Timhaka ta mabhuku ma tako ka Cibhukwana ca Mutlhangano
5-11 KA AGOSTO
TITSHOMBA TI NGA KA MHAKA YA NUNGUNGULU | 2 TIMOTE 1-4
“Nungungulu a nga hi nyikangi a moya wa wutoya”
(2 Timote 1:7) Hakuva Nungungulu a nga hi nyikangi a moya wa wutoya, kanilezvi i hi nyikile a moya wa ntamu, ni wa lirandzo ni wa kupima ku nene.
w09 15/5 15 ¶9
Vaswa — kombisani a kukula ka n’wina
Kasi ku vhuna Timote, Pawule i mu alakanyisile lezvaku: “Nungungulu a nga hi nyikangi a moya wa wutoya, kanilezvi i hi nyikile a moya wa ntamu, ni wa lirandzo ni wa kupima ku nene.” (2 Tim. 1:7) A “kupima ku nene” ku patsa ku kupimisisa ni ku ehleketa hi kufaneleko. Lezvo zvi patsa wutlhari ga ku wona zvilo kota lezvi zvi nga tshamisa zvona, na ku nga hi lezvi u nga lava ku zviva zvona. A vaswa vokari va kalako va nga buvhangi hi tlhelo ga moya va kombisa a moya wa wutoya va tlhela va zama ku huluka ka zviyimo zvi jujako kupima hi ku etlela nguvhu kutani hi ku sixtira nguvhu televhizawu, kunwa nguvhu kutani ku dzaha timbangi, ku randza tifesta kutani wubhayi. A maKristu ma tlharihisiwa lezvaku ma ‘fularela a mahanyela ma nga dzundziko Nungungulu, ni kunavela ka tiko, kanilezvi ma hanya tikweni legi na ma hi ni kupima ku nene, ni kululama, ni ku chava Nungungulu’. — Titusi 2:12.
(2 Timote 1:8) Hikwalaho u ngavi na tingana a ku kustumunya hi Hosi ya hina, ne hambu kuva ni tingana hi mina ndzi nga cibochwa hi kota ya yona, kanilezvi xaniseka zvin’we na mina hi kota ya mahungu ya ma nene na u tsumba a ntamu wa Nungungulu.
w03 1/3 9 ¶7
‘Tiya hlanha, uva ni ntamu!’
Na a tsalela Timote, Pawule i te: “Nungungulu a nga hi nyikangi a moya wa wutoya, kanilezvi i hi nyikile a moya wa ntamu . . . Hikwalaho u ngavi na tingana a ku kustumunya hi Hosi ya hina.” (2 Timote 1:7, 8; Marku 8:38) Laha hi lerako magezu lawa, hi nga ti wutisa lezvi: ‘Ndzi na ni tingana hi kukholwa ka mina, kutani ndzi tiyile hlanha? Ndza byela lava ndzi tirako navo kutani lava ndzi gondzako navo lezvaku ndzi Kustumunyu wa Jehovha, kutani ndza zama ku ti fihla? Ndzi na ni tingana hi kuva ndzi hambene ni van’wani, kutani ndza tizwa matshandza ya ku yimela a wunghana ga mina na Jehovha?’ Loku a wokari a hi ni mawonela ya hava hi ku chumayela a mahungu ya ma nene kutani loku a hi ni tingana ta kuva munhu wo hambana ni van’wani, i fanele ku alakanya a wusungukati legi Jehovha a nga nyika Joxuwa gaku: ‘Tiya hlanha, uva ni ntamu.’ U nga tshuki u rivala lezvaku a mawonela ya Jehovha na Jesu Kristu hi wona ya ma nene ku hundza lawa ya vatiri-kuloni kutani ya zvigondzani-kuloni. — Va Le Galatiya 1:10.
Kela titshomba ta moya
(2 Timote 2:3, 4) Kota musochwa wa mu nene wa Kristu Jesu, xaniseka zvin’we na mina zvikaratweni. 4 A ku na musochwa a mahako yin’wani mitiro kasi a kuma mali, hakuva i lava ku tsakisa loyi a mu vitanileko wusochweni.
12-18 KA AGOSTO
TITSHOMBA TI NGA KA MHAKA YA NUNGUNGULU | TITUSI 1–FILEMONI
“Yimisani madhota”
(Titusi 1:5-9) Ndzi ku siyile le Kreta kasi u lulamisa a zvilo lezvi zvi nga byekele ni ku yimisa madhota ka dhoropa gin’we ni gin’wani, kota lezvi ndzi nga ku leletela ndziku: 6 A dhota gi fanele kuva munhu a nga solekiko, na a hi nuna wa sati mun’we, a nga ni vana va kholwako, lava va nga soliwiko hi kota ya ku phungela ni kuva zvitlula-milayo. 7 Hakuva kota nandza ga Nungungulu, a dhota a gi faneli ku soleka, ne kuva munhu wa kanu, a gi faneli kuva ni cizangazangani, ne kuva cidhakwa, a gi faneli kuva munhu wa tiholova ne ku navela bhindzu go biha, 8 kanilezvi i fanele ku randza ku amukela vapfhumba, a randza wunene, a hi ni kupima ku nene, a hi munhu wo lulama, wo tsumbeka, a zvi kotako ku ti khoma, 9 a landzelako khwatsi a mhaka yi tsumbekileko kugondziseni kakwe, kasi a zvi kota ku tiyisa hi gondzo leyi yi hanyisako ni ku kawuka lava va kanetako.
Kela titshomba ta moya
(Titusi 1:12) A muphrofeti wo kari wa tiko gabye, i te ngalo: “A vaKreta vahembi contlhe cikhati, zvihari zvo leva, ni makhobomu, na va hi malolo.”
w89 15/5 31 ¶5
Zviwutiso zva vagondzi
Hi lisine, Pawule i wa nga seketele kuva ni cihlawulela hi vanhu va le Kreta. Hi nga tiyiseka ka lezvo hakuva Pawule i wa zvi tiva ku le Kreta ku wa hi ni maKristu ya ma nene lawa ma nga amukeleka ka Nungungulu na ma totilwe hi moya wakwe wo basa. (Mitiro 2:5, 11, 33) Ku wa hi ni maKristu yo tala ma nga ringana lezvaku ku yimisiwa mabandla “ka dhoropa gin’we ni gin’wani”. Hambu lezvi ka ku a maKristu lawo ma wa nga mbhelelangi, hi nga tiyiseka lezvaku ma wa nga hi vanhu vo hemba ni makhobomu; hakuva loku zvi wa tshamisile lezvo, na va nga simamangi va amukeleka ka Jehovha. (Va Le Filipi 3:18, 19; Kuvhululelwa 21:8) Niku a ku khwatsi hi lezvi zvi mahekako matikweni wontlhe inyamutlha, kuzvilava va wa hi kona a vanhu va timbilu ti nene va nga kari va swireka hi kota ya mahanyela yo biha lawa ma nga hi kona, lava va nga longile ku amukela mahungu ya wuKristu.— Ezekiyeli 9:4; ringanisa na Mitiro 13:48.
(Filemoni 15, 16) Kuzvilava hi zvona zvi nga mu maha a tsutsma hi cikhatana, kasi loku a wuya ka wena a ta tshamela magumo, 16 na a nga ha hi khumbi basi, kanilezvi na a hi wo hundza lezvo, na a hi makabye wo randzeka nguvhu ka mina, kanilezvi nguvhunguvhu ka wena a nga khumbi ya wena ni makabye wa wena Hosini.
w08 15/10 31 ¶4
Timhaka-tshinya ta mapapilo ya Titusi, Filemoni na Mahebheru
15, 16 — Hikuyini Pawule a nga kala ku kombela Filemoni lezvaku a nga ha mu mahi khumbi yakwe Onesimusi? Pawule i wa lava ku veka kupima ka ntiro wakwe wa ‘kuchumayela xungetano hi Mufumo wa Nungungulu ni ku gondzisa hi Hosi Jesu Kristu’. Hikwalaho, i hlawulile ku nga ti ngheniseli ka timhaka ta tiko to kota leti ti nga yelana ni wukhumbi. — Mitiro 28:31.
19-25 KA AGOSTO
TITSHOMBA TI NGA KA MHAKA YA NUNGUNGULU | MAHEBHERU 1-3
“Randza kululama u venga kubiha”
(Mahebheru 1:8) Kanilezvi xungetano hi N’wana, i ngalo: “Nungungulu hi yena citshamu ca wena ca wuhosi kala kupindzuka ni kupindzuka; a nhonga ya Mufumo wa wena i nhonga ya kululama.
Kela titshomba ta moya
(Mahebheru 1:3) Hi yena a nga mufananiso wa kungangamela ka Nungungulu ni cikombiso co mbhelela ca lezvi a nga tshamisa zvona. Hi yena a khomileko zvilo zvontlhe hi gezu ga ntamu wakwe. Andzhako ka loku a basisile a zviwonho zva hina, i no tshama reveni ga cinene ga Loyi a Tlakukileko ku Hundza Vontlhe le tilweni.
it-2382 ¶1
Mufananiso
Xana contlhe cikhati Jesu i vile mufananiso wa Nungungulu hi ndlela yo fana ke?
A N’wana wa Nungungulu wa matewula, loyi hi kufamba ka malembe a ngava Jesu, hi yena a nga mufananiso wa Papayi wakwe. (2Ko 4:4) Kota lezvi ku nga yaloyi Nungungulu a nga bhula naye a cikhati a ngaku: “A hi vangeni munhu hi mufananiso wa hina,” a ku fana loko ni Papayi wakwe, a Muvangi, ku kona a cima ka loku a N’wana a vangilwe. (Gen 1:26; Joh 1:1-3; Kol 1:15, 16) A cikhati a nga hi laha misaveni kota munhu wo mbhelela, i kombisile a matshamela ni wumunhu ga Papayi wakwe hi ndlela yo tlakuka nguvhu yi nga kota ku zwisisiwa hi vanhu, laha kuza a zvi kota ku wula ku “loyi a wonileko mina i wonile na Papayi”. (Joh 14:9; 5:17, 19, 30, 36; 8:28, 38, 42) A kufanana loko ku tlhelile ku engeteleka nguvhu a cikhati leci Jesu a nga vhuxiwa kota munhu wa moya ni cikhati leci a nga nyikwa “ntamu wontlhe le tilweni ni laha misaveni” hi Papayi wakwe, Jehovha Nungungulu. (1Pe 3:18; Mat 28:18) Kota lezvi Nungungulu a nga mu “tlakusa nguvhu” Jesu, zvezvi a N’wana wa Nungungulu i kombisa a wukulu ga Papayi wakwe hi ndlela yo tlakuka nguvhu a ku hundza a cikhati leci a nga kala a nga seta misaveni. (Flp 2:9; Mah 2:9) Hikwalaho zvezvi, “hi yena a nga mufananiso wa kungangamela ka Nungungulu”. — Mah 1:2-4.
(Mahebheru 1:10-12) Niku: “Kusanguleni, wena Hosi, u no andlala zviseketelo zva misava; a matilo i ntiro wa mandla ya wena. 11 A tilo ni misava zvi ta hundza, kanilezvi wena u ta tshama kala kupindzuka; zvona zvontlhe zvi ta hlakala a ku fana ni nguwo, 12 u ta zvi songa a ku fana ni nguwo; zvi ta ciciwa a ku fana ni tinguwo. Kanilezvi wena a wu cici, ni malembe ya wena cima ma nga ta mbhela.”
it-1491 ¶2
Tilo
Lisimu 102:25, 26 li wulawula hi Jehovha Nungungulu, kanilezvi mupostoli Pawule i li tshahile na a wula Jesu Kristu. A cigelo ca kona hi lezvaku a N’wana a belekilweko yece wa Nungungulu hi yena a tirisilweko hi Nungungulu kasi ku maha zvilo zvontlhe. Pawule i komba a kuhambana ku nga kona cikari ka ku tshama ka N’wana kala kupindzuka ni zvilo lezvi zvi vangilweko lezvi zva ku loku Nungungulu a zvi lava a nga “zvi songa a ku fana ni nguwo” a zvi veka hi tlhelo. — Mah 1:1, 2, 8, 10-12; ringanisa na 1Pe 2:3.
26 KA AGOSTO–1 KA SETEMBRO
TITSHOMBA TI NGA KA MHAKA YA NUNGUNGULU | MAHEBHERU 4-6
“Ti tsitsirite kasi u nghena kuhumuleni ka Nungungulu”
(Mahebheru 4:1) Hikwalaho, kota lezvi a citsumbiso ca ku nghena kuhumuleni kakwe ca ha hiko kona, a hi ti woneleni kasi ku ngavi ni mun’we wa n’wina a salako ndzhako.
Kela titshomba ta moya
(Mahebheru 4:12) Hakuva a mhaka ya Nungungulu ya hanya, yi na ni ntamu, niku ya kariha a ku hundza cipadha ci tsemako seno ni seno, yi tlhava yi kala yi hambanisa a muhefemulo ni moya, ni mahlakala ni mongo; yi hlola a maalakanyo ni mixuvo ya mbilu.
it-2 24 ¶5
Kutsumba
A kutsumba ka wutomi ga pindzukelwa ni kungahini ka lava va nga ni “kuvitaniwa ka le tilweni” (Mah 3:1) ku na ni ciseketelo co tiya niku i nchumu hi nga wu tsumbako. Ku seketelwa ka zvilo zvimbiri lezvi Nungungulu a nga zvi kotiko ku hemba ka zvona, ku nga citsumbiso cakwe ni cihlambanyo cakwe niku a kutsumba ku ka Kristu loyi zvezvi a nga civangwa ci nga fiko le tilweni. Hikwalaho, ku wuliwa lezvaku a kutsumba loko “ku fana ni fero ka muhefemulo; kutsumba ka lisine ni ko tiya loku ku nghenako kala lomu ndzeni hi le ndzhako ka kortina, [a ku fana ni lezvi a mupristi wa hombe a nga nghenisa zvona lomu ka wutshamu go Basabasa hi Siku ga ku Tsetselelwa ka Zviwonho], lomu Jesu a nga ranga hi yena a nghena hi kota ya hina, yena loyi a ngava mupristi wa hombe hi tshamela ga Melkizedheki kala kupindzuka”. — Mah 6:17-20.