Rindzela magumo ya tiko legi na u hi ni kutsumba

Zvezvanyana, a lihlazva-mbilu la Jehovha hi tiko legi li ta mbhela. A wukhongeli ga mawunwa gi ta lovisiwa. A patsano wa matiko wu ta vhukela a vanhu va Nungungulu niku Jehovha i ta lovisa a vakubiha yimpini ya Armagedhoni. A maKristu ma zvi rindzela hi mahlo yo pswhuka a zvimaho lezvo.

Hi lisine, a hi tivi zvontlhe xungetano hi kuxaniseka ka hombe. Hi cikombiso, a hi zvi tivi khwatsi lezvaku ku ta sangula rini. A hi zvi tivi ku zvini zvi to maha a varangeli va politika va vhukela a wukhongeli. A hi zvi tivi kambe a ku zvi ta teka cikhati muni a matiko na ma vhukela vanhu va Nungungulu hambu ku lezvo zvi ta patsa yini? A cin’wani kambe, a hi zvi tivi lezvi Jehovha a to zvi tirisa kasi ku lovisa a vakubiha yimpini ya Armagedhoni.

Hambulezvo, a Mitsalo yi hi byela a mahungu wontlhe hi ma lavako kasi hi rindzela magumo ya tiko legi na hi hi ni kutsumba ni kutiya-hlana. Hi cikombiso, ha zvi tiva lezvaku hi hanya gumeseni ka ‘masiku yo gumesa’. (2 Tim. 3:1) Ha zvi tiva lezvaku a masiku ya kulovisiwa ka wukhongeli ma ta “komisiwa” kasi a wukhongeli ga lisine gi nga lovisiwi. (Mat. 24:22) Ha zvi tiva lezvaku Jehovha i ta tlhatlhisa vanhu vakwe. (2 Ped. 2:9) Ha zvi tiva kambe lezvaku Loyi Jehovha a mu hlawulileko kasi ku lovisa a vakubiha ni ku ponisa citshungu ca hombe yimpini ya Armagedhoni i lulamile niku i na ni ntamu. — Kuv. 19:11, 15, 16.

Lezvi zvi to maheka cikhatini ci tako zvi ta maha vanhu va “titivala hi kuchava”. Hambulezvo, a ku lera ni ku ehleketa hi lezvi Jehovha a mahileko cikhatini ci nga hundza kasi ku ponisa vanhu vakwe ni lezvi a zvi wulako xungetano hi cikhati ci tako, zvi nga hi maha hi ‘ololoka hi tlakusa tihloko ta hina’ na hi hi ni kutsumba ka lezvaku a kutlhatlhiswa ka hina ku tshinele. — Luka 21:26, 28.