A mahanyela ma nene ma vulula ndlela ya ku byala mbewu ya lisine — A mahungu lawa ma susilwe ka Anuário das Testemunhas de Jeová de 2015
Europa
Lisima la ku kombisa xichawo
Phajina 73
Hi 30 ka Março wa 2014, Vasilii, a nga ni malembe yo hlaya na a lumba ngango wa Beteli wa Rússia, i wa kari a nyika wukustumunyu hi xikarinyana xa mabhuku kusuhani ni hofisa ya ravi, zonake ku chikela mova wa maphoyisa. Ku lo huma phoyisa go kari hi lomu moveni, gi ya kombela Vasilii hi wunene lezaku a nyima ku maha ntiro wakwe, hakuva a vaakelane vo kari va wa sola. A phoyisa ginwani gi lo thepa vidiyu ya mabhulo lawo. Vasilii i lo zi wona zi hi chukwana ku ingisa maphoyisa lawo wutshanwini ga ku lwela tifanelo takwe. Ka xikhati lexo, ku wa nyimile vahunzi vo kari va ndlela kasi ku wona lezi zi nga kari zi maheka. Vasilii i lo suka, kanilezi anzhako ka masiku mambiri i lo kombela ku wulawula ni nduna ya maphoyisa. I lo vumelelwa. Ka mutlhangano lowo, Vasilii i lo bonga nduna leyo hi ntiro wa lisima lowu a maphoyisa ma mahelako vanhu ni lezi va nga wulawula naye hi wunene ka masiku mambiri ma nga hunzile. A nduna leyo yi lo hunzuluka yi byela muvuneteli wa yona yiku: “Nzi na ni 32 wa malembe na nzi tira kota phoyisa, kanilezi a nzi se tshuka nzizwa munhu na a bonga a ntiro wa hina!” Xikari ka mabhulo lawo, a nduna leyo yi lo vuniwa ku zwisisa lezaku a ntiro wa hina wa kuxumayela wa vumelelwa hi nayo. A nduna leyo, yi lo wutisa Vasilii lezaku hikuyini a nga kala ku ala a xikhati lexi a maphoyisa ma nga nyimisa ku tira, na a zi tiva lezaku zi laha nayweni ke. Vasilii i lo hlamula aku: “Nzi na ni xichawo hi maphoyisa. Hi nga alakanya lezi lava va nga hi kona, va nga wa ta ma wonisa zona a maphoyisa lawo loku nzi wa no ma lumbeta ku kala ma nga wu tivi nayo.” A nduna leyo ni muvuneteli wa yona va lo hlamala nguvu, va tlhela va tiyisa Vasilii lezaku i wa nga ta ha karatiwa kambe hi munhu loku a tirisa xikarinyana xakwe ka masiku ma tako.
Republika Dominicana
Maphajina 111-116
‘Jesu hi yena hloko’
Donald Nowills, loyi a nga nyikwa xiavelo xa ku wonelela a ntiro hofiseni ya ravi anzhako ka loku a varumiwa va tlhelisilwe matikweni yabye, i wova ni 20 wa malembe ntsena niku ku wo hunza mune wa malembe basi na a bapatizilwe. Hambu lezi a nga tirile tihwetanyana kota muwoneleli wa xipanze, a ntiro wakwe laha ravini wu wa hi nchumu wa wuswa. Makabye Nowills i wa hi ni xihofisana laha kaya kakwe, lexi xi nga mahilwe hi mapulangu ni tisimbi, xi tshuliwa hi misava. Xi wa hi le Gualey, ku nga hi wutshamu go kala gi nga hi gi nene lomu xipanze xa Ciudad Trujillo. Na a vuniwa hi Felix Marte, i lo maha tikopiya ta Murinzeli lezaku ti tiriswa tikweni gontlhe ga Republika Dominicana.
Mary Glass, loyi a nuna wakwe Enrique a nga valelwe xikhatini lexo, i lo vunetela Makabye Nowills. I bika lawa: “Nzi wa huma ntirweni wa kutihanyisa hi ma 17:00, nziya hofiseni ya Makabye Nowills kasi ku ya tsala A Murinzeli. Hi kulanzela, Makabye Nowills i wa maha tikopiya ta mahungu lawo hi muchini wa mimeografia. Anzhako ka lezo, a makabye wo kari wa xisati wa le Santiago, va nga mu vitana lezaku hi ‘ngelosi,’ i wa peta marevista lawo lomu ka mudomu wa 20 wa tilitro. Hi kulanzela, i wa ma fenengeta hi nguwo, a chetela mifirinya, mazambani, kutani madumbe. Le hehla ka yona i wa fenengeta hi sakwa ya konyi kutani muchova, a gumesa a khilela xapa aya nwalungu wa tiko, a ya siya revista ginwe ka bandla ginwe ni ginwani. A mingango yi wa lombetana a revista lego kasi ku gonza zinwe.”
Mary i engeta aku: “Hi wa fanele ku ti wonela nguvu, hakuva lomu maruweni ku wa tele hi vatiri va mufumo lava va nga zama ku pola lezi A Murinzeli a nga gandliswa zona. Kanilezi a va zangi va zi tiva. Xontlhe xikhati Jehova i wa hi vikela.”
‘Va tlharihile kota tinyoka, va nga hi na nanzu ku khwatsi matuva’
Zi wa hi za lisima kuva a malanza yo tsumbeka ya Jehova ma simama ku amukela zakuga za moya xikhatini lexo xa kubeletelwa, kanilezi a vakhozeli va lisine va wa hi mhangweni tikweni lego. Ka malembe lawo, a vamakabye vo tala va lo khonwa makhati yo tala va valelwa paxweni.
Juanita Borges i ngalo: “A xikhati nzi nga gonza lisine hi 1953, nzi wa zi tiva khwatsi lezaku kota Mboni ya Jehova, nzi wa hi mhangweni ya ku tshuka nzi khonwa. Niku hi zalezo zi nga humelela. Hi Novembro wa 1958, na nzi hi ka makabye Eneida Suarez, a maphoyisa ya fihlakalo ma lota ma ta hi khoma maku ho maha mutlhangano. Hi lo konelwa ku mbheta tihweti tinharu paxweni, niku munwe ni munwani wa hina i wa fanele ku hakhela multa ya 100 wa tipeso — leyi zalezi yi ringanako a 100 wa madolari ya Amerika.
A mufumo wu lo maha zontlhe wu nga zi kota kasi ku tsikisa Timboni a ku maha mitlhangano, kanilezi a vamakabye a va mbhelangi ntamu. Hambulezo, va wa fanele ku ‘tlhariha kota tinyoka, va nga hi na nanzu ku khwatsi matuva.’ (Mat. 10:16) Andrea Almanzar i alakanya lezi: “Loku hiya mitlhanganweni, hi wa fanele ku chikela hi zikhati zo hambana. Kumbheleni ka yona, a kutala ka zikhati hi wa suka hi phinzulani hakuva hi wa nga faneli ku famba na hi tele hi khati ginwe kasi ku ngavi ni wo kanakanela xokari.”
Jeremias Glass, loyi a pswalilweko a papai wakwe Leon na a hi paxweni, i lo maha muhuweleli hi 1957, na a hi ni 7 wa malembe. Wa ha yi alakanya a mitlhangano yi nga mahiwa laha kaya kabye ni lezi va nga fanele ku ti wonelisa zona kasi va nga khonwi. I tlhamusela lezi: “Vontlhe va nga hi kona va wa nyikwa xikartawana xi nga hi ni nombora yi nga komba a khati ga munwe ni munwani ga kufamba. Loku a mutlhangano wu mbhela, papai i wa nzi veka laha nyangweni kasi ku cuwuka a tinombora ta makartawu ta lava va humako, ku va byela lezaku va famba hi vambiri vambiri, ni ku va kongomisa lezaku va famba hi matlhelo yo hambana.”
A ndlela yinwani ya kutiwonela ku wa hi ku maha mitlhangano ka xikhati lexi a mhango ya ku khonwa yi nga hi yi tsongwani. Hi xikombiso, Mercedes Garcia i gonzile lisine ka tio wakwe Pablo Gonzalez. Laha a nga hi ni ntlhanu wa malembe ni mambiri ntsena, a mamani wakwe i lofa kuveni papai wakwe i wa hi paxweni. Hikwalaho, yena ni vamakabye vakwe va ntlhanu ni mune va lo sala voce. Mercedes i lo bapatizwa hi 1959, na a hi ni ntlhanu wa malembe ni mune. Kasi ku potsa ku khonwa, a vamakabye va lo veka a kanelo ya kubapatiza hi ma 3:30. A kanelo leyo yi vekilwe mutini wa makabye wo kari, va guma va ya va bapatiza Congweni wa Ozama, lowu wu tsemakanyako a tsinza ga tiko. Mercedes i ngalo: “A xikhati lexi a vanhu laha va yileko va nga kari va vuka lomu ka ma 5:30, hina hi wa hi ndleleni ya kuya kaya.”