Timhaka ta mabhuku ma tako ka Cibhukwana ca Mutlhangano — BHIBLIOTEKA YA SAITE ya Watchtower

Timhaka ta mabhuku ma tako ka Cibhukwana ca Mutlhangano

7-13 KA OUTUBRO

TITSHOMBA TI NGA KA MHAKA YA NUNGUNGULU | JAKOBE 3-5

“Kombisa wutlhari ga Nungungulu”

(Jakobe 3:17) Kanilezvi a wutlhari ga le hehla, a ku ranga gi basile, gi na ni kurula kambe, ni kuolova, ga ingisa, gi tele hi wuxinji ni mihandzu yi nene, a gi na cihlawulela, a gi na kukanganyisa.

cl 221-222 ¶9-10

“A wutlhari ga le hehla” ga tira wutomini ga wena ke?

“A ku ranga gi basile”. A kubasa zvi wula kuhlazveka hi laha handle ni lomu ndzeni kambe. A Bhibhiliya gi tlhanganyisa a wutlhari ni mbilu, kanilezvi a wutlhari ga le hehla a gi nge zvi koti a ku nghena mbilwini yi chakisilweko hi maalakanyo, ni kunavela, ni mixuvo yo biha. (Mavingu 2:10; Matewu 15:19, 20) Hambulezvo, loku a mbilu ya hina yi basile — lezvo zvi wula ku, na yi basile kala laha zvi kotekako hi kona kota vanhu vo kala kumbhelela — hi ta ‘huma kubiheni, hi maha kusasa’. (Lisimu 37:27; Mavingu 3:7) Hi kota ya lezvo, xana a kubasa a ku ringanelwi hi kuva tshamela go sangula ka matshamela wontlhe ya wutlhari ga le hehla ke? Loku hi nga basangi hi tlhelo ga mahanyela ni ga moya, hi nga zvi kotisa kuyini a ku kombisa a matshamela man’wani ya wutlhari ga le hehla?

“Gi na ni kurula kambe”. A wutlhari ga le hehla gi hi kuca a ku lwela kuva ni kurula, ku nga handzu wa moya wa Nungungulu. (Va Le Galatiya 5:22) Hi ti karatela a ku nga colopeteli a “ciboho ca kurula” ci tlhanganyisako a vanhu va Jehovha. (Va Le Efesusi 4:3) Hi tlhela hi ti karatela a ku aketa kurula loku ku hohlokile. Hikuyini lezvo zvi nga zva lisima? A Bhibhiliya gi li: “Simamani . . . mu hanya hi kurula. A Nungungulu wa lirandzo ni wa kurula i tava na n’wina.” (2 Va Le Korinte 13:11) Hikwalaho a Nungungulu wa kurula i tava cikari ka hina loku hi simama a ku hanya hi kurula. Lezvi hi va khomisako zvona a vamakabye va hina zva khumba a kuzwanana ka hina na Jehovha. Hi nga zvi kotisa kuyini a ku komba lezvaku hi vanhu va lwelako kurula? Wona cikombiso.

cl 223-224 ¶12

“A wutlhari ga le hehla” ga tira wutomini ga wena ke?

“Kuolova”. Zvi wula yini a kuolova? Hi kuwula ka titlhari to gondza magezu, a gezu ga ciGreki gi hundzuluselweko ku “kuolova” ka Jakobe 3:17 ga karata ku gi tlhamusela. A vahundzuluseli va tirisa magezu yo kota lawa yaku: “kurula”, “ku hlwela ku swireka”, ni “ku alakanyela van’wani”. A tlhamuselo wa lahasi wu nga ka gezu legi lomu ka Tradução do Novo Mundo wu komba ku a tlhamuselo wo kongoma wa gezu legi “ku nga womeleli ka mawonela ya hina”. Hi nga zvi kombisa kuyini lezvaku a tshamela legi ga wutlhari ga le helha ga tira wutomini ga hina ke?

cl 224-225 ¶14-15

“A wutlhari ga le hehla” ga tira wutomini ga wena ke?

Gi ti yimisele ku “ingisa”. Hi lirimi la ciGreki ku tirisiwa a gezu gi nge “gi ti yimiseleko ku ingisa”. A gezu legi a gi kumeki ka matshamu man’wani lomu ka Mitsalo ya ciGreki ya Wukristu. Hi kuya hi tlhari yo kari, a gezu legi “gi tolovela a ku tirisiwa lomu wusochweni”. Gona gi nyika a maalakanyo ya ku “zva vevuka a ku vhumela” ni “ku ti veka hasi”. Loyi a fumelwako hi wutlhari ga le hehla wa tekela ku ingisa lezvi a Mitsalo yi wulako. A nga tiviwi kota munhu wa ku maha a zviboho a gumesa a ala a ku vhumela a mawonela ya van’wani ma kalako ma nga seketeli lawa yakwe. A handle ka lezvo, yena i ti yimisela a ku a cica loku va mu komba a ciseketelo ca lomu ka Bhibhiliya ca ku a mawonela yakwe a hi ma nene. Xana wenawu va ku tivisa zvezvo ke?

“Gi tele hi wuxinji ni mihandzu yi nene”

“Gi tele hi wuxinji ni mihandzu yi nene”. A wuxinji cipandze ca lisima ca wutlhari ga le hehla, hakuva ku wuliwa lezvaku “gi tele hi wuxinji.” Wona lezvaku a “wuxinji” ni “mihandzu yi nene” zvi kumbukiwa zvin’we. Lezvo zvi na ni cigelo hakuva makhati yo tala lomu ka Bhibhiliya a wuxinji gi komba ku khatala hi van’wani, a kuzwela wusiwana ku pswala a mitiro yo tala yo saseka. A bhuku go kari gi tlhamusela wuxinji kota “kubayisa loku a munhu a ku zwako hi kota ya loyi a kumanako ni zviyimo zvo bindza, a tlhela a maha co kari kasi ku mu vhuna”. Hikwalaho, a wutlhari ga le hehla a hi nchumu wu womileko, wa kala kuzwela wusiwana, kutani a wutivi ntsena. Kanilezvi i nchumu wu kufumetako, wu kombako lirandzo li humako hi lomu mbilwini, wu tlhela wu zwela wusiwana. Hi nga zvi kombisa kuyini lezvaku hi na ni wuxinji?

cl 226-227 ¶18-19

“A wutlhari ga le hehla” ga tira wutomini ga wena ke?

“A gi na cihlawulela”. A wutlhari ga le hehla ga hi nyika ntamu wa ku hlula a cihlawulela ca hlonge ni kutikulisa hi kota ya tiko hi nga tumbulukela ka gona. Loku hi rangelwa hi wutlhari lego hi ta ti karatela a ku susa lomu timbilwini ta hina a kubyekelela kontlhe ko lava ku kombisa a cihlawulela. (Jakobe 2:9) Hi nga ta tsakela munhu hi kota ya lezvi a gondzileko nguvhu, a nga ni mali yo tala nguvhu, kutani malungelo bandleni; ne hi nga ta chepeta a vakhozeli-kulobye hambu loku va wonikisa ku khwatsi zvisiwana nguvhu. Loku Jehovha a kombisile lirandzo lakwe hi vona, handle ko kanakana va ringanelwa hi ku hinawu hi va randza.

“A gi na kukanganyisa”. A gezu ga ciGreki “ku kanganyisa” gi nga ha wula “munhu loyi a patsekako ka titeyatro”. Cikhatini ca kale, a vaGreki ni vaRoma va nga kari va patseka ka titeyatro va wa boha a máscara loku va kari va kombisa a mihlakano yabye. Hikwalaho a gezu ga ciGreki gaku “ku kanganyisa” gi wa tirisiwa ka vanhu lava va ti fihlako. A ku tiva lezvaku a wutlhari ga le hehla a gi na kukanganyisa a zvi faneli ku khumba ntsena lezvi hi va khomisako zvona a vamakabye-kulobye kanilezvi ni ndlela leyi hi ti zwisako zvona hi vona.

Kela titshomba ta moya

(Jakobe 4:5) Mu alakanya lezvaku a mutsalo wu wula mahala loku wuku: “A moya lowu wu nga ndzeni ka hina wu tele hi ciluse”?

w08 15/11 20 ¶6

Timhaka-tshinya ta papilo ga Jakobe ni ga Pedro

4:5 — Hi wihi a mutsalo lowu Jakobe a wu kumbukako ka vhesi legi? Jakobe a tshahile a vhesi go kongoma. A magezu lawa ma pimisilweko hi Nungungulu kuzvilava ma seketelwa ka mongo wu kumekako ka mavhesi lawa: Genesisi 6:5; 8:21; Mavingu 21:10; ni Va Le Galatiya 5:17.

(Jakobe 4:11, 12) Vamakabye, tsikani ku lumbetana. Ni wihi loyi a lumbetako makabye wakwe kutani ku lamula makabye wakwe, i vhukela nayo a tlhela a lamula a nayo. Makunu loku wena u lamula nayo, a wu mahi lezvi a nayo wu wulako kanilezvi u mulamuli. ¹² Kova ni mun’we basi loyi a nga Muyimisi wa nayo ni Mulamuli, loyi a nga ni ntamu wa ku ponisa ni ku lovisa. Kanilezvi wena ke, kova wena mani wo kala u lamula a muakelani wa wena ke?

w97 15/11 20-21 ¶8

A kukholwa ku hi maha hi va ni kutimisela hi tlhela hi khongela

A ku lumbeta a makholwa-kulobye ciwonho. (Jakobe 4:11, 12) Hambulezvo, a vokari va lumbeta a maKristu-kuloni, kuzvilava hi kota ya ku ti wona kota vo lulama kutani ku randza kutikulisa hi ku chepeta van’wani. (Lisimu 50:20; Mavingu 3:29) A gezu ga ciGreki gi hundzuluselweko ku ‘ku lumbeta’ gi komba tihanyi kutani ku sola a munhu hi zvilo zva mawunwa. Lezvo zvi fana ni ku lamula a makabye a tlhela a mu kona. A munhu a nga ‘vhukela a tlhela a lamula a nayo wa Nungungulu’ hi ndlela muni? A vatsali ni vaFarisi ‘va wa hambunyeta a nayo wa Nungungulu hi mano’ va lamula hi kuya hi mawonela yabye wutsumbu. (Marku 7: 1-13) Hi ndlela yo fana, loku hi solasola kutani ku kona a makabye loyi Jehovha a nga mu soliko, hi wa nga ta ngha na hi ‘lamula a nayo wa Nungungulu’, hi wonha hi ku wula lezvaku a nga lulamangi ke? Niku loku hi lumbeta a makabye wa hina na zvi nga fanelangi, a hi tatisi a nayo wa lirandzo.— Va Le Roma 13: 8-10.

14-20 KA OUTUBRO

TITSHOMBA TI NGA KA MHAKA YA NUNGUNGULU | 1 PEDRO 1-2

“Basani”

(1 Pedro 1:14, 15) Kota vana va ingisako, tsikani ku landzela a kunavela ka n’wina ka kale loku mu nga hi nako na mu nga se tiva nchumu hi Nungungulu, ¹⁵ kanilezvi khwatsi hi a Basileko loyi a mu vitanileko, n’winawu basani mahanyeleni ya n’wina wontlhe,

w17.02 10 ¶5

A ndzhiho ‘cinyikiwo co mbhelela’ ci tako hi ka Dhadhani

Hi nga kombisa kuyini lezvaku ha gi randza a vito ga Jehovha? Hi nga kombisa hi mahanyela ya hina. Jehovha i lava lezvaku hi basa. (Gondza 1 Pedro 1:15, 16.) Lezvo zvi wula kuva hi khozela yena yece hi tlhela hi mu ingisa hi mbilu yontlhe. Hambu loku hi xanisiwa, hi maha zvontlhe hi zvi kotako kasi ku hanya hi ndlela leyi Jehovha a hi gondzisako. Hi ku hanya hi milayo ya Jehovha, hi neha wudzundzo ka vito gakwe. (Matewu 5:14-16) Hi komba lezvaku a milayo yakwe yi nene niku Sathani muhembi. A hi mbhelelangi, hikwalaho hi ta maha zvihoxo. Kanilezvi loku hi hoxisa, ha ti sola hi tlhela hi ti karatela ku tsika ku maha zvilo lezvo zvi chakisako vito ga Jehovha. — Tisimu 79:9.

(1 Pedro 1:16) hakuva ku tsalilwe ku ngalo: “Basani, hakuva mina ndzi basile.”

lvs 77 ¶6

Hi yihi ndlela yi nene yo hlawula zvihungato?

Jehovha i li: “Basani, hakuva mina ndzi basile.” (1 Pedro 1:14-16; 2 Pedro 3:11) Jehovha i ta amukela a wukhozeli ga hina ntsena loku gi basile. (Deuteronome 15:21) A wukhozeli ga hina gi nga ta basa loku hi maha zvilo lezvi Jehovha a zvi nyenyako, zvo kota wubhayi, ni tihanyi, kutani zvilo zvi yelanako ni madhimoni. (Va Le Roma 6:12-14; 8:13) Kanilezvi ahati loku ho khunguvanyisa Jehovha hi vhumela ku ti hungata hi zvilo lezvo? A wukhozeli ga hina a gi nge hi tshuki giva go basa. Niku lezvo zvi nga ha wonha kuzwanana ga hina na Jehovha.

Kela titshomba ta moya

(1 Pedro 1:10-12) Xungetano hi kuhanyiswa loku, a vaphrofeti lava va phrofetileko hi tipswalo leti mu nyikilweko tona, va no wutisisa khwatsi ha kona, va ku hlolisisa khwatsi. ¹¹ Va wa hlola na va lava ku tiva a cikhati kutani nguva leyi va nga kari va kombiwa xungetano hi Kristu hi moya lowu wu nga hi kabye, laha wu nga va kustumunyela na ka ha hi mahlweni hi zvixaniso lezvi Kristu a nga wa ta xaniseka hi zvona ni kungangamela loku ku nga wa ta landzela hi ndzhako. ¹² Va no kombiwa lezvaku a va ti tireli, kanilezvi va tirela n’wina timhakeni leti mu hlawutelweko hi lava va nga mu byela a mahungu ya ma nene hi moya wo basa wu ngata hi le tilweni. A timhaka leti hi tona leti a tingilozi ti xuvako nguvhu ku ti tiva.

w08 15/11 21 ¶9

Timhaka-tshinya ta papilo ga Jakobe ni ga Pedro

1:10-12. A tingilozi ti wa xuva nguvhu a ku zwisisa a lisine li etileko la moya leli a vaphrofeti va Nungungulu va kale va nga li tsalile xungetano hi bandla gi totilweko ga wuKristu. Hambulezvo, a lisine lelo li zwisisilwe khwatsi a cikhati leci Jehovha a nga sangula ku tirisana ni bandla ga wuKristu. (Efe 3:10) Xana hi nga landzela a cikombiso ca tingilozi, hi ti karata kasi ku zwisisa a “zvilo zvi etileko zva Nungungulu”? — 1 Ko 2:10.

(1 Pedro 1:18, 19) Hakuva ma zvi tiva lezvaku a mu tlhatlhisiwangi hi zvilo zvi hinako, hi prata kutani ouro, mahanyeleni ya n’wina yo biha lawa mu gondzisilweko hi vakokwani va n’wina. ¹⁹ Kanilezvi mu tlhatlhisilwe hi nkhata wa lisima wa Kristu, lowu wu fanako ni nkhata wa yivhana yi nga hiko na cisolo ne cibawa.

(w18.11 11 ¶11)

“Ndzi ta famba lisineni la wena”

Maalakanyo ni mahanyela ma nga basangiko. Kasi hi simama ku famba lisineni, hi fanele kuva ni mahanyela yo basa mahlweni ka Jehovha. (Isaya 35:8; lera 1 Pedro 1:14-16.) A cikhati hi nga gondza lisine, hi cicile zvokari wutomini ga hina kasi hi hanya hi matshinya ya milayo ya Bhibhiliya. A vokari va cicile zva hombe nguvhu. Kanilezvi ha ha fanele ku ti wonela kasi hi nga tshuki hi cicisa mahanyela ya hina yo basa hi mahanyela yo biha. Cini ci nga hi vhunako ku hlula ni cihi ciringo ca ku maha zvo biha? Ehleketa hi lezvi Jehovha a hi nyikeleko kasi hi basa. I nyikele wutomi ga n’wana wakwe wo randzeka, Jesu Kristu. (1 Pedro 1:18, 19) Kasi hi tshama hi basile mahlweni ka Jehovha, contlhe cikhati hi fanele ku alakanyela a lisima la hakhelo ya ku tlhatlhisa ya Jesu.

21-27 KA OUTUBRO

TITSHOMBA TI NGA KA MHAKA YA NUNGUNGULU | 1 PEDRO 3-5

“A kugumesa ka zvilo zvontlhe ku tshinele”

(1 Pe 4:7) A kugumesa ka zvilo zvontlhe ku tshinele. Hikwalaho, ku laveka lezvaku muva ni kupima ku nene, mu tlharihela ku khongela.

w13 15/11 3 ¶1

‘Ti khomeni lezvaku mu zvi kota ku khongela’

“A CIKHATI co karata ka zvontlhe ca kuva munhu a tshama na a hanyanya hi laha gi yako kuceni,” ku wula wanuna wo kari loyi a kale a nga tira ni wusiku. Handle ko kanakana, ni wihi a tirako ni wusiku a nga na ku kaneta a mhaka leyi. A maKristu nyamutlha ma yimisana ni cikarato leci hakuva a wusiku go leha ga tiko ga Sathani makunu gi laha kusuhani ni ku mbhela. (Rom. 13:12) Gi wa tava khombo ga hombe loku hi wo tshuka hi khudzehela ka hora leyi gi yaku kuceni! Hikwalaho, cikurumeta lezvaku ‘hi va ni kupima ku nene’ hi tlhela hi landzela a citlharihiso ca Bhibhiliya ca lezvaku ‘hi ti khoma kasi hi zvi kota ku khongela.’ — 1 Ped. 4:7.

(1 Pedro 4:8) Ahandle ka zvontlhe lezvo, randzanani nguvhu hakuva a lirandzo li khubhunyeta a zviwonho zvo tala.

w99 15/4 22 ¶3

Lezvi zvi nga hi vhunako a ku pola ni ku hlula a gome ka zvilo zva moya

Hi kugumesa, veka kupima ka wusungukati ga lirandzo ga mupostoli Pedro, ga ku: “A kugumesa ka zvilo zvontlhe ku tshinele. Hikwalaho, ku laveka lezvaku muva ni kupima ku nene, mu tlharihela ku khongela. Ahandle ka zvontlhe lezvo, randzanani nguvhu hakuva a lirandzo li khubhunyeta a zviwonho zvo tala.” (1 Pedro 4:7, 8) Zva vevuka a ku tsika a kungambheleli — ka van’wani kutani ka hina wutsumbu — ku nghena maalakanyweni ni timbilwini ta hina ku tlhela kuva cikhunguvanyiso, ku hi khunguvanyisa. Sathani wa gi tiva khwatsi a gome lego ga nyama. A ku hi hambanisa ni kukhohlisa i man’we ya mano yakwe lawa a ma tirisako. Hi kota ya lezvo, hi fanele ku hatla hi vhala kutani ku khubhunyeta a zviwonho lezvo hi ku kombisa lirandzo la lisine ka mun’we ni mun’wani wa hina hi tlhela hi “nga mu nyiki cikhati Sathani.” — Va Le Efesusi 4:25-27.

(1 Pedro 4:9) Amukelanani na mu nga nguranguri.

w18.03 15-16 ¶2-3

A ku rurela van’wani zva tsakisa niku zva laveka nguvhu!

A cin’we ca zvilo lezvi Pedro a nga kuca vamakabye vakwe lezvaku va zvi maha ku ‘rurelana’. (1 Pedro 4:9) A gezu ga ciGreki laha kaku “rurelanani”, hi ku kongoma gi wula ku “kombisa lirandzo kutani wunene hi vanhu u nga va tiviko.” Kanilezvi Pedro i wa kuca vamakabye vakwe lezvaku va ‘rurelana’, hambu lezvi va nga sina va tivana va tlhela va tira zvin’we. A ku rurelana zvi wa ta va vhunisa kuyini?

Lezvo zvi wa ta va maha va tshinelelana. Wa alakanya khati go kari u nga rambiwa hi wokari lezvaku uya kaya kakwe, kutani u nga ramba munhu le kaya ka wena ke? Lezvo zvi mu mahile mu tshinelelana. Phela a ku rurelana i ndlela ya yi nene ya ku tivana khwatsi ni vamakabye va hina. A maKristu ma nga hanya cikhatini ca Pedro ma wa fanele kuva ni kubohana laha a zvikarato zvi ngaya zvi tshinga. ‘Masikwini lawa yo gumesa’, hinawu hi fanele ku maha zvalezvo. — 2 Timote 3:1

Kela titshomba ta moya

(1 Pedro 3:19, 20) Na a hi ka ciyimo leco i no ya chumayela a tingilozi ti nga hi paxweni, ²⁰ leti ti nga tsika ku ingisa a cikhati leci Nungungulu a nga kari a rindzela hi lihlazva-mbilu masikwini ya Nowa, na ka ha akiwa taru, legi ka gona ku nga ponisiwa a 8 wa vanhu basi lomu matini.

w13 15/6 23

Zviwutiso zva vagondzi

A Bhibhiliya gi ngalo Jesu i lo “kanela ka mimoya leyi yi nga hi makhotsweni.” (1 Ped. 3:19) Xana lezvo zvi wula yini?

Mupostoli Pedro i wula lezvaku a mimoya leyi hi “leyi a kale yi nga kala yi nga ingisi, laha Nungungulu a nga rindzela hi lihlazva-mbilu a masikwini ya Nowa.” (1 Ped. 3:20) Zvi la su dlunya lezvaku Pedro i wa wula zvivangwa zva moya lezvi zvi ti patsileko na Sathani. Judha i wulawula hi tingilozi “leti ti nga kala ku gonga a wuhosi ga tona, ti siya kaya ka tona” a tlhela aku Nungungulu “i ti hlayisile makhotsweni ya pindzukelwa ya munyama kala sikwini ga hombe ga kulamulwa.” — Juda 6.

Hikuyini ku wuliwako lezvaku a zvivangwa lezvi zva moya zvi tsikile ku ingisa masikwini ya Nowa ke? Mahlweni ka Ntalo, a mimoya leyi ya kubiha yi lo ambala mimiri ya nyama yi ti maha vanhu — ku nga nchumu lowu Nungungulu a nga kala a nga wu mahelangi makungo. (Gen. 6:2, 4) Tlhatakumbiri, a tingilozi leto ti hlengeleko masango ni vavasati ti wo maha zvilo zvi hambeneko ni ntumbuluko. Nungungulu a nga vangangi tingilozi lezvaku ti hlengela masango ni vavasati. (Gen. 5:2) A tingilozi leti to biha ni ku kala ku ingisa, ti ta loviswa hi cikhati leci Nungungulu a ci yimisileko. Ka cikhati leci, kota kuwula ka Judha, ti le ‘munyameni’ — hi wulela gin’wani, ti le paxweni hi tlhelo ga moya.

Xana Jesu i kanele rini ka “mimoya leyi yi nga hi makhotsweni” niku hi ndlela muni? Pedro i ngalo lezvi zvi mahekile andzhako ka loku Jesu a ‘hanyisilwe hi ka moya.’ (1 Ped. 3:18, 19) Wona kambe lezvaku Pedro i ngalo Jesu i lo kanela. A kuva Pedro a te Jesu i kanele zvi komba lezvaku a kukanela loku ku mahekile Pedro na a nga se tsala a papilo gakwe go ranga. Hikwalaho, zvi wonekisa ku khwatsi cikhatanyana ndzhako ka kuvhuxiwa kakwe, Jesu i lo kanela ka mimoya leyi ya kubiha xungetano hi kulamulwa ko mbhelela loku hakunene yi faneleko ku lamulwa ha kona. Ku wa nga hi kukanela ka ku yi nyika kutsumba ka kuhanyiswa, kanilezvi ku wa hi kukanela ka kulamula. (Jona 1:1, 2) Kota lezvi Jesu a nga kombisile kukholwa kakwe, a hanya hi kutsumbeka kala afa, a tlhela a vhuxiwa hi ka vafileko — a komba lezvaku Sathani i wa nga hi na ntamu hehla kakwe — Jesu i wa hi ni cigelo co zwala ca ku kanela a mahungu lawo ya kulamula. — Joh. 14:30; 16:8-11.

Cikhatini ci tako, Jesu i ta boha Sathani ni tingilozi leto a va hoxa nkeleni wa lieswila. (Luka 8:30, 31; Kuv. 20:1-3) Na lezvo zvi nga se maheka, a tingilozi leti ti nga ingisiko ti munyameni hi tlhelo ga moya, niku a kulobyiswa ka tona ko gumesa ku nga ta thindeka. — Kuv. 20:7-10.

(1 Pedro 4:6) Kunene, hi zvalezvo zvi mahako lezvaku a mahungu ya ma nene ma kanelwa ni ka vafileko, kasi hambu lezvi va lamuliwako nyameni hi kuya hi mawonela ya vanhu, va fela ku hanya hi ka moya hi kuya hi mawonela ya Nungungulu.

w08 15/11 21 ¶8

Timhaka-tshinya ta papilo ga Jakobe ni ga Pedro

4:6 — Hi vamani a “vafileko” lava ‘a mahungu ya ma nene ma nga kanelwa’ ka vona? Hi lava va nga ‘file zvihoxweni ni zviwonhweni zvabye,’ kutani lava va nga file hi tlhelo ga moya, na va nga se tiva a mahungu yo saseka. (Va Le Efe. 2:1) Andzhako ka loku va gondzile mahungu yo saseka va tlhela va kolwa ka wona, va no sangula ku “hanya” hi tlhelo ga moya.

28 KA OUTUBRO KALA 3 KA NOVEMBRO

TITSHOMBA TI NGA KA MHAKA YA NUNGUNGULU | 2 PEDRO 1-3

“Alakanya a kuta ka siku ga Jehovha”

(2 Pedro 3:9, 10) Jehovha a nga hlweli ku tatisa a citsumbiso cakwe, kota lezvi a vokari va alakanyako lezvaku wa hlwela. Yena i timisela ha n’wina hakuva a nga lavi lezvaku ku lova ni mun’we, kanilezvi i lava lezvaku vontlhe va hundzuluka. ¹⁰ Kanilezvi a siku ga Jehovha gi ta tisa ku khwatsi i khamba; hi siku lego, a matilo ma ta hundza hi guwa ga hombe, a zvilo zva le tilweni ni zva laha misaveni zvi ta nyeka hi kota ya kuhisa ka hombe, a misava ni mitiro yi nga ka yona zvi taswa zvi mbhela.

w06 15/12 27 ¶11

Jehovha i ta “va mahela kululama”

Hi fanele ku ci zwisa kuyini a citiyisekiso ca Jesu ca ku Jehovha i ta maha kululama hi ku “hatlisa”? Hambu lezvi a mhaka ya Nungungulu yi kombako lezvaku “[Jehovha] wa timisela”, yena i ta lamula hi cihatla loku a cikhati ca kulamula ci chikela. (Luka 18:7, 8; 2 Pedro 3:9, 10) Laha a Ntalo wu nga chikela masikwini ya Nowa, a vakubiha va no loviswa hi cikhatanyana ca citsongwani. Hi kufanana, laha a ndzilo wu ngata hi le tilweni, masikwini ya Loti, a vakubiha va no fuviswa. Jesu i te: “Zvi ta mahisa zvezvo ka siku legi a N’wana wa munhu a to wonekeliswa hi gona.” (Luka 17:27-30) A matimu lawo ni magezu a Jesu ma hi byela ku a vakubiha va ta loviswa ‘hi citshuketi’. (1 Va Le Tesalonika 5:2, 3) Hakunene, ha tiyiseka lezvaku Jehovha a nga ta vhumelela ku a tiko ga Sathani giva kona hambu hi siku gin’we go hundza cikhati leci a ci yimisileko kasi ku gi lamula.

(2 Pedro 3:11, 12) Kota lezvi zvontlhe lezvi zvi to nyekisa lezvi, wonani lezvaku mu fanele kuva vanhu vo tshamisa kuyini. Mu fanele kuva ni mahanyela yo basa, mu kombisa hi mitiro lezvaku mu khozela Nungungulu, ¹² laha mu rindzelako ni ku alakanya a kuta ka siku ga Jehovha, legi a matilo ma to lovisiwa hi ndzilo, a zvilo zva le tilweni ni zva laha misaveni zvi nyeka hi kuhisa ka hombe.

w06 15/12 19 ¶18

‘A siku ga hombe ga Jehovha gi kusuhani’

A hi hlamali loku mupostoli Pedro a hi tlharihisa kasi hi rindzela ni ku alakanya “kuta ka siku ga Jehovha”! Hi nga zvi mahisa kuyini lezvo? A yin’we ya tindlela kuva ni ‘mahanyela yo basa, hi kombisa hi mitiro lezvaku hi khozela Nungungulu’. (2 Pedro 3:11, 12) A ku simama hi khomekile mitirweni leyo zvi ta hi vhuna ku ti longiselela a kuchikela ka “siku ga Jehovha”. A gezu ga cigreki gi hundzuluselweko ku ku ‘rindzela ni ku alakanya’ hi kukongoma gi wula ku “ku hatlisisa”. A hi nge zvi koti a ku hatlisisa a kuta ka siku ga Jehovha. Hambulezvo, laha hi gi rindzelako a siku legi, a cikhati ci ta hatlisa nguvhu loku hi tshama hi khomekile ntirweni wa Jehovha. —1 Va Le Korinte 15:58.

Kela titshomba ta moya

(2 Pedro 1:19) Hikwalaho, a mhaka ya kuphrofeta yi tiyisilwe nguvhu ka hina, makunu mu maha khwatsi loku mu chela kota hi yona a ku khwatsi i kandiya yi woningako munyameni (kala gica, ku woneka mahlahle) lomu timbilwini ta n’wina.

w08 15/11 22 ¶2

Timhaka-tshinya ta papilo ga Jakobe ni ga Pedro

1:19 — Himani “mahlahle”, i wonekile rini, niku hi zvi tivisa kuyini lezvaku lezvo zvi humelele? A “mahlahle” hi Jesu Kristu a yimisilweko Mufun’weni wa Nungungulu. (Kuv. 22:16) Hi 1914, Jesu i no suka a yima — kutani a woneka — mahlweni ka zvivangwa zvontlhe kota Hosi ya wuMesiya, a tivisa a kuca ka siku giswa. A kuhundzuka ka Jesu ku kombile a wudzundzo ni Mufumo wakwe wa ntamu. Lezvo zvi tiyisile a lisine la mhaka ya kuphrofeta ya Nungungulu. A ku veka kupima ka timhaka leto zva woninga a timbilu ta hina, niku ha zvi tiva lezvaku a Mahlahle wa woneka makunu.

(2 Pedro 2:4) Kunene, Nungungulu a nga tsikangi ku tsayisa a tingilozi leti ti nga wonha, kanilezvi i no ti hoxa lomu Tartaru, a ti boha hi machini munyameni wa hombe, ti rindzela kulamulwa.

w08 15/11 22 ¶3

Timhaka-tshinya ta papilo ga Jakobe ni ga Pedro

2:4 — Cini “Tartaru”, niku a tingilozi leti ti nga wonha ti hoxilwe rini lomo? A Tartaru wutshamu ga kufanekisela gi fananiswako ni paxo lomu ku vhalelwako a zvivangwa zva moya basi. A Tartaru i fananisiwa ni munyama wo tshisa, laha ka ku lava va vhalelwako kona a va zvi koti ku wona a kungangamela ka makungo ya Nungungulu. Lava va nga lomu ka wutshamu lego ci hava va ci rindzelako xungetano hi wumandziko. Nungungulu i chelile a tingilozi to kala ku ingisa lomu ka Tartaru masikwini ya Nowa, niku ti ta simama ka ciyimo leco kala ti lovisiwa.