Zvi kwihi a zvitsumbiso zva Muvangi wa hina?

Kusukela loku a vanhu va vangilwe, a Muvangi wa hina i wa wulawula navo hi ku tirisa tingilozi ni vaphrofeti. Ahandle ka lezvo, i zvi wonile zvi hi chukwana ku a mahungu yakwe ni zvitsumbiso zvakwe zvi ya hi ku tsaliwa. Nungungulu i tsumbisile lezvaku zva koteka a ku hi tsaka cikhatini ci tako. Makunu, zvi kumeka kwihi a zvitsumbiso zva Nungungulu nyamutlha?

A zvitsumbiso zva Nungungulu zvi kumeka lomu ka Mitsalo yo Basa, a Bhibhiliya. (2 Timote 3:16) Nungungulu i va tirisisile kuyini a vaphrofeti kasi va tsala mahungu yakwe? I chelile maalakanyo yakwe lomu ka mapimo ya lava va nga tsala Bhibhiliya. (2 Pedro 1:21) Lezvo zvi fana ni lezvi zvi mahekako nyamutlha. Hi cikombiso, loku a patrawu wo kari a kombela mutiri wakwe lezvaku a mu tsalela papilo, loyi a to amukela a papilo lego i ta gi wona na gita hi ka patrawu loye, na ku nga hi ka mutiri loyi a nga tsala. Hi kufanana, hambu lezvi Nungungulu a nga tirisa vanhu lezvaku va tsala Bhibhiliya, a mahungu lawa ma nga lomo mata hi ka yena.

A MHAKA YA NUNGUNGULU YI KONA MISAVENI YONTLHE

A mahungu ya Nungungulu ya lisima nguvhu. Hi kota ya lezvo, i lava lezvaku a vanhu vontlhe va lera va tlhela va ma zwisisa. Inyamutlha, a “mahungu ya ma nene ya pindzukelwa” ma kumeka “ka wontlhe matiko ni tixaka ni tirimi ni mifumo”. (Kuvhululelwa 14:6) Hi ku vhuniwa hi Nungungulu, a Bhibhiliya ga kumeka hi zvipandze kutani gontlhe hi tirimi to hundza 3000, niku hi gona bhuku gi teleko nguvhu laha misaveni a ku hundza wontlhe.