nga hi na mabandla. A varumiwa lavo va wa nga tivi munhu tikweni lego, va wa nga xi tivi khwatsi a xiPanyoli, niku va wa nga hi na muti ge hambu zibya. Va wa ta ku yini?
Lennart i ngalo: “Hi loya ka Hotela ya Victória, hi ya kuma ko hanya kona — ntlhanu wa madolari hi siku hi wumbiri ga hina, a ku patsa ni zakuga. Ka muphindelo walowo, hi lo sangula xigonzo xo sangula xa Biblia. Zi mahisile lezi: A vavasati vambiri va Republika Dominicana hi nga gonza navo Biblia le Brooklyn va wa hi nyikile mavito ya maxaka yabye ni vanhu va nga tivana navo, lava a munwe wabye ku nga hi Dr. Green. A xikhati hi nga mu enzela, hi lo ya kuma ni muakelane wakwe Moses Rollins. Anzhako ka ku tiva lezi hi nga kumisa zona mavito yabye ni lomu va tshamako kona, va lo demba ndleve ka mahungu ya Mufumo va tlhela va vumela xigonzo xa Biblia. Hi xikhati xi tsongwani, Moses i lo maha muhuweleli wo sangula wa Mufumo tikweni lego.”
Republika Dominicana
“Hi taza hi va kuma”
Phajina 90, tinzimana 1-3
Hi 1935, xipanzeni xo kari xi vitwako Cibao Valley, Pablo Gonzalez i lo sangula ku gonza Biblia. I lo ti tlhanganisa hi xikhatanyana ni ntlawa wo kari wa vaProtestante, kanilezi i lo zi tsika a xikhati a nga wona lezaku a mahanyela yabye ma wa nga longoloki ni lezi a nga zi gonzile lomu Mitsalweni. Hambulezo, i lo simama ku ti gonzela Mhaka ya Nungungulu yece a tlhela a sangula ku bhulela vanwani lezi a nga kari a gonza. I lo sangula hi maxaka yakwe ni vaakelani a guma a yela vanwani zipanzeni za wuakelwane. I lo xavisa fusi gakwe ni tihomu takwe, a tirisa mali ya kona ka tienzo takwe to xumayela.
Hi 1942, Pablo i wa enzela 200 wa mingango hi wutsongwani ga kona zipanzeni za wuakelwane a tlhela a fambisa mitlhangano hi kukhanzakanya, hambu lezi a nga kala a nga se tivana ni Timboni ta Jehova. I lo khongotela vanhu lezaku va gonza Biblia va tlhela va hanya hi lezi va nga gonza. A vanhu vo tala va lo zi tekela hlokweni lezi a nga zi wula zonake va tsika ku tirisa fole ni ku teka vasati vo tala.
A munwe wa lava va zwileko mahungu ya Biblia na Pablo kuve Celeste Rosario. I ngalo: “A xikhati nzi nga hi ni 17 wa malembe, a makabye wa mamani wa mina, Negro Jimenez, i wa lumba wunwe wa mitlawa leyi yi nga rangelwa hi Pablo Gonzalez. I lo enzela ngango wa hina, a ta lera mitsalo yo kari ya Biblia, niku zalezo zoce zi lo enela kasi kuva nzi maha xiboho xa ku tsika a Chechi ya Katolika. Lezi va nga hi lerela chechini zi wa hi xiLatini, lexi hi nga kala hi nga xi zwisisi. Xikhatanyana anzhako ka lezo, Pablo i lo hi enzela a ta hi tiyisa hlana. I te ngalo: ‘Hina a hi lumbi ni ginwe ga wukhongeli go tala legi hi gi tivako, kanilezi hi na ni vamakabye misaveni yontlhe. A hi se va tiva ku hi vamani kutani ku va vitaniswa kuyini, kanilezi hi taza hi va kuma.’”